YEHEZKIEL 22:27 - KITTA' MATANGKASA'

²⁷ Sikamma pagawe-pagawe pamarentana rapangi serigala angkae-kaei apa nakokkoka. Nagaukangi ke'nanga ammunoa lanri poro ero'na anggappa passawallang.

YEHEZKIEL 22:27 ပူးပေါင်းရင်းမြစ်များ

2 PATTOTTORANG 36:14

Pantaranganna anjo, Balla'Na Batara le'baka Natangkasi Batara untu' KalenNa, nira'massi ri pamimping-pamimpinna tu Yehuda, imang-imanga, siagang ra'yaka, lanri amminawang turu'na todong ke'nanga anynyomba barhala siagang naturuki panggaukanna bansa-bansa dorakaya ri tammulilina ke'nanga.

PANGNGEBARANG 17:23

Haking jekkonga, annarima cokko-cokkoi doe' pammuccu' siagang tena napajappai kaadelanga.

YESAYA 1:23

Sikamma pamimpinnu angngewami mae ri Nakke siagang assikongkolo'mi palukka'; nangai ke'nanga annarima hadia siagang doe' pammuccu'. Taerokai ke'nanga angngalleangangi ana' kukanga ri pangadelanga; taerokai ke'nanga ampilangngeri tuntutanna sikamma janda-jandaya.

YEREMIA 41:7

Tena nasallo battuna ke'nanga ri tangnga-tangnga kotaya, appakkaramulami Ismael siagang sikamma taunna ambunoi ke'nanga. Mingka nia' sampulo battu ri ke'nanga angkana ri Ismael, “Teaki' bunoi ikambe! Nia' ija ruang rupa gandunna ikambe, kammayatompa minynya' zaitun, siagang je'ne' bani. Yangaseng anjo nacokkoi ikambe ri pantaranganna kotaya.” Lanri kammana anjo tenamo nabunoi Ismael ke'nanga, mingka maraenganga nabuno ngasengi nampa napasambila maya'na antama' ri bungunga.

YEREMIA 5:6

Lanri kammana minjo nalanibuno ke'nanga ri singa battua ri romanga, siagang nikae-kae ri serigala battua ri parang lompoa. A'dete'mi mange-mange macang a'ballanga amboyai lanakanrea ri ampi'na kota-kotana ke'nanga, na sikamma tau assuluka nabakkai ngaseng nakanre. Kajariang ngasengi anjo sikammaya lanri jainamo dosana ke'nanga, siagang a'mole-molemi nabokoi Allata'ala.

PIRAUNG 4:13

Mingka kajariang tojemmi anjo kammaya, lanri dosana sikamma imanga siagang na'bia. Le'baki napasolong cera'na tau tenaya salana.

YEHEZKIEL 13:19

NuhinaMa' ri dallekanna ummakKu, lanri ero'nu poro anggappa sikangkang jelai gandung siagang pirang kere' are roti. Tau tenaya nasala nubunoi, nampa tau siratanga mate nulappassangi attallasa'. Nampa nuballe-ballei ummakKu siagang tappa'mi ke'nanga mae ri kau ngaseng.’ ”

YEHEZKIEL 22:13

Mingka kamma-kamma anne laKudengkai sikamma paellaka siagang pabuno taunu.

YEHEZKIEL 22:25

Sikamma pamimpinna rapangi singa ammammuka ri le'ba'na angngokko' apa-apa. Nabunoi ke'nanga ra'yaka, narampasaki sikontu barang-barang siagang kakalumanynyangngang nabuntuluka siagang jai tubaine janda napakamma ke'nanga.

YEHEZKIEL 22:3

Nasuroa' Batara Kaminang Tinggia ampabattui anne pasanNa mae ri Yerusalem, angkana, “Ikau salako lanri le'bakko ammuno jai tau battu ri pandudu'nu tonji, siagang nura'massi kalennu lanri anynyombako mae ri barhala-barhala nupareka kalennu. Lanri kammana anjo a'reppese'mi wattunnu laniadeli siagang lanarapi'mi kala'busang riwaya'nu. LaKubalang parekangko nicau-cau siagang nikakkali ri bansa-bansaya siagang ri sikontu pa'rasanganga.

YEHEZKIEL 22:6

Sikontu pamimpinna tu Israel napattoangi kagassingang kalenna siagang nagaukangi ammunoa.

YEHEZKIEL 33:31

Battui ke'nanga a'gapullung siagang salaku ummakKu ammempoi ke'nanga ampilangngeri kana-kanannu, mingka anjo apa nuparentakanga tena naturuki ke'nanga. Muncenna ke'nanga appasuluki kana-kana mangngai mingka atinna ke'nanga sangnging passawallanji nanawa-nawa.

YEHEZKIEL 34:3

Dadi'na nuinungi, bulu-bulunna nupareki pakeang, siagang gimbala' kaminang co'moka nupolongi nampa nukanrei. Tale'bakai nuurusu' sikamma gimbala'nu.

YEHEZKIEL 36:12

UmmakKu Israel, laKuerangi ammotere' untu' mange ampammantangngi ammotere' pa'rasanganna. Anjo buttaya la'jari napatangi ke'nanga siagang tuli lanagappai ke'nanga wassele'na, sa'genna ana'-ana'na ke'nanga tena nalamate cipuru'.

YEHEZKIEL 45:8

Anjo tampaka a'jari napatangi sikamma patugasa' pamarentaya ri Israel, sollanna tenamo najallakkangi ummakKu, passangalinna napassareangi anjo tampa' la'binnaya untu' a'jari napatang suku-suku Israel.

YEHEZKIEL 45:9

Nakana Batara Kaminang Tinggia, “He sikamma patugasa' pamarentana Israel, angganna'mi dosa-dosanu! Pamarimi anjo tindakannu appaero'-eroka siagang anjallakkangai ra'yaka. Gaukammi apa annabaya siagang adeleka. Tea sikaliko bongkai pole ummakKu battu ri tampa'na ke'nanga. INakke, Batara Kaminang Tinggia, amparentakangi anjo mae ri kau.

YEHEZKIEL 46:18

Patugasa' pamarentaya takkulleai naalle manna sike'de' dudu barang pisakana ra'ya'na. Butta kalennaji bawang akkulle napassareang mae ri ana'-ana' bura'nena, sa'genna tena manna sitau battu ri ummakKu akkulle nipasisa'la' battu ri barang-baranna.”

MIKHA 7:8

Tena alasang mae ri musu-musunta untu' rannu pa'mai'na lanri kaancuranta. Nasaba' manna pole kitu'guru', mingka lambangung poleangki'. Kamma-kamma anne niakki' lalang ri sassanga, mingka laNasingariki' Batara.

HABAKUK 2:9

Nitunraiko ikau! Nupa'jari kalumanynyangi kaluarganu battu ri passawallang nugappaya lanri gau' palla'nu, sollanna balla' kalennu a'jari amang siagang bellai battu ri kasusaanga siagang balaya.

ZEFANYA 3:3

Sikamma tumalompona anjo kotaya rapangi singa ammarrung-marrunga sa'ranna. Sikamma hakinga rapangi serigala-serigala cipuruka; sanna' angngoana ke'nanga, sa'genna manna sipappaka buku tenamo nasesa untu' ammuko.

MATIUS 21:13

Nampa Nakana ri anjo taua ngaseng, “Nia' tattulisi' lalang ri Kittaka angkana, Nakana Allata'ala, ‘Lanipareki balla' sambayang BallakKu.’ Mingka ikau ngaseng nupareki pa'rappungang paella'!”

MATIUS 7:15

“Tutuko mae ri na'bi-na'bi palassua. Sanrapangi nicini' gimbala' ke'nanga, mingka sikontutojenna sanrapangi kongkong nye'nyereka lalang nyawana ke'nanga.

LAMPA-LAMPANA 20:29

Punna a'lampa' sallang, ma'nassa laniaki battu kongkong romang nye'nyereka ri tangnga-tangnganu. Na anjo tau nujagaia la'jarimi sanrapang kanre-kanrena anjo kongkong romang nye'nyereka.

LAMPA-LAMPANA 24:9

Amminawang ngaseng tommi sikamma tu Yahudi niaka anjoreng antudui Paulus. Siagang napakkontu tojemmi ke'nanga sikamma anjo apa le'baka napau Tertulus.