YEHEZKIEL 14:6 - KITTA' MATANGKASA'

⁶ Pabattuang tongi tu Israel angkanaya iNakke, Batara Kaminang Tinggia, angkana ri ke'nanga, ‘Toba' mako battu ri dosa-dosanu, siagang bokoimi anjo barhala-barhalanu appakalanrea.’

YEHEZKIEL 14:6 ပူးပေါင်းရင်းမြစ်များ

2 PATTOTTORANG 29:6

Boe-boeta tena namajarre' tappa'na mae ri Karaeng Allata'alata siagang nagaukangi ke'nanga apa tenaya Nangai Karaeng Allata'ala. Tena najampangi Karaeng Allata'ala siagang pammantanganNa.

YESAYA 30:22

Sikamma patung barhalanu nilapisika pera' siagang bulaeng, lanupelaki sangkamma loro, nampa nukana, “Bellako battu ri nakke!”

YEREMIA 13:27

Le'ba'mi Kucini' nugaukang sikamma apa-apa tenaya naKungai. Kucini'mi nuondang rewata-rewata maraenga ri buluka siagang ri kokoa, rapang sitau bura'ne a'lingu-lingu ero' mae ri bainenna taua, yareka jarang laki balere' dudua mae ri jarang ganaya. He pandudu'na Yerusalem, cilaka mako! Angngapapi nulata'lappasa' battu ri sikontu kaja'dallanga?”

YEHEZKIEL 14:4

Lanri kammana anjo, paui mae ri ke'nanga angkanaya iNakke, Batara Kaminang Tinggia appasang kamma anne, ‘Sikamma tu Israel ampappirannuangai kalenna mae ri barhalaya siagang naturukiangi kalenna ta'loposo' antama' ri dosaya, nampa battu untu' appala' pappitangara' ri se'rea na'bi, KalengKu lappiali mae ri ke'nanga siagang piali siratannaya mae ri barhala-barhala kammaya anjo jaina!.

YEHEZKIEL 16:63

LaKupammopporangi kasalannu, mingka takkulleako angkaluppai siagang lasiri'-siriki nusa'ring akkanaya. INakke, Batara Kaminang Tinggia, anne akkana.”

YEHEZKIEL 18:30

Nakana Batara Kaminang Tinggia, “He tu Israel, laKuadeli tunggala' taua situru' massing panggaukanna. Toba' mako battu ri dosa-dosanu. Teako lappassangi dosanu angngancuruki kalennu.

YEHEZKIEL 8:16

Nieramma' mange ri paranglakkeng bageang lalangnganna Balla'Na Batara. Ri ampi'na pakke'bu' antamaya ri kamara' matangkasaka, ri alla'na tampa' pakkoro'bangnganga siagang loronga, nia' tau ruampulo allima jaina. Nabokoi ke'nanga kamara' matangkasaka, siagang su'juki ke'nanga a'dalle' anrai' anynyomba mae ri mataallo ammumbaya.

YEHEZKIEL 8:6

Nakana Allata'ala ri nakke, “He tau, apa nucini' kajariang? Parhatikangi sikamma panggaukang appakaringi' nagaukanga tu Israel, ampakabellaiA' battu ri BallakKu! Maeko, laKupicinikiangko apa-apa la'bi kodiangnganga pole.”

HOSEA 14:8

Lammotereki ke'nanga mae ri Nakke nammamtang lalang ri la'langKu. Lintaki ke'nanga katambang kalumanynyanna, rapang gandung a'bakka' ri koko copponga buttana siagang rapang koko anggoro'. Rapang je'ne' anggoro' Libanon lamasahoroki arenna ke'nanga.

ZEFANYA 3:11

Anjo wattua, he ummakKu, tenamo nuparallu pole siri'-siri' lanri le'ba'nu angngewa mae ri Nakke. LaKubongkai sikamma tau tampoa siagang borroa, siagang tenamo nulangngewa mae ri Nakke irate ti bulu' matangkasakKu.

ZAKHARIA 1:4

Teako sangkammai boe-boenu. Wattu jammang riolo napabattui sikamma na'bia pasangKu mae ri ke'nanga sollanna tanagaukangngamo gau' ja'dalaka siagang gau' dosaya ke'nanga. Mingka tanajampangiai ke'nanga siagang taerokai ke'nanga mannuruki ri Nakke.

LAMPA-LAMPANA 17:30

Anjo wattu kadongokanta Nakaluppaimi Allata'ala, mingka kamma-kamma anne Nasuromi toba' battu ri dosa-dosana sikontu rupataua ri lino.

LAMPA-LAMPANA 26:20

Kupaumi silambusu'na mae ri taua angkanaya musti toba' ngasengi ke'nanga battu ri massing dosa-dosana. Musti napassareangi tallasa'na ke'nanga mae ri Allata'ala. Siagang musti napa'butti lalang ri katallassanna ke'nanga, angkanaya ma'nassa toba' tojeng-tojemmi battu ri dosa-dosana ke'nanga. Uru-uruna anjorengi ri Damsyik kupau anne passalaka. Le'baki anjo nampa ri Yerusalem, siagang ri sikontu Yudea, ri tangnga-tangngana bansa maraenga.

LAMPA-LAMPANA 3:19

Lanri kammana minjo sari'battangku ngaseng, nuparallumo massing toba' battu ri dosa-dosanu, siagang ammotere' mako ri Allata'ala sollanna naNapammopporang dosa-dosanu.

ROMA 6:21

Anjo wattua apa passawallang nugappa ri anjo panggaukang appakasirika? Poro kamateang bawang naerang anjo panggaukang-panggaukang kammaya!

1 SAMUEL 7:3

Nakanamo Samuel ri umma' Israel, “Punna erokko ammotere' mae ri Batara siagang anynyomba ri Ia siagang sikontu atinnu, musti nupela' ngasengi sikontu rewata battu-battua siagang patunna Dewi Asytoret. Passareang tabasikali kalennu mae ri Batara, siagang anynyomba mako mae ri Ia bawang, na Nalappassangko battu ri tu Filistin.”