YEHEZKIEL 5:10 - KITTA' MATANGKASA'

¹⁰ Tau toaya lanakanrei ana' kalenna siagang anaka lanakanrei tau toana. Kammami anjo batena laKuhukkung ke'nanga, siagang ia attallasaka ija laKupasiaraki mae ri sikontu tampa' maraenga.

YEHEZKIEL 5:10 ပူးပေါင်းရင်းမြစ်များ

2 KARAENG-KARAENG 6:29

Lanri kammana anjo kupallumi anakku nampa nakanre ikambe. Ammukona ri wattu kupala'na sollanna nipallu ana'na, nacokkoi anjo ana'na!”

NEHEMIA 1:8

O, Batara, Kiu'rangi kana-kananTa napabattua Musa saba' parentaTa. Angkanaya, punna ikambe, umma' Israel, amminrai mae ri Katte, laKipasisa'la'-sa'laki mae ri alla'na bansa maraenga.

PAMMUJI 44:11

Kibalang parekangi ikambe lari battu ri musunna ikambe, nampa narampasa' ke'nanga pa'barang-baranganna ikambe.

YESAYA 49:26

LaKupa'jari sikamma musunnu palla' ero' ammuno, sa'genna para ia sibuno-buno. Nalanaasseng sikontu umma' rupataua, angkanaya iNakke, Batara, Mappasalama'nu; Kaminang Kassaka, Allata'alana Yakub, Mappasulu'nu.”

YESAYA 9:20

A'bundu'mi tu Manasye siagang tu Efraim, nampa assama ke'nanga angngewai Yehuda. Mingka tuli larrona ija Batara siagang tuli Nahukkunna ija ke'nanga.

YEREMIA 13:14

Nampa laKupasiruppa ke'nanga massing para ia. Tau toa siagang tau rungka laKupakamma ngaseng nampa tena nalanipammopporang. LaKupanraki ke'nanga, tena Kupassayangi yareka tena naKukamaseangi. INakke, Batara, anne akkana.”

YEREMIA 19:9

Lanikurungi ri musu anne kotaya, siagang nausahakangi nabuno pandudu'na. Teai sipato' heba'na batena musua angkurungi, sa'genna sikamma tau niaka lalang ri anne kotaya lasikanre-kanrei para ia sipa'gangngang, ba'lalo ana' kalenna nakanre ngaseng.”

YEREMIA 44:12

Siagang punna nia' battu ri tu Yehuda ammantanga tassesa, tuli ero'na a'lampa mange ri Mesir untu' ammantang anjoreng, lapanra' kabusuki ke'nanga. Kabusu'na ke'nanga, lompo ca'di, lamatei ri Mesir lalang pa'bundukang yareka lanri kacipurang. Lamallaki taua anciniki ke'nanga, siagang lanihinai ke'nanga ri taua. Arenna ke'nanga lanipakei a'jari pattunra.

YEREMIA 49:32

Nakana pole Batara ri Nebukadnezar, “Alleangi sikamma untana siagang sikontu olo'-olo' piarana ke'nanga! Sikontu anjo tau nacukkuru' bodoa uu'na laKupasiaraki ri kere-keremae tampa'. LappabattuA' bala mae ri ke'nanga battu ri kere-keremae.

YEREMIA 49:36

LattuiKa' anging mange ri Elam battu ri appa' sulapa', nampa Kupasiara' pandudu'na ri kere-keremae, sa'genna manna se're pa'rasangang tenamo tanabattui tu Elam untu' annompang.

YEREMIA 50:17

Nakana Batara, “Tu Israel rapangi pa'rappungang gimbala' niondanga siagang nipasimbung-simbunga ri singa. Uru-uruna nibunduki ke'nanga ri karaeng Asyur, nampa Nebukadnezar Karaeng Babel angngallei buku-bukunna ke'nanga.

YEREMIA 9:16

LaKupasiaraki ke'nanga mange ri alla'na bansa-bansa tenaya naassengi ke'nanga yareka ri boe-boena ke'nanga. Latulusu' appabattuA' tantara untu' ambunduki ke'nanga sa'genna Kuancuru' taba sikali ke'nanga.”

PIRAUNG 2:20

O Batara, ciniki na Kiparhatikang anjo ke'nanga tau Kisessaya! Maka nia' kammaya anjo le'ba' Kigaukang? Anrong angkanrei ana' kalenna nangaia, imanga siagang na'bia nibunoi lalang ri BallatTa matangkasaka.

PIRAUNG 4:10

Tamaka heba'na anjo bala antujuai ummakKu sa'genna manna anrong baji' pa'maika napallumi ana' kalenna untu' ambonei battanna.

PIRAUNG 4:16

Tenamo naNaparhatikangi Batara umma'Na; Ia KalenNa ampasimbungi ke'nanga ampa'jari tanianggara'mo imang-imanna; tenamo angkamaseangi sikamma pamimpinga.

PIRAUNG 4:3

Anrong kongkong romanga bawang nanapasusu ana'na, mingka ummakKu tamaka palla'na rapang jangang-jangang unta niaka ri parang.

YEHEZKIEL 12:14

Sikontu tau ammantanga ri balla' karaenga, kammayatompa sikamma tumailalanna siagang pangawala'na anjo karaenga laKupasisa'la'-sa'laki ri kere-keremae. LaKuondangi siagang laKubunoi ke'nanga.

YEHEZKIEL 12:15

Ri wattunna Kupasisa'la'-sa'la' ke'nanga mange ri tangnga-tangngana bansa-bansaya ri pa'rasangang-pa'rasangang maraenga, lanaassemmi ke'nanga angkana iNakke Batara.

YEHEZKIEL 17:21

Tantarana kaminang bajika lamatei lalang pa'bundukang, nampa ia akkullea ta'lappasa' laKupasisa'la'-sa'laki a'lampa kemae-kemae. Na naassemmo ke'nanga ummakKu, angkanaya iNakke, Batara anne akkana.”

YEHEZKIEL 20:23

Anjoreng tommA' ri parang kassika assumpa angkanaya laKupasisa'la'-sa'laki ke'nanga mange ri sikontu linoa,

YEHEZKIEL 22:15

LaKupasisa'la'-sa'laki pandudu'nu mange ri sikontu pa'rasanganga siagang bansaya, siagang laKupammari anjo panggaukang ja'dala'nu.

YEHEZKIEL 36:19

Kuhukkungi ke'nanga situru' carana attallasa' siagang panggaukanna ke'nanga, nampa kupasiara' ke'nanga mae ri pa'rasangang maraeng.

YEHEZKIEL 5:12

Bage tallunna pandudu'nu lamatei passabakkang garring siagang bala kacipurang antujuai kotaya. Bage tallunna lamate nibunoi siagang pa'dang ri pantaranganna kotaya, nampa bage tallunna pole laKupasiaraki mange-mange siagang laKuondangi siagang pa'dang.

YEHEZKIEL 5:2

Bage tallunna musti nutunui ri tangnga-tangngana anjo kotaya ri wattunna le'ba'mo nikurung anjo kotaya. Bage tallunna pole musti nutattaki siagang pa'dannu nanuinroi anjo kotaya. Nabage tallunna kala'busanga nupasiaraki nai' ri allaka, nampa laKuondang siagang pa'dangku.

YEHEZKIEL 6:8

Nia' tena siapa jaina battu ri ke'nanga laKupata'lappasa' battu ri anjo pammunoanga mingka laKupasisa'la'-sa'laki ke'nanga mange ri alla'na bansa-bansaya;

DANIEL 9:7

O Batara, tindakanTa tuli annabai siagang adeleki, mingka ikambe tonji tuli ampakasiriki kalenna ikambe, iamintu ikambe ngaseng ammantanga ri Yudea siagang ri Yerusalem, siagang sikontu julu bansana ikambe le'baka Kipasiara' mange ri pa'rasangang-pa'rasangang bellaya siagang ambania, lanri tenana namajarre' tappa'na mae ri Katte.

KAIMANGNGANG 26:29

Lanaalleko cipuru', sa'genna nukanre ana' kalennu.

KAIMANGNGANG 26:33

Lappa'niakKa' pa'bundukang ri pa'rasangannu siagang laKupasimbung-simbungko mae ri pa'rasanganna bansa maraenga. Lammantangi ta'ronang sikamma kokonnu siagang laKulappassangi a'jari loro kota-kotanu.

AMOS 9:9

LassareA' parenta siagang laKutapi bansa Israel rapang tau attapi gandung lalang ri pattapia. Untu' ampela' kabusuki tenaya bua'-bua'na battu ri ke'nanga, laKugoccangi ke'nanga ri alla'na bansa-bansaya.

ZAKHARIA 2:6

Nakana Batara mae ri umma'Na, “Le'bakko Kupasiara' mae ri kere-keremae. Mingka kamma-kamma anne, ikau sikamma tau nipelaka a'lampako ampilari Babel siagang ammotere' mako mange ri Yerusalem.

ZAKHARIA 7:14

Sanrapang anging barubu, Kubarrasaki ke'nanga sa'genna tarpassa ammantang ri sikamma pa'rasangang-pa'rasangang maraenga. Anne butta copponga a'jari sino sikalimi, tena sikali tau ammantang, siagang roso'mi buttana.”

LUKAS 21:24

Nia' lanibuno siagang pa'dang, siagang nia' todong lanierang mange nipela' ri pa'rasangang maraenga. Siagang lanionjo'-onjokangi anne kota Yerusalem ri tu kapereka, tenaya namalla' ri Allata'ala, sa'genna la'busu'mo wattu le'baka Napattantu Batara mae ri ke'nanga.”

PAOLE 28:64

LaNapasisa'la'-sa'lakko Batara ri alla'na bansa-bansaya ri sikontu linoa. Anjoreng lanynyombako mae ri rewata-rewata nipareka battu ri batu siagang kayu, rewata-rewata tenaya nanuassengi siagang tenaya todong nanaassengi boe-boenu.

PAOLE 32:26

ErokKa' ampa'lanynya' taba sikali ke'nanga, sollanna taniu'rangiamo ke'nanga.

PAOLE 4:27

LaNapasisa'la'-sa'lakko Batara ri alla'na bansa-bansa maraenga siagang sike'de' mami ri kau lammantanga attallasa'.