YAKOBUS 1:27 - KITTA' MATANGKASA'

²⁷ Tutu situlusu'na siagang sitojennaya ri agamaya situru' paccini'Na Allata'ala, iamintu annulunga ana'-ana' kukang siagang janda-janda kasi-asi, kammayatompa mangngatutui ri kale sollanna tena nanipanraki ri anne linoa.

YAKOBUS 1:27 ပူးပေါင်းရင်းမြစ်များ

PAMMUJI 119:1

Mate'nei tau tenaya callanna lalang tallasa'na siagang mannurukia ri hukkunNa Batara.

PAMMUJI 146:9

Najagai tau battu-battua; Natulungi sikamma jandaya siagang ana' kukanga, mingka napassalasai rancanana tau ja'dalaka.

PAMMUJI 68:5

Makkelongko mae ri Allata'ala, pujimi arenNa, pasadiai agang lompoa labattua a'dongko' rammang. ArenNa Batara, assannang-sannang mako ri dallekanNa!

YESAYA 1:23

Sikamma pamimpinnu angngewami mae ri Nakke siagang assikongkolo'mi palukka'; nangai ke'nanga annarima hadia siagang doe' pammuccu'. Taerokai ke'nanga angngalleangangi ana' kukanga ri pangadelanga; taerokai ke'nanga ampilangngeri tuntutanna sikamma janda-jandaya.

MATIUS 12:32

Punna nia' tau ambali-bali Ana' Ma'rupataua, akkulleji nipammopporang; mingka punna nahinai Rohna Allata'ala, takkulleami nipammopporang ri kamma-kammaya anne kammayatompa ri ahera' sallang!”

MATIUS 5:8

Mate'nei tau lambusu' pa'maika; nasaba' iami langngassengi Allata'ala!

LUKAS 1:6

Ningai ri Allata'ala katallassang pakkalabinianna ke'nanga. Nasaba' tutui ke'nanga anturuki ero'Na Allata'ala siagang sikamma atorang Napassareanga Allata'ala.

ROMA 12:2

Teako amminawangngi ri atorang-atoranna anne linoa. Boli'mi kamma na Allata'ala ampa'jari berui sipa'-sipa' niaka ri kalennu, sollannu akkulle tappinra. Lanri kammanapi anjo nampa akkulle nuasseng apa Nakaerokanga Allata'ala – iamintu apa nikanaya baji', siagang sukkuka ganna'na, kammayatompa nikarannuanga ri atinNa Allata'ala.

ROMA 2:13

Nasaba' teai lanri naassennamo taua hukkung agamana tu Yahudia nampa akkulle assibajiki ammotere' siagang Allata'ala; passangalinna lanri nagaukannamo anjo apa-apa tattulisika lalang ri anjo hukkung-hukkunga.

GALATIA 1:4

Napassareammi KalenNa Almasi a'jari koro'bang untu' dosa-dosata, lanri Naturukinna ero'Na Allata'ala Manggeta. Sollanta akkulle nipasalama' battu ri anne jammang kaja'dallanga.

GALATIA 3:11

Tenanniakka manna sitau akkulle assibajiki siagang Allata'ala, lanri nagaukanna hukkung-hukkung agamaya. Anjo kammaya le'ba'mi nipau lalang ri Kittaka angkanaya, “Tau tappakaji bawang mae ri Allata'ala akkulle a'jari baji' ammotere' passisambunganna siagang Allata'ala; iami lakkulle anggappai katallassanga!”

GALATIA 5:6

Nasaba' punna asse'remi tallasatta siagang Almasi, tenamo naparallu anjo nikanaya mannuruki yareka tena, mae ri paratorang sunnaka. Ia mami parallu anjo tappaka mae ri Almasi; na anjo tappaka ma'nassai lalang ri pangngamaseanta mae ri paranta tau.

GALATIA 6:14

Mingka inakke tena sikali lakkulle kukalompoang pa'mai', pantaranganna Batarata Isa Almasi, le'baka mate nisalli'. Nasaba' lanri le'ba'Namo mate ri kayu sallika, natenamo anggaranna anne linoa mae ri nakke. Na inakke sanrapamma' tau mateamo mae ri anne linoa.

EFESUS 2:2

Anjo wattua nupinawangi kabiasanna ngaseng anne linoa; battuanna nuturuki ero' kakoasanna linoa; iamintu roh niaka angkoasai atinna sikontu tau tenaya namminawang turu' mae ri Allata'ala.

PAOLE 14:29

Anjo kanre-kanreanga untu' tu Lewi, lanri tenana buttana ke'nanga, kammayatompa untu' tubattu-battua, untu' ana'-ana' kukanga, siagang untu' sikamma janda niaka ammantang ri kota-kotanu. Akkullei ke'nanga battu angngallei sikamma apa naparalluanga ke'nanga. Punna nugaukang anjo kammaya, laNabarakkaki Karaeng Allata'alanu sikontu usahanu.”

1 TIMOTIUS 1:5

Ia ero'na pappakaingakku, iamintu sollanna akkulle a'jari tulusu' siagang matangkasa' pa'mai'na taua, kammayatompa a'jari matappa' tojeng-tojeng mae ri Batara, sollanna akkulle nakamaseang paranna tau.

1 TIMOTIUS 5:4

Mingka punna janda nia' ana'-ana'na yareka cucu-cucunna, iaminjo ana'-ana'na yareka cucu-cucunna parallu todong nipakainga' sollanna nau'rangi ke'nanga bijanna, siagang nabalasa' pa'mai' baji'na tau toana yareka nene'na ke'nanga. Nasaba' iaminjo kammaya ampakarannui atinNa Allata'ala.

TITUS 2:12

Anjo lammoro' pangngamaseanNa Allata'ala eroki angngajarakki' sollanna tenamo nasisala katallassanta siagang ero'Na Allata'ala, siagang tenamo naniturukiang kaerokanna pakkalinoanga. Niajarakki' sollanta niasseng ampakalewai kalenta, lambusu' siagang anynyomba mae ri Allata'ala lalang ri katallassanta.

YAKOBUS 3:17

Mingka inai ampatangi kacara'dekang battu ratea ri suruga, iami maci'nong, nangai assiamaka, sombereki, siagang mappilangngeri. Iami sanna' jaina pangngamaseanna siagang a'nyatami panggaukang-panggaukang baji'na. Tena nabattala' siali, siagang tena nangai assara-sarai.

YAKOBUS 3:9

Akkullei nipake untu' appala' sukkuru' mae ri Batara siagang Manggeta; mingka akkulle tongi nipake untu' ampakkanai paranta tau, le'baka Napa'jari Allata'ala situru' rupanNa.

YAKOBUS 4:4

Teai ngasengko tau majarre'! Maka nuassengi angkanaya punna agangko mae ri linoa, a'jari musuko mae ri Allata'ala? Jari inai-nai ero' a'jari agang mae ri anne linoa, napa'jarimi kalenna musu mae ri Allata'ala.

2 PETRUS 1:4

Kammami anjo caraNa Allata'ala ampa'lammorangi barakka'-barakka' sannaka heba'na siagang sannaka lompona anggaranna mae ri katte, ia le'baka Napa'janjiang. Lanri iami anjo barakka'-barakkaka nakiakkullemo ta'lappasa' battu ri sikamma kaerokang ja'dalaka, akkullea angngerangi anne linoa mae ri possoka; sollanna nukkulle todong anggappa bageang lalang ri sipa' kakaraenganna.

2 PETRUS 2:20

Punna ta'lappasa'mo taua battu ri kakoasanna lino anra'massiai rupataua, lanri tappa'namo mae ri Batara siagang Mappasalamatta Isa Almasi, nampa nijarro' poleang sa'genna nibeta ri anjo kakoasanga, kajarianna lapila' panra'mi anjo taua na rioloangannaya.

2 PETRUS 3:14

Lanri kammana, sikamma sari'battangku sannaka kukarimangnginna; ilalang nutayanna anjo Allo labattua, attojeng-tojengko usaha untu' a'jari tangkasa' siagang tena callannu lalang ri katallassannu ri dallekanNa Allata'ala. Siagang katutui bajiki passisambungannu siagang Allata'ala.

1 YOHANES 5:18

Niassengi angkanaya sikontu tau a'jariamo ana'-ana'Na Allata'ala, tenamo natuli a'gau' dosa ija; nasaba' nijagai ri Ana'Na Allata'ala siagang takkulleami I Ja'dala' a'gau' apa-apa mae ri ia.