YEHEZKIEL 43:8 - KITTA' MATANGKASA'

⁸ Riolo sikamma karaenna ke'nanga appareki balo'-balo' pakke'bu' siagang benteng-benteng pakke'bu' balla' karaenna ke'nanga ri sa'rinna balo'-balo' pakke'bu'na siagang benteng-benteng pakke'bu' BallakKu, sa'genna se'reji bawang rinring ri alla'na. Nara'massimi areng matangkasakKu ke'nanga, lanri nagaukanna panggaukang appakaringi'-ringika. Lanri kammana anjo naKupanrakimo ke'nanga lalang pangngalarroingKu.

YEHEZKIEL 43:8 ပူးပေါင်းရင်းမြစ်များ

2 PATTOTTORANG 33:4

Napaui Batara angkanaya anjo Yerusalem la'jari tampa' panynyombang mae ri KalenNa sa'genna satunggu-tungguna, mingka anjoreng, ri Balla'Na Batara, ambangummi Manasye tampa'-tampa' pakkoro'bangngang mae ri rewata-rewataya.

2 PATTOTTORANG 33:7

Naboliki patung barhalaya lalang ri Balla'Na Batara, padahala' le'ba'mi angkana Allata'ala mae ri Daud siagang Salomo ana'na, angkanaya, “Anne BallakKu ri Yerusalem, le'baka Kupile, battu ri alla'na sampuloa anrua daera ri Israel, le'ba'mi Kupattantu a'jari tampa' panynyombang mae ri KalengKu sa'genna satunggu-tungguna.

KALAPPASSANG 12:7

Musti nipasapui sike'de' cera'na ri ruaya benteng pakke'bu' ballaka, siagang irateanganna pakke'bu' napammantangia ke'nanga angkanrei.

YEHEZKIEL 23:39

Ri allo nabunona ana'-anakKu siagang napassareanna mae ri barhala-barhalaya, anjo tau ruaya massari'battang battui mange ri BallakKu nampa nara'massi!

YEHEZKIEL 44:7

Le'ba'mi ke'nanga anra'massi BallakKu, nasaba' lalang nipassareanna mae ri Nakke jannana siagang cera'na koro'banga, napa'biangi ke'nanga antama sikamma bansa maraeng tenaya nassunna', siagang tena namannuruki ri Nakke. Lanri anjo sikamma panggaukanna ke'nanga appakaringi'-ringika, nadakkaimi parjanjiangKu siagang ke'nanga.

YEHEZKIEL 5:11

INakke Allata'ala mattallasaka, Batara Kaminang Tinggia, siagang iaminne kana-kanangKu: Lanri le'ba'namo nura'massi BallakKu siagang sikontu panggaukannu ja'dalaka siagang appakaringi'-ringika, jari laKuancurukko natena Kupammopporangko.

YEHEZKIEL 5:12

Bage tallunna pandudu'nu lamatei passabakkang garring siagang bala kacipurang antujuai kotaya. Bage tallunna lamate nibunoi siagang pa'dang ri pantaranganna kotaya, nampa bage tallunna pole laKupasiaraki mange-mange siagang laKuondangi siagang pa'dang.

YEHEZKIEL 5:13

Lanupisa'ringi antekamma lompona pangngalarroingKu siagang pa'jallokangKu sa'genna sukku' Kusa'ring. Punna le'ba' ngasemmo kajariang anjo sikammaya, nampa mako latappa' angkanaya iNakke, Batara, anne a'bicara mae ri kau lanri larroKu mae ri sipa' tenana namattantu pa'mai'nu.

HAKING-HAKING 19:27

Anjo bari'basaka, ri wattu ambangunna bura'nenna na nasungke pakke'buka untu' a'lampa, nagappami anjo baine piarana attinro ri dallekang balla', anna'gala' limanna ri pakke'buka.