YEHEZKIEL 6:8 - KITTA' MATANGKASA'

⁸ Nia' tena siapa jaina battu ri ke'nanga laKupata'lappasa' battu ri anjo pammunoanga mingka laKupasisa'la'-sa'laki ke'nanga mange ri alla'na bansa-bansaya;

YEHEZKIEL 6:8 ပူးပေါင်းရင်းမြစ်များ

NEHEMIA 1:8

O, Batara, Kiu'rangi kana-kananTa napabattua Musa saba' parentaTa. Angkanaya, punna ikambe, umma' Israel, amminrai mae ri Katte, laKipasisa'la'-sa'laki mae ri alla'na bansa maraenga.

YESAYA 6:13

Ba'lalo lalanna sampuloa tau na nia' ija sitau ammantang ri anjo pa'rasanganga, anjo sitaua lanipanraki todong. Mingka rapang poko' kayu karama' punna nita'bangi nia' ija ammantang tonasa'na, kamma tomminjo lania' ija tassesa anjo bansaya, la'jaria pappokokanna umma' matangkasaka.”

YEREMIA 30:11

LabattuA' siagang laKupasalamakko. Bansa-bansa ri tampa'nu Kupela' Kupasisa'la'-sa'la' laKupanraki ngasengi, mingka ikau tena naKupakammako. Memang tena nulata'lappasa' battu ri hukkungang mingka hukkungangKu adeleki situru' katantuang. INakke, Batara, anne akkana.”

YEREMIA 44:14

Battu ri tu Yehuda tassesaya, ia a'lampayamo mange ri Mesir untu' ammantang anjoreng, tena manna sitau lata'lappasa' yareka attallasa'. Tena manna sitau battu ri ke'nanga lakkulle ammotere' mange ri Yehuda, manna pole nasanna' ero'na ke'nanga. Tojeng, tena manna sitau lakkulle ammotere' pantaranganna siapa are tau a'lilia untu' annompang.”

YEREMIA 44:28

Poro siapa areji bawang lasalama' siagang ammotere' mange ri Yehuda battu ri Mesir. Jari sikontu tu Yehuda niaka ri Mesir lanaciniki angkana apaka kananna ke'nanga yareka kana-kanangKu la'rupa.

YEREMIA 46:28

Jari teako mallakki, he ummakKu, labattuA' untu' ampasalamakko. Bansa-bansa, tampa'nu Kupasiara', laKupanraki kabusuki, mingka ikau tena Kupakammako. Memang, tena nulata'lappasa' battu ri hukkungang mingka hukkungangKu mae ri kau adeleki situru' katantuanga. INakke, Batara, anne akkana.”

YEHEZKIEL 12:16

Tena siapa jaina battu ri ke'nanga laKupasalama' battu ri pa'bundukanga, battu ri kacipuranga, siagang battu ri garringa, sollanna ri tangnga-tangngana anjo bansa maraenga, langngu'rangimi ke'nanga angkanaya le'baki ke'nanga a'gau' kodi sikali. Jari lamangakumi ke'nanga angkanaya iNakke Batara.”

YEHEZKIEL 14:22

Ebara' angkana nia' ta'lappasa' siagang napasalamaki ana'-ana'na, parhatikangi ke'nanga punna battui ke'nanga mae ri kau. Ciniki antekamma ja'dala'na ke'nanga, nanuassemmo angkanaya coco' sikali tindakangKu anghukkungi Yerusalem.

YEHEZKIEL 5:10

Tau toaya lanakanrei ana' kalenna siagang anaka lanakanrei tau toana. Kammami anjo batena laKuhukkung ke'nanga, siagang ia attallasaka ija laKupasiaraki mae ri sikontu tampa' maraenga.

YEHEZKIEL 5:12

Bage tallunna pandudu'nu lamatei passabakkang garring siagang bala kacipurang antujuai kotaya. Bage tallunna lamate nibunoi siagang pa'dang ri pantaranganna kotaya, nampa bage tallunna pole laKupasiaraki mange-mange siagang laKuondangi siagang pa'dang.

YEHEZKIEL 5:2

Bage tallunna musti nutunui ri tangnga-tangngana anjo kotaya ri wattunna le'ba'mo nikurung anjo kotaya. Bage tallunna pole musti nutattaki siagang pa'dannu nanuinroi anjo kotaya. Nabage tallunna kala'busanga nupasiaraki nai' ri allaka, nampa laKuondang siagang pa'dangku.

YEHEZKIEL 6:7

Kemae-kemae nia' tau nibuno, na sikamma tau salamaka lanaassemmi angkanaya iNakke Batara.

YEHEZKIEL 7:16

Nia' sipa'gang lata'lappasa' nampa lari naiki ri pa'bulukanga. Anjoreng lasanrapangi ke'nanga jangang-jangang pune-pune nibongkaya battu ri ka'bunga; kabusu'na lakkunrarengi pa'risi' lanri dosa-dosana ke'nanga.

ZEFANYA 3:12

Anjoreng laKuboliki ammantang tuli se'reang bansa tuna pa'mai', ampattoangai pannulungKu. Akkullei ke'nanga ammantang anjoreng.

ROMA 9:27

Naterassimi nakana Na'bi Yesaya ri sesena bansa Israelka, “Manna pole nasangkamma kassika ri tamparanga jaina bansa Israelka, mingka sike'de'ji lasalama';