YAKOBUS 4:11 - KITTA' MATANGKASA'

¹¹ Sikamma sari'battangku; teako assicalla-callai yareka teako assisala-salakangi. Inai-nai ancallai yareka ansalakangi paranna tu Karisteng, nacallami siagang nasalakammi hukkunNa Allata'ala. Na punna nusalakammo hukkung-hukkunNa Allata'ala, ma'nassa tenamo nanuturuki anjo hukkung-hukkunga, passangalinna a'jari mako haking mae ri anjo hukkung-hukkunga.

YAKOBUS 4:11 ပူးပေါင်းရင်းမြစ်များ

PAMMUJI 140:11

Boli'mi kamma nipibosi ke'nanga ri bara pepe', nampa nipela' antama' ri kali'bong kamateanga, sa'genna takkullea assulu' poleang.

LUKAS 6:37

“Teako angngadeli ri tau maraenga, sollanna tena todong Naadeliko Allata'ala. Teako anghukkungi ri tau maraenga, sollanna tena todong Nahukkungko Allata'ala. Pammopporangi parannu tau, sollanna Napammopporang tongko Allata'ala.

ROMA 2:1

Lanri kammana, sari'battangku ngaseng, inaiko kutadeng antu sa'gennu akkulle ampasalai tau maraenga? Tena sikali apa-apa ri kau untu' akkulle ampattojengi kalennu! Nasaba' punna nupasala parannu tau, padahala' kalennu anggaukangi anjo apa-apa nagaukanga ke'nanga, ikau tommi ampabattui hukkunganga mae ri kalennu.

ROMA 2:13

Nasaba' teai lanri naassennamo taua hukkung agamana tu Yahudia nampa akkulle assibajiki ammotere' siagang Allata'ala; passangalinna lanri nagaukannamo anjo apa-apa tattulisika lalang ri anjo hukkung-hukkunga.

ROMA 7:7

Jari punna kamma, apamo lanikana? Lanikana ja'dalaki anjo hukkung-hukkung agama Yahudia? Tantu tena! Mingka iaminjo hukkung-hukkunga angngajarakki' angngassengi nikanaya dosa. Takuassengai angkana apa anjo nikanaya angngoa, ka'de' tena nanakana anjo hukkung agamaya, “Teako angngoai.”

1 KORINTUS 4:5

Lanri kammana, nasaba' tenapa narapiki wattunna, teako akkaro-karo dudui ampattantui angkanaya salai yareka tena nasala se'rea tau. Tayangi sa'genna battu sallang Batara. Iami lassungke ngasengi sikontu rahasia taccokkoa lalang ri sassanga. Iami lampakacinikang ngasengi sikontu apa le'baka narancana lalang ri massing atinna taua. Iapi anjo wattua nampa massing lannarima taua pujiang siratannaya battu ri Allata'ala.

2 KORINTUS 12:20

Ranggaselai nyawaku gassingka punna battua' sallang angkunjungiko nakurapikangko tasangkammaya apa kuminasaia. Kammayatompa nurapikang tonga' tasangkammaya pa'minasanu. Gassingka nia' sallang kurapikang passiba'jiang, sereati, pa'bambangang, kaparalluang kalennaji bawang naboyai, sipitina, sikompa-kompa sala, katampoang siagang karicuang.

EFESUS 4:31

Pela'mi sikontu pa'risi' pa'maika, sentimenga, siagang larroa. Tea' mako pole akkio'-kioki sipakka'-pakkanai. Pela'mi sipa' sikabirisia yareka sipa'-sipa' sangkammaya anjo.

1 TIMOTIUS 3:11

Bainenna ke'nanga musti tau baji' todong, teai tu nangaia appasilemba-lemba bicara. Musti naassengi ke'nanga ampakalewai kalenna, siagang musti lambusuki ke'nanga ala ri apa-apa mamo.

2 TIMOTIUS 3:3

Tena pangngarimangnginna siagang pangngamaseanna ke'nanga, tanangaiyai ampammopporangi paranna tau, nangai nabotto'-bottoki arenna paranna tau, nangai ammassa ri paranna tau, pallaki, siagang birisiki mae ri kabajikanga.

TITUS 2:3

Kammayatompa, parallu tongi nupakainga' tau toa bainea sollanna matangkasa' ke'nanga ri panggaukanna sangkamma siratannaya ri katallassanna tau anynyombaya ri Allata'ala. Takkulleai napitina paranna tau, siagang takkulleai tu'guru' cinnana ke'nanga mae ri inung-inungang terasaka. Musti napangngajarrangi ke'nanga apa-apa bajika;

YAKOBUS 1:16

Sikamma sari'battangku, sannaka kukarimangnginna; teako kau eroki nitipu!

YAKOBUS 1:19

Sikamma sari'battangku, sannaka kukarimangnginna! Parhatikangi anne baji'-baji'! Sikontu taua musti lintaki mappilangngeri, mingka tena nakkaro-karo ero' a'bicara siagang tena nalinta' larro.

YAKOBUS 1:25

Anjo hukkunNa Allata'ala sukkuki siagang makoasai untu' ampakabebasaki rupataua. Na inai-nai ansalidiki siagang amparhatikang baji'-bajiki kammayatompa anggaukangi anjo hukkung-hukkunga, jari tena na nalangngere'ja bawang nampa nakuluppai, iami lanibarakkaki ri Allata'ala lalang sikontu apa-apa nagaukanga.

YAKOBUS 2:8

Nugaukammi annabaya, punna nugaukang hukkung Kakaraengang niaka tattulisi' lalang ri Kittaka angkanaya, “Paralluko angkamaseangi parannu tau, sangkamma nukamaseanna batangkalennu.”

YAKOBUS 5:10

Sikamma sari'battangku, u'rangi na'bi-na'bi a'bicaraya lalang arenNa Batara. Sa'baraki ke'nanga angkasiaki kasessanga. Jari angngalle mako conto mae ri ke'nanga.

YAKOBUS 5:7

Lanri kammana, sa'bara' ngasengko sari'battang, sa'genna battu Batara. Ciniki antekamma sa'bara'na palamung-lamunga antayangi wassele' lamung-lamung lompoa anggaranna mae ri ia. Sa'baraki antayangi wattu bosia siagang wattu pa'rapponna lamung-lamunna.

YAKOBUS 5:9

Teako ta'liwakki larronu siagang teako sisalakangi, sollanna tena Nahukkungko Allata'ala. U'rangi! A'reppese'mi hakinga! A'birimmi battu!

1 PETRUS 2:1

Lanri kammana, pela'mi sikontu apa ja'dalaka battu ri kalennu; tea' mako a'balle-ballei pole, siagang tea' mako assara-sarai. Teako pakimburui, siagang teako hinai parannu tau.