ROMA 4:2 - KITTA' MATANGKASA'

² Punna lanri apa-apa nagaukanga nakkulle nitarima ri Allata'ala a'jari tau nikarannuang ri atinNa Allata'ala, tantu nia'ja alasanna untu' latinggi pa'mai'. Mingka takkulleai tinggi pa'mai' ri dallekanNa Allata'ala.

ROMA 4:2 ပူးပေါင်းရင်းမြစ်များ

PA'JARIANG 12:18

Jari nakio'mi karaenga Abram nampa nakuta'nang angkana, “Apa anne nugaukang mae ri nakke? Angngapa natena nupauanga' angkanaya bainennu anjo?

PA'JARIANG 12:20

Naparentakammi karaenga mae ri siapa are pagawena, nampa naerang assulu' ke'nanga anjo Abram battu ri anjo pa'rasanganga siagang bainenna kammayatompa sikamma barang-baranna.

YEHEZKIEL 8:9

Nakanamo ri nakke, “Antamakko siagang cinikimi sikamma panggaukang kodi siagang appakaringi' nagaukanga ke'nanga anjoreng.”

ROMA 15:17

Jari, lanri assileo'mi katallassangku siagang Isa Almasi, akkullemi kukalompoang pa'mai' jama-jamangku untu' Allata'ala.

1 KORINTUS 1:29

Sollanna punna kamma anjo, tenamo manna sitau akkulle ampattampo-tampoangi kalenna ri dallekanNa Allata'ala.

1 KORINTUS 1:31

Jari, sangkamma tattulisika lalang ri Kittaka, “Inai-nai ero' ampakalompoi pa'mai'na, musti napakalompoi pa'mai'na lanri apa-apa Nagaukanga Batara.”

1 KORINTUS 4:7

Inaika ampa'jariko malompoangang na tau maraenga? Sai yangaseng-ngasenna sangnging apa-apa nutarimaji battu ri Allata'ala. Jari angngapa nanuero' ampattampo-tampoangi kalennu, sangkamma le'ba' angkana anjo apa-apa niaka ri kau teai apa-apa nutarima?

1 KORINTUS 9:16

Nasaba' takkullea' ampakatinggi pa'maikku punna passabakkang iaja anjo kubirittakanna Kabara' Baji' battua ri Allata'ala; nasaba' Allata'ala assuroa' anggaukangi anjo jama-jamanga. Cilakama' kusa'ring punna tena nakubirittakangi anjo Kabara' Bajika!

2 KORINTUS 11:12

Anne apa kugaukanga ri kamma-kammaya anne, tuli lakugaukangi situlusu'na. Sollanna tena alasanna sikamma “tunisuro” maraenganga ampakalompoi kalenna, angkana anjama tongi sangkamma ikambe.

2 KORINTUS 11:30

Jari, punna nia' apa-apa musti nakalompoang pa'maikku, iaminjo kapa'risangku nakalompoang pa'maikku.

2 KORINTUS 5:12

Mingka teai lanri ero'na ikambe appala' pammuji battu ri kau ngaseng. Passangalinna lanri ero'naji bawang ikambe assareko alasang baji', sollanna lompo pa'mai'nu mae ri kambe; sollannu angngasseng appiali mae ri tau angngalleangangai apa-apa nacinika ri tanja'na taua, na ia sipa'-sipa'na.

GALATIA 3:22

Mingka nia' tattulisi' lalang ri Kittaka angkanaya nikoasai ngasemmi sikontu rupataua ri dosaya. Lanri kammana, anjo passare nipa'janjianga nipassareangi mae ri tau tappaka, lanri tappa'na ke'nanga mae ri Isa Almasi.

FILIPI 3:9

siagang nakuakkulle asse're tojeng-tojeng siagang Ia. Teaimi kalengku angngusahai passisambungang bajikku siagang Allata'ala, iamintu lanri kuturukinna hukkung agamaya. Kamma-kamma anne a'jari baji'mi passisambungangku siagang Allata'ala, lanri tappaka' mae ri Almasi. Jari battu ri KalenNa Allata'ala anjo passisambungang bajika, siagang lanri katappakkang mae ri Isa Almasi.

YOSUA 24:2

Nampa nakana Yosua mae ri ke'nanga, “Pilangngeri anne kananNa Batara, Allata'alana Israel mae ri kau, angkanaya, ‘Riolo dudu, boe-boenu anjorengi ammantang ri ba'leanna Binanga Efrat, siagang anynyombai ri rewata-rewataya. Kalase'renna battu ri ke'nanga iamintu Terah, manggena Abraham siagang Nahor.