YAKOBUS 5:10 - KITTA' MATANGKASA'

¹⁰ Sikamma sari'battangku, u'rangi na'bi-na'bi a'bicaraya lalang arenNa Batara. Sa'baraki ke'nanga angkasiaki kasessanga. Jari angngalle mako conto mae ri ke'nanga.

YAKOBUS 5:10 ပူးပေါင်းရင်းမြစ်များ

2 PATTOTTORANG 36:16

Mingka napare' karek-karenanji anjo sikamma tunisuroNa Allata'ala, siagang nakakkali na'bi-na'biNa, kammayatompa tena najampangi kana-kananNa. Kale'bakkanna sanna'mi larrona Batara mae ri ke'nanga, siagang takkulleami ke'nanga ta'lappasa' battu ri hukkunganNa Batara.

YESAYA 39:8

Appialimi Karaeng Hizkia angkana, “Baji' tongi anjo pasanNa Batara nupabattua mae ri nakke.” Appiali kammai anjo lanri napikkiriki angkana: “Assala' tuli amangi siagang salewangangi kakaraengangku lalang tallasakku.”

YEREMIA 2:30

Tena matu-matunnu Kuhukkung, lanri teanu appilangngeri pappakainga'. Rapang singa a'jalloka, sangkamma tomminjo batenu ambunoi sikamma na'binu.

YEREMIA 23:22

Ebara' angkana naassengi ke'nanga apa takkimbolonga lalang ri pikkirangKu, tantu napabattumi ke'nanga mae ri ummakKu sikontu le'baka Kupau. Nalatoba' ummakKu battu ri dosa-dosana siagang battu ri panggaukang ja'dalaka.

YEREMIA 26:16

Nampa sikamma pagawe pamarentaya siagang ra'yaka nakanamo ri anjo imang-imanga siagang na'bi-na'bia, “Anne taua a'bicarai lalang arenNa Karaeng Allata'alata; tena nasiratang nihukkung mate.”

LUKAS 13:34

O, tuniaka ri Yerusalem, tuniaka ri Yerusalem! Nubunomi na'bi-na'bia! Nusambilami batu sa'genna mate sikamma tu Nasuroa Allata'ala! Pissiapa are mako ero' Kukalimbuki, sanrapang anrong janganga angkalimbuki ana'-ana'na irawanganna ka'nyi'na, mingka taeroka ngasengko!

LUKAS 6:23

Kamanna na'bi-na'bia ri jammang riolo nigau' kamma ngaseng tongi. Punna kajariang anjo ri kalennu, pakasannangi atinnu siagang a'rannu-rannuko; nasaba' sanna' lompona pahala lanugappaya ri suruga.

LAMPA-LAMPANA 3:21

Musti ammantangi ri suruga sa'genna le'ba' ngaseng Napa'jari beru linoa Allata'ala, situru' apa le'baka Napattantu Allata'ala lalang ri na'bi-na'biNa ri jammang riolo.

LAMPA-LAMPANA 7:52

Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala.

IBRANI 13:7

Teako kaluppai sikamma pamimpinnu, ampabattuai pappasanNa Allata'ala mae ri kau. Parhatikangi antekamma batena attallasa' siagang antekamma batena mate ke'nanga, kammayatompa contoimi katappakkanna ke'nanga.

YAKOBUS 4:11

Sikamma sari'battangku; teako assicalla-callai yareka teako assisala-salakangi. Inai-nai ancallai yareka ansalakangi paranna tu Karisteng, nacallami siagang nasalakammi hukkunNa Allata'ala. Na punna nusalakammo hukkung-hukkunNa Allata'ala, ma'nassa tenamo nanuturuki anjo hukkung-hukkunga, passangalinna a'jari mako haking mae ri anjo hukkung-hukkunga.

YAKOBUS 5:13

Punna nia' ri tangnga-tangnganu tau susa, parallui appala' doang. Punna nia' tau rannu, parallui akkelong mammuji ri Allata'ala.

YAKOBUS 5:7

Lanri kammana, sa'bara' ngasengko sari'battang, sa'genna battu Batara. Ciniki antekamma sa'bara'na palamung-lamunga antayangi wassele' lamung-lamung lompoa anggaranna mae ri ia. Sa'baraki antayangi wattu bosia siagang wattu pa'rapponna lamung-lamunna.

YAKOBUS 5:9

Teako ta'liwakki larronu siagang teako sisalakangi, sollanna tena Nahukkungko Allata'ala. U'rangi! A'reppese'mi hakinga! A'birimmi battu!