YAKOBUS 3:17 - KITTA' MATANGKASA'

¹⁷ Mingka inai ampatangi kacara'dekang battu ratea ri suruga, iami maci'nong, nangai assiamaka, sombereki, siagang mappilangngeri. Iami sanna' jaina pangngamaseanna siagang a'nyatami panggaukang-panggaukang baji'na. Tena nabattala' siali, siagang tena nangai assara-sarai.

YAKOBUS 3:17 ပူးပေါင်းရင်းမြစ်များ

1 KARAENG-KARAENG 3:12

jari laKuturukiang mako pappala'nu. LaKupa'jariko la'bi cara'dekangngang siagang la'bi bajikangngang pangngassengannu na manna inai-nai, baji' ri jammang allaloa, kammayatompa ri jammang labattua.

1 KARAENG-KARAENG 3:28

Nalangngere'na bansa Israel anjo kaputusang le'baka natantukang lalang ri anjo parkaraya, lannasa'mi siagang angngali'mi ke'nanga ri ia. Nasaba' a'nassami angkanaya nisaremi pangngassengang mabaji' ri Allata'ala untu' a'gau' adele'.

1 KARAENG-KARAENG 3:9

Lanri kammana anjo Batara, poro Kisare laloa' pangngassengang mabaji', ia kuparalluanga untu' ammarenta ri anne ummatTa siagang adele', siagang untu' akkulle angngassengi angkanaya kerea baji' siagang kerea kodi. Punna tena nakamma, antekamma olona akkulle kuparenta anne ummatTa lompo kammaya?”

1 PATTOTTORANG 22:12

Na poro Nasareko Karaeng Allata'alanu kacara'dekang siagang pangngassengang untu' ammarenta ri Israel situru' hukkung-hukkunNa.

1 PATTOTTORANG 22:9

Mingka manna nakamma, le'ba'ma' Najanji angkana: ‘Langgappako sitau ana' bura'ne laamanga ammarenta, nasaba' laKubantui sa'genna tena musu lambunduki. Laniarengi Salomo nasaba' lalang ammarentana, laKusarei kasannangang siagang kaamangngang ri sikontu Israel.

AYUB 28:12

Mingka kemae kacara'dekanga akkulle niboya? Kemaeki' akkulle appilajara' sollanna nikkulle pahang?

AYUB 28:23

Allata'alaji bawang angngassengi tampa'na kacara'dekanga, Iaji bawang angngassengi oloanga mange anjoreng,

AYUB 28:28

Nakana Allata'ala ri rupataua, ‘Punna ero' nugappa kacara'dekanga, musti nupakalompoi Allata'ala. Punna erokko ammahang, musti nupakabellai kaja'dallanga.’ ”

KALAPPASSANG 36:2

Nakio'mi Musa anjo Bezaleel, Aholiab siagang sikontu tau anggappaya kacara'dekang battu ri Batara siagang eroka ambantu, nampa nasuro ke'nanga ampakaramulai anjo jamanga.

PANGNGEBARANG 2:6

Batarami assare kacara'dekang; battu ri Iami rupataua anggappa pangngassengang siagang pammahang.

YESAYA 2:4

Ia la'jari haking ri tangnga-tangngana bansa-bansaya, annappuki parkara ri tangnga-tangngana suku-suku bansaya. Lanide'deki pa'danga a'jari pa'jeko, siagang pokea a'jari pa'battasa'. Tenamo nalasibakkai bansa-bansaya, tena tommo natuli sadia ero' a'bundu'.

YESAYA 32:6

Tau toloa kana-kana tolo napasulu' siagang kaja'dallang narancana. Apa-apa mamo nagaukang yareka napau, tuli nahinai Allata'ala. Tale'bakai nasare kanre tau cipuruka yareka nasare je'ne' inung tau turerea.

YESAYA 40:11

Rapang sitau pakalawaki amparakai olo'-olo'Na; KalenNa ampa'rappungi ke'nanga. Ana'-ana' gimbalaka Nakalawingi, na Naemba baji'-baji' sikamma anronNa.

DANIEL 1:17

Allata'ala Nasarei anjo appaka turungka iamintu pangngassengang siagang kacara'dekang lalang a'rupa-rupa pangngassengang bicara siagang pangngassengang maraengannaya. Pantaranganna anjo Daniel Nasare tongi kacara'dekang untu' ampakasingaraki battuanna pappiso'naya siagang paccinika.

MALEAKHI 2:9

Na iNakke lampa'jari natunaiko umma' Israel lanri tenana numannuruki ri erokKu, kammayatompa lanri nupasimmara'-maraenna taua ri wattunna nuajara' ummakKu.”

MALEAKHI 3:3

Battu untu' angngadeli, sanrapang tau antangkasiai siagang ampakati'noki peraka. Sanrapangi pade'de' bulaeng ti'no' siagang pade'de' pera' ti'no', kamma tomminjo tunisuroNa Batara laNatangkasi sikamma imanga sollanna akkulle Napassareang koro'bang-koro'banga situru' cara Nakaerokia Batara.

MATIUS 23:28

Kamma ngaseng tommako anjo. Punna nicini' battu pantarang, baji' ngasengko mae ri taua; mingka lalang ri nyawanu, sangnging tu munapekko siagang tena ngaseng nungngasseng atorang.”

MATIUS 5:8

Mate'nei tau lambusu' pa'maika; nasaba' iami langngassengi Allata'ala!

MATIUS 5:9

Mate'nei tau mappasiamaka paranna tau; nasaba' iami laniakui ri Allata'ala a'jari ana'-ana'Na!

LUKAS 21:15

INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua.

LUKAS 6:36

Paralluko lompo pangngamaseang sangkamma Manggenu lompo pangngamaseangi.”

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

YOHANES 1:47

Nacini'mi Isa nia' battu Natanael; na Napaumo passala' ri batangkalenna Natanael Nakana, “Ciniki, iaminjo tu Israel tojeng-tojenga. Tena apa-apa palassu lalang ri batangkalenna.”

LAMPA-LAMPANA 11:24

Anne Barnabas tau baji' pa'mai' siagang nikoasaimi ri RohNa Allata'ala; kammayatompa sanna' jarre'na tappa'na ri Batara, sa'genna jaimi tau amminawang tappa' ri Batara.

LAMPA-LAMPANA 9:36

Anjoreng ri Yope, nia' sitau baine, niarenga Tabita. Ia tau tappa' ri Isa. (Lalang bicara Yunani arenna nikana, Dorkas, battuanna jonga.) Tuli nagaukangi apa-apa bajika, nanatulung tu kasi-asia.

ROMA 12:18

Usahakangi sollannu akkulle assiama' ngaseng siagang taua lalang tallasa'nu.

ROMA 12:9

Angngamaseangko siagang ci'nong pa'mai'. Musti nukabirisi gau' ja'dalaka, siagang anna'gala' jarrekko mae ri apa-apa bajika.

ROMA 15:14

Sikamma sari'battangku! Tappaka' angkanaya jai apa-apa baji' ri kau ngaseng. Jai todong apa-apa nuasseng, siagang akkulleko massing siajara'.

1 KORINTUS 12:8

Nia' tau nisare ri RohNa Allata'ala pakkulle a'bicara sa'genna lompo pangaruna. Maraenganga nia' nisare kacara'dekang untu' ampakasingaraki biritta battua ri Allata'ala; naia tonji anjo Roh se'rea assarei kacara'dekang.

2 KORINTUS 10:1

Kamma-kamma anne, kalengku Paulus, nia' ero' kupabattuangko. Inakke anne, turu' kananna taua, sanna' tunana kana-kanangku punna sidallekanga' siagang ikau ngaseng. Mingka punna sikabellaiki' sanna' baraniku. Jari, lanri tunaNa siagang kabajikanNa Almasi,

2 KORINTUS 6:6

Tulusu' pa'mai' maki', mangngasseng baji' maki', sa'bara' maki', kammayatompa baji' pa'mai' maki' mae ri kau ngaseng, sollanna nuasseng angkanaya ikambe anne ma'nassa atanNaki' Allata'ala. Kammayatompa tanjeng maki' mae ri Roh pannulunNa Allata'ala, mangngamaseang maki' situlusu' pa'maitta;

2 KORINTUS 7:11

Alle sai cini' wassele'na si'na situruka ero'Na ri Allata'ala! Iamintu attojeng-tojengko ampakabajiki apa kodia! A'jari numusui dosaya, a'jari mallakko, a'jari nakkukko, a'jari lompoi sumanga'nu, kammayatompa rellako anghukkungi tau salaya! Ilalang yangasenna anjo nupa'buttimi ri kalennu angkanaya tena nanusala mae ri anjo passalaka.

2 KORINTUS 9:10

Allata'ala ampasadiai bine napakioroka taua siagang kanre niparalluia. Ia tommi ampasadiai siagang ampa'jari jai anjo bine le'baka nupakioro', sa'genna katambang todong wassele'na anjo apa le'baka nupa'lammorang.

EFESUS 5:9

Nasaba' battu ri iaminjo singaraka ammumba sikontu gau' bajika siagang gau' annabaya ri dallekanNa Allata'ala.

FILIPI 1:11

Lakala'biang mako ri sikamma panggaukang bajika; iamintu jama-jamang KalenNaya bawang Isa akkulle anggaukangi; naporo nipakala'biri'mo siagang nipuji-pujimo Allata'ala.

FILIPI 4:8

Na kala'busanna, sari'battangku ngaseng, parallui nubonei pikkirannu siagang apa-apa niaka anggaranna, siratanga nipuji, iamintu: apa-apa annabaya, mala'birika, adeleka, matangkasaka, mate'nea, siagang bajika.

KOLOSE 1:10

Na lanri kammanami anjo nukkullemo attallasa' situru' ero'Na Allata'ala, siagang natuli nupakasannang pa'mai'Na; sa'genna ilalang ri apa-apa mamo, akkulleko appa'nia' wassele' apa-apa baji'. Kammayatompa katambang tommi pammahannu ri sesena Allata'ala.

1 TESALONIKA 2:7

Mingka napakatunami kalenna ikambe ri wattunna nia' ri tangnga-tangnganu, sanrapang se're amma' amparakai ana'-ana'na.

1 TIMOTIUS 5:21

Ri dallekanNa Allata'ala, Isa Almasi, siagang malaeka'-malaeka' nipileNa, kupala' tojeng-tojengi ri kau sollanna nuturuki anne pappakaingaka; teako ranggaselai manna ri nai, siagang teako assialle-alleangangi.

2 TIMOTIUS 2:24

Inai-nai anjama-jama untu' Batara tasiratangai a'besere'; musti sombereki mae ri yangasenna taua, siagang akkullei naajara' taua siagang baji' na sa'bara'.

TITUS 1:15

Sikontu apa-apaya tangkasa' ngasengi mae ri tau tangkasaka. Mingka mae ri tau ra'masaka pikkiranna siagang tau tenaya natappa' tena sikali apa-apa matangkasa', nasaba' ra'masa'namo pikkiranna siagang ati mailalanna ke'nanga!

TITUS 3:2

Pauangi ke'nanga sollanna tena napitinai paranna tau, passangalinna parallui assiama' siagang sombere' mae ri taua. Siagang parallui tuli tuna kana-kananna ke'nanga mae ri yangasenna taua.

IBRANI 12:11

Memang, ri wattunta Naajara', tena nasannang pa'maitta ri anjo hukkunganga, passangalinna poro a'jari la'baji pa'maitta. Mingka ri le'ba'na anjo, ikatte tau le'bakamo niajara', passabakkang iaminjo hukkunganga na kimannurukimo ri ero'Na Allata'ala lalang katallassanta; sa'genna a'jari salewangammo nisa'ring kalenta.

IBRANI 12:14

Usahako sollannu assiama' siagang yangasenna taua lalang katallassannu; kammayatompa usahako sollannu a'jari tangkasa' ri dallekanNa Batara. Nasaba' punna takammaya anjo tena manna sitau akkulle anciniki Batara.

YAKOBUS 1:17

Sikontu passare bajika siagang hadia sukkuka, sangnging battu ngaseng ri suruga, nipaturunga ri Allata'ala, ampa'jariai sikontu apa-apa singaraka ri langika. Iami Allata'ala tamamminraya, tenaya Nammoli' bayang-bayang lanri pamminroanna apa-apaya.

YAKOBUS 1:5

Punna nia' tau ri kau ngaseng kurang pangngissengang, parallui nupappalakkang battu ri Allata'ala, sollanna nisare pangngissengang battu ri Allata'ala; nasaba' yangasenna taua akkullei Nasare Allata'ala lanri lammoro' pa'mai'Na, kammayatompa lanri pangngamaseanNa.

YAKOBUS 2:13

Nasaba' talaNapa'nyatayai pangngamaseanNa Allata'ala mae ri tau tenaya nangngasseng mangngamaseang. Mingka la'bi jarrekangangi pangngamaseanga na anjo hukkunganga!

YAKOBUS 2:4

Lanri kammana anjo batenu, nupassimmara'-maraemmi parannu tau siagang pikkirang ja'dala'mi nupake angnganggaraki parannu tau.

YAKOBUS 3:15

Anjo kacara'dekang kammaya tena nabattu ri suruga assala'na. Mingka battu ri lino, battu ri hawa napasuna rupataua, siagang battu ri setanga!

YAKOBUS 4:8

A'reppesekko mae ri Allata'ala na'reppese' todong Allata'ala mae ri kau. Bissaimi limannu, ikau tau dorakaya! Siagang tangkasi atinnu, ikau tau a'rua nyawaya!

1 PETRUS 1:22

Lanri mappilangngerinnu mae ri pangngajaranNa Allata'ala, parallui nutangkasi kalennu siagang nukamaseang julu tappa'nu situlusu'na pa'mai'nu. Lanri kammana, paralluko massing sikamaseang lalang sikalepu pa'mai'nu,

1 PETRUS 2:1

Lanri kammana, pela'mi sikontu apa ja'dalaka battu ri kalennu; tea' mako a'balle-ballei pole, siagang tea' mako assara-sarai. Teako pakimburui, siagang teako hinai parannu tau.

1 PETRUS 2:18

Sikamma sari'battangku a'jari palayanga, paralluko mappilangngeri baji'-baji' mae ri pinggawanu; tena namae ri ia baji' pa'maika siagang sombereka bawang, mingka mae ri ia pole sekkeka.

1 YOHANES 3:18

Sikamma ana'-anakku! Teako ri bawanuji yareka ri bicarannuji bawang mangngamaseang. Mingka paralluki' mangngamaseang tojeng-tojeng, siagang nipa'butti lalang ri panggaukanta.

1 YOHANES 3:3

Sikontu tau niaka panrannuang kammana anne mae ri Almasi lanajagai kalenna sa'genna tangkasa' tojeng-tojeng, iamintu tangkasa' battu ri dosa-dosaya sangkamma tangkasa'Na todong Almasi.