ROMA 8:17 - KITTA' MATANGKASA'

¹⁷ Jari punna a'jari maki' ana'-ana'Na, ma'nassa a'jari tommaki' warisi'Na, lantarimayai sikamma barakka' le'baka Napasadia Allata'ala untu' ana'-ana'Na. Lannarimaki' siagang Isa apa le'baka Napasadia Allata'ala untu' Isa; nasaba' punna sikapa'risangki' siagang Almasi, lasiagang tommaki' Almasi nipakala'biri'.

ROMA 8:17 ပူးပေါင်းရင်းမြစ်များ

MATIUS 16:24

Nampa Nakana Isa mae ri ana'-ana' gurunNa, “Tau eroka amminawang ri Nakke takkulleai tanapariboko kaparalluang kalenna, nanapisang salli'na, nampa amminawang tuli ri Nakke.

MATIUS 25:21

Nakanamo anjo karaenga, ‘Baji' sikalimi! Ikau palayang bajikko siagang tutuko. Lanri akkulleko nipatappa' ri apa-apa sike'deka, lakupirannuangiko pole apa-apa jaianganga. Antama' mako nakisiagang assannang-sannang!’

LUKAS 12:32

“Ikau tau sike'deka, teako mallakki! Nasaba' sannangi pa'mai'Na Allata'ala assareko barakka' battu ri PamarentahanNa.

LUKAS 24:26

Sai musti Nakasiaki rolong Karaeng Mappasalamaka anjo passessaya, nampa anrapi' ri kala'biranNa?”

YOHANES 17:24

Bapa', erokKa' angkanaya sikamma anjo tau Kipassareanga ri Nakke, lassiagang ngasengA' anjoreng ri tampa' Kupammantangia, sollanna akkulle nacini' ke'nanga kala'birangKu. Iamintu kala'birang Kipassareanga mae ri Nakke, lanri Kikamaseang memamMa' ri tenanapa nanipa'jari anne linoa.

LAMPA-LAMPANA 14:22

Napakajarre'mi atinna sikamma tau tappaka ri Isa ri anjo kota-kotaya. Napakainga'mi ke'nanga, sollanna tuli jarre' tappa'na mae ri Isa. “Musti jai rolong pa'risi' nikasia', nampa akkulle nikasia' mate'nea lalang ri Lino BeruNa Allata'ala,” kammami anjo napangngajarrang tunisuroNa Allata'ala mae ri sikamma tau tappakamo mae ri Isa, ri anjo kota-kotaya.

LAMPA-LAMPANA 20:32

Kamma-kamma anne kupassareang mako mae ri Allata'ala, naporo Iami amparakai ngasengko, siagang nuporo anna'gala' jarre' ngaseng mae ri anjo kabara' pangngamaseanNa Allata'ala. Koasai Allata'ala ampakajarrekko siagang assareko barakka'-barakka'Na, le'baka Napasadia untu' sikontu umma'Na.

LAMPA-LAMPANA 26:18

untu' ansungkeangi matanna ke'nanga, sollanna akkulle assulu' ke'nanga battu ri sassanga nampa antama' ri singaraka; sollanna ta'lappasa' ke'nanga battu ri pangngajara' salana Billisika, nampa nikoasai ke'nanga ri Allata'ala. Na lanri tappa'na ke'nanga mae ri Nakke, naKupammopporammo dosa-dosana siagang la'jarimi ke'nanga umma'Na Allata'ala nipilea.’ ”

ROMA 5:17

Passabakkang se're tau doraka, na'la'bammo kamateanga tete ri anjo tau se'rea. Mingka la'biangampa lompona barakka'na mae ri rupataua passabakkang se'rea tau maraengannaya, iamintu Isa Almasi. LaNapa'la'bang bawang-bawangi pangngamaseanNa Allata'ala mae ri ke'nanga sa'genna akkulle ke'nanga assibajiki ammotere' siagang Allata'ala; lamakoasai ke'nanga ri anne linoa lanri Isa Almasi.

ROMA 8:3

Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le'ba' Nagaukang Allata'ala. Le'ba'mi Nabeta Allata'ala koasana dosaya lalang ri sipa'na rupataua; iamintu lalang Nasurona battu Ana' KalenNa, le'bakamo battu sanrapang rupatau dorakaya, sollanna Natangkasi dosa-dosata.

1 KORINTUS 2:9

Mingka sangkamma apa tattulisika lalang ri Kittaka angkanaya, “Apa tenaya nale'ba' nacini' yareka nalangngere' rupataua, kammayatompa tenaya nale'ba' ammumba lalang ri pikkiranna rupataua, iaminjo Napasadia Allata'ala untu' tau mangngamaseanga ri Ia.”

2 KORINTUS 1:5

Sikamma passessa le'baka antujui Almasi, jai tommi tattuju mae ri kambe. Siagang tete ri KalenNa tommi Almasi nasanna'mo nipakajarre'na pa'mai'na ikambe.

2 KORINTUS 1:7

Tuli jarre'na panrannuanna ikambe tena niranggasela mae ri kau ngaseng, lanri naassenna ikambe angkanaya nukasia' tommi kasukkaranna ikambe. Lanri kammana, lanugappa tommi panjarreki nagappaya ikambe.

GALATIA 3:29

Punna taunnako Almasi, a'jari sossoranna mako Abraham. Siagang lanutarimami apa le'baka Napa'janjiang Allata'ala.

GALATIA 4:7

Jari, teai mako ata, passangalinna ana' mako. Na lanri ana'Na mako Allata'ala, laNasareang ngaseng mako sikontu apa-apa le'baka Napasadia untu' ana'-ana'Na.

EFESUS 3:6

Iaminne anjo rahasiaya: Passabakkang anjo Kabara' Bajika, para anggappami barakka'-barakka'Na Allata'ala bansa maraenga, siagang bansa Yahudia, iamintu barakka'-barakka' le'baka Napasadia Allata'ala; para a'jarimi ke'nanga anggota battu lalang ri tubu sangkammaya, siagang para natarima tommi ke'nanga apa Napa'janjianga Allata'ala tete ri Isa Almasi.

FILIPI 1:29

Nasaba' Nasare mako pangngamaseang Allata'ala teai untu' katappakkang bawang mae ri Almasi, passangalinna untu' angkasia' tongi sessaya lanri Almasi.

FILIPI 3:10

Se're-se'reji bawang kukaerokia, iamintu: sollanna akkulle kuasseng Almasi, siagang akkulle kukasia' todong kakoasang le'baka ampabangungi ammotere' battu ri kamateanga. Ero' tonga' amminawang angkasiaki pa'risika siagang Ia, siagang amminawang todong sangkamma Ia ilalang ri kamateanNa.

KOLOSE 1:24

Kamma-kamma anne sannammi pa'maikku angkasiaki pa'risika untu' kaparalluannu. Nasaba' lanri kapa'risang nakasiaka tubuku, kupa'ganna'mi kasessang mustia Nakasia' Almasi untu' jama'aNa, iamintu tubuNa.

TITUS 3:7

sollanna lanri lammoro' pangngamaseanNa Isa nakiakkullemo assibajiki ammotere' siagang Allata'ala kammayatompa nakigappamo katallassang sitojennaya siagang katallassang mannannungang niminasaia.

IBRANI 1:14

Jari punna kamma, apai sikontutojenna anjo malaeka'-malaekaka? Anjo ke'nanga, iamintu roh-roh allayaniai Allata'ala, siagang nisuroa ri Allata'ala antulungi sikontu tau lannarimaya kasalamakkang.

IBRANI 1:2

Mingka anne ri kala'busang jammanga, a'bicarami mae ri katte tete ri Ana'Na. Tete ri Iami anne Ana'Na naNapa'nia' sikontu linoa siagang bonena. Siagang Napattantumi Allata'ala angkanaya Ia tommi anne Ana'Na siratang angkammai sikontu apa-apa niaka.

IBRANI 6:17

Eroki Napakajarre' janjinNa Allata'ala mae ri sikamma tau Najanjia angkanaya talaNapinrayai janjinNa. Iaminjo saba'na naNapirurungi sumpa anjo janjinNa.

YAKOBUS 2:5

U'rangi sikamma sari'battangku, sannaka kukarimangnginna! Ia tau nicini' kasi-asia ri anne linoa, iami nipilei ri Allata'ala untu' a'jari tu kalumanynyang lalang ri katappakkanga. Iaminjo tau kammaya la'jari Umma'Na Allata'ala situru' Napa'janjianga Allata'ala mae ri sikamma tau angkamaseangai.

1 PETRUS 1:4

Manrannuangki' untu' langgappai barakka'-barakka' Nabolika ri suruga, sa'genna takkullea panra' yareka a'jari botto', yareka a'jari a'langnge.

1 PETRUS 4:13

Ba'lalo, parallui a'jari sannang pakkasia'nu lanri amminawannu todong angkasiaki sessaya siagang Almasi. Jari sallang, punna nipa'nyatamo kala'biranNa Almasi, larannu mako.

PAPPICINI' 21:7

Tau ammetaya lanatarima ngasengi yangasenna anjo battu ri Nakke. INakke la'jari Allata'alana siagang ia la'jari anakKu.

PAPPICINI' 3:21

Ia ammetaya, laKupa'biangi ammempo ri empoang kala'birangKu siagang sipammempoangA' sangkamma Kalengku le'bakamo ammeta siagang kamma-kamma anne siagang ManggeKu ri empoang kala'biranNa.