ROMA 6:23 - KITTA' MATANGKASA'

²³ Nasaba' pahalana dosaya iamintu kamateanga; mingka pangngamaseang Napassareang bawang-bawanga Allata'ala, iamintu katallassang sitojennaya siagang katallassang satunggu-tunggua lalang ri Isa Almasi, Batarata.

ROMA 6:23 ပူးပေါင်းရင်းမြစ်များ

PA'JARIANG 2:17

pantaranganna anjo poko' assarea pangngassengang ri passala'na bajika siagang kodia. Takkulleai nukanre rapponna anjo poko' kayua; napunna nukanrei tena tamatenu ia memang anjo allo nukanrena.”

PA'JARIANG 3:19

Laballasakko anjama siagang lammattiki songo'nu nanampa nia' wassele'na anne buttaya, sa'gennu ammotere' poleang a'jari butta, nasaba' battu ri buttayako nipare'. Battu ri buttayako nipare', na nulammotere' a'jari butta.”

PANGNGEBARANG 11:19

Inai talanrea a'gau' baji', lamate'nei tallasa'na; inai ero' dudu a'gau' ja'dala' lamangei ri kamateang.

YESAYA 3:11

Mingka cilakai tau ja'dalaka! Lanihukkungi ke'nanga kamma nigaukanga mae ri tau maraenga.

YESAYA 3:9

Sipa' borrona ke'nanga ampa'nassai kaja'dallanna ke'nanga. A'nassa-nassai ke'nanga doraka sangkamma tu Sodom riolo. Cilakami ke'nanga! Kalenna tonji ke'nanga ampabattui cilakaya mae ri kalenna.

YEHEZKIEL 18:20

Inai tau doraka iami lamate. Anjo anaka tena namusti natanggongi dosana manggena; kabalekanna, manggena tena todong namusti natanggongi dosa-dosana ana'na. Tau bajika langgappai pahala baji' lanri panggaukang baji'na. Na tau ja'dalaka lanakasiaki sessaya lanri panggaukang ja'dala'na.

YEHEZKIEL 18:4

Nyawana tunggala' taua iNakke pata, baji' nanyawana tau toana kammayatompa nyawana ana'na. Tau dorakaya, lamatei.

MATIUS 25:46

Jari lanihukkung ngaseng minjo taua sa'genna satunggu-tungguna. Mingka tau anggaukangai ero'Na Allata'ala, lanakasia'mi katallassang sitojennaya siagang mannannunganga.”

YOHANES 10:28

Kusarei ke'nanga katallassang satunggu-tunggua, natena nalapanra' ke'nanga sa'genna satunggu-tungguna. Tena manna sitau akkulle angngalle passai ke'nanga battu ri limangKu.

YOHANES 17:2

Le'ba'mi Kipassareang mae ri AnatTa koasaya irateanna sikontu rupataua, sollanna akkulle Nasare katallassang mannannungang sikamma tau Kikellaia nisare.

YOHANES 3:36

Inai-nai ampatappaki anjo Anaka, iami langgappai katallassang satunggu-tunggua. Mingka inai-nai tamannurukia ri anjo Anaka, talanagappayai katallassanga. Iami lanihukkung ri Allata'ala sa'genna satunggu-tungguna.

YOHANES 4:14

Mingka inai-nai angnginungi je'ne' Kupassareanga, tenamo nalaturere sa'genna satunggu-tungguna. Nasaba' anjo je'ne' laKupassareanga la'jarimi timbuseng je'ne' lalang ri kalenna, tassolonga assulu' na napassareang katallassang satunggu-tunggua.”

YOHANES 4:36

Appakkaramulami natarima gajina tau akkattoa siagang appasse're wassele' untu' katallassang satunggu-tunggua. Jari tau appakioroka siagang tau akkattoa akkullei sipa'rannu-rannuang.

YOHANES 5:24

Ma'nassa kontutojengi anne kana-kanangKu: Inai-nai amparhatikangi kana-kanangKu, siagang tappaki mae ri Ia assuroA' battu, ma'nassa nagappami katallassang mannannunganga. Tenamo nalanihukkung; ta'lappasa'mi battu ri kamateanga nanagappa katallassanga.

YOHANES 6:27

Teako naporo untu' kanre lala'busuka siagang labottokaji bawang nanuanjama-jama. Anjamako untu' kanre tenaya nakkulle botto' siagang akkullea assare katallassang mannannungang. Iaminjo kanre kammaya laNasareangko Ana' Ma'rupataua, nasaba' Iami le'ba' Nalanti' Allata'ala Manggea.”

YOHANES 6:40

Memang, iaminne Nakaerokanga ManggeKu: Sikamma tau ancinikai Anaka na tappa' ri Ia, nagappami katallassang satunggu-tunggua, siagang laKupattallasa' poleangi sallang ri Allo Kiamaka.”

YOHANES 6:68

Nakanamo Simon Petrus ri Ia, “O Batara, inaimi lanamangei ikambe? Kana-kananTa assarei katallassang mannannungang.

ROMA 1:32

Naassenji ke'nanga angkanaya siratangi nihukkung mate situru' hukkunNa Allata'ala tau a'gau' kammaya ngaseng anjo. Mingka manna nakamma nagaukang tonji ke'nanga panggaukang-panggaukang kammaya; ba'lalo nasitujui tongi ke'nanga a'gau' kamma todong tau maraenga.

ROMA 2:7

Nasarei Allata'ala katallassang sitojennaya siagang mannannunganga tau jarreka anggaukangi kabajikanga, sollanna nagappa katallassang mala'birika, katallassang malompoa siagang satunggu-tunggua.

ROMA 5:12

Lanri se're tau nantama'mo dosaya ri lino, siagang battu ri iaminjo dosaya ammumba kamateanga. Iaminjo na'la'bammo kamateanga mae ri sikontu rupataua, nasaba' doraka ngasemmi rupataua.

ROMA 5:17

Passabakkang se're tau doraka, na'la'bammo kamateanga tete ri anjo tau se'rea. Mingka la'biangampa lompona barakka'na mae ri rupataua passabakkang se'rea tau maraengannaya, iamintu Isa Almasi. LaNapa'la'bang bawang-bawangi pangngamaseanNa Allata'ala mae ri ke'nanga sa'genna akkulle ke'nanga assibajiki ammotere' siagang Allata'ala; lamakoasai ke'nanga ri anne linoa lanri Isa Almasi.

ROMA 5:21

Jari sangkamma angkanaya musti mateki' passabakkang nigaukanna dosaya, sangkamma tomminjo Nasare maki' oloang Allata'ala sollanta assibajiki ammotere' siagang Ia, lanri mangngamaseanNa mae ri katte. Na lanri baji'mi ammotere' passisambunganta siagang Allata'ala, laNasare tommaki' katallassang mannannungang tete ri Isa Almasi, Batarata.

ROMA 6:16

Maka nuassenji angkanaya punna nupassareang kalennu mae ri se'reang tau nanugaukang apa ero'na, sikontutojenna napa'jari ata mako anjo tau nuturukia ero'na? Akkulleko a'jari ata mae ri apa langngeranga mae ri kamateanga, yareka a'jari ata mannurukia mae ri Allata'ala nalanri kammana assibajiki mako ammotere' siagang Allata'ala.

ROMA 6:21

Anjo wattua apa passawallang nugappa ri anjo panggaukang appakasirika? Poro kamateang bawang naerang anjo panggaukang-panggaukang kammaya!

ROMA 8:13

Nasaba' punna niturukiang ero'na sipa'-sipa' rupataua ma'nassa lamateko; mingka punna lanri koasaNa RohNa Allata'ala natuli nupamate panggaukang-panggaukang dosanu, ma'nassa lattallasakko.

ROMA 8:38

Nasaba' tappa' sikalia' angkanaya ri sikontu linoa, baji' nakamateang yareka katallassang, baji' namalaeka' yareka tu makoasaya, baji' tuntutang ri kamma-kammaya anne yareka tuntutang labattua sallang, yareka kakoasang maraengannaya;

ROMA 8:39

baji' naapa-apa niaka ri langika yareka naapa-apa niaka ri buttaya, yareka apa-apa mamo maraengannaya, yangasenna anjo takkulleai ampisangkai Allata'ala angkamaseangki', sangkamma le'bakamo Napappicinikang lalang ri KalenNa Isa Almasi, Batarata.

ROMA 8:6

Punna nikoasai pikkirannu ri sipa'-sipa' ma'rupataua, kale'bakkanna lanugappai kamateanga. Mingka punna nikoasai pikkirannu ri RohNa Allata'ala, kale'bakkanna lanugappai katallassanga siagang passiamakkanga siagang Allata'ala.

GALATIA 3:10

Sikamma tau tanjenga mae ri hukkung-hukkung agamaya, laniparawa ngasengi ri pangngalarroiNa Allata'ala. Nasaba' nia' tattulisi' lalang ri Kittaka angkanaya, “Inai-nai tena najarre' anggaukangi apa-apa tattulisika lalang ri Kitta' Hukkung Agamaya, langgappai pangngalarroi battu ri Allata'ala!”

TITUS 1:2

situru' panrannuanga mae ri katallassang sitojennaya siagang mannannunganga. Le'ba'mi Napa'janjiang Allata'ala anjo katallassanga ri wattu tenanapa nanipa'jari anne linoa; natena olona la'balle-balle Allata'ala.

YAKOBUS 1:15

Nampa, punna naturukimo anjo kaerokang ja'dala'na, iaminjo allassukang dosa; napunna jarre'mo anjo dosaya, iaminjo angngerang kamateang.

1 YOHANES 2:25

Na iaminne Napa'janjianga KalenNa Almasi mae ri katte: Katallassang sitojennaya siagang mannannunganga.

PAPPICINI' 21:8

Mingka tau balloranga, tau a'bali' ballanga, tau bambalaka pabuno-bunoa, tau pagau' bawanga, tau ammakea pangngissengang siagang baca-baca, tau anynyombaya barhala, kammayatompa sikontu tau paballe-ballea, lanipelaki antama' ri tamparang pepeka siagang bara a'rinra-rinraya, iamintu kamateang makaruaya.”