ROMA 5:15 - KITTA' MATANGKASA'

¹⁵ Mingka tena nasangkamma anjo tau ruaya; nasaba' lompoangangi passareNa Allata'ala punna nipasiukkuruki siagang dosa nagaukanga Adam. Passabakkang se're tau sala najaimo tau mate. Mingka la'biangampa lompona pangngamaseanNa Allata'ala siagang hadia kasalamakkang Napassareanga mae ri sannaka jaina tau tete ri baji' pa'mai'na se'rea tau iamintu Isa Almasi.

ROMA 5:15 ပူးပေါင်းရင်းမြစ်များ

YESAYA 53:11

Lanri kammana anjo Nakana Batara, “Punna le'baki sessa napakamma nipa'risi, lamate'nei siagang lasukku' baji'mi pakkasia'na. Anjo atangKu, napakasannangi atingKu, le'ba'mi natanggongi hukkunganna tau jaia; lanri ia naKupammopporang ke'nanga.

DANIEL 12:2

Jai ri ke'nanga mateamo lattallasa' poleangi; sipa'gang lanakasiaki katallassang mannannunganga na sipa'gang pole lanakasiaki tunaya siagang kapa'risanga sa'genna todong satunggu-tungguna.

MATIUS 20:28

Sangkamma minjo Ana' Ma'rupataua; niaki battu teai sollanna nanilayani, passangalinna sollanna na'jari palayang. NaNapassareang nyawaNa, sollanna nakkulle Napasalama' tau jaia.”

MATIUS 26:28

Nasaba' iaminne cerakKu, ampakajarrekai janjinNa Allata'ala – cera' nipasolonga, sollanna akkulle nipammopporang sikontu dosana tau jaia.

YOHANES 3:16

Nasaba' lanri Nakamaseang duduna Allata'ala rupataua ri lino, sa'genna Napassareammo Ana' sitau-tauNa, sollanna inai-nai tappa' ri Ia tena nalapanra', passangalinna lanagappai katallassang sitojennaya siagang mannannunganga.

YOHANES 4:10

Appialimi Isa Nakana, “Ka'de' nanuasseng passareNa Allata'ala, siagang nanuasseng todong angkana inai appalaka je'ne' ri kau, mattantu ikau kalennu lappala' je'ne ri Ia, na Nasareko je'ne' katallassanga.”

LAMPA-LAMPANA 15:11

Kabalekanna, kamma-kamma anne tappakki', angkanaya iaji nikkulle salama' lanri pangngamaseanNa bawang Batara Isa; kamma le'ba' tommi anjo ke'nanga.”

ROMA 5:12

Lanri se're tau nantama'mo dosaya ri lino, siagang battu ri iaminjo dosaya ammumba kamateanga. Iaminjo na'la'bammo kamateanga mae ri sikontu rupataua, nasaba' doraka ngasemmi rupataua.

ROMA 6:23

Nasaba' pahalana dosaya iamintu kamateanga; mingka pangngamaseang Napassareang bawang-bawanga Allata'ala, iamintu katallassang sitojennaya siagang katallassang satunggu-tunggua lalang ri Isa Almasi, Batarata.

2 KORINTUS 5:14

PangngamaseanNami Almasi makoasa mae ri kambe; nanaassemmo ikambe angkanaya punna matemo tau se'rea untu' kaparalluanna sikontu rupataua, anjo battuanna angkanaya mate ngasemmi sikontu rupataua.

2 KORINTUS 9:15

Paralluki' appala' sukkuru' mae ri Allata'ala, lanri teai sipato' lompona anjo passareNa!

EFESUS 2:8

Nakarimangngiko Allata'ala. Iaminjo Nanapasalamakko, lanri tappa'nu mae ri Isa. Anjo kasalamakkannu, teai wassele' usaha kalennu. Mingka passare malammoro'Na Allata'ala. Jari, tena manna sitau akkulle ampattampo-tampoangi kalenna ri anjo passalaka.

IBRANI 2:9

Mingka punna Isa, nicini'mi makoasa! Nipa'jarimi irawanganna sike'de' malaekaka untu' wattu sinampekang; sollanna akkulle mate untu' sikontu rupataua, lanri baji' pa'mai'Na Allata'ala. Nicini'mi kamma-kamma anne nisare empoang mala'biri' siagang malompo lanri le'ba'namo Nakasia' sessaya sa'genna mate.

1 YOHANES 2:2

Tete ri Ia minjo Isa Almasi nanipammopporang dosa-dosata. Siagang teai dosa-dosataji bawang, passangalinna dosana pole sikontu rupataua.

1 YOHANES 5:11

Iaminne kasa'bianna: Nasare maki' Allata'ala katallassang sitojennaya siagang mannannunganga, siagang Ana'Nami kabattuanna anjo katallassanga.