ROMA 4:15 - KITTA' MATANGKASA'

¹⁵ Anjo hukkung-hukkung agama Yahudia appabattu tongi hukkungang battu ri Allata'ala. Mingka ka'de' tenai anjo hukkung-hukkunga, tena tommi panggaukang andakkaiyai anjo hukkung-hukkunga.

ROMA 4:15 ပူးပေါင်းရင်းမြစ်များ

2 KARAENG-KARAENG 22:13

“A'lampako mange akkuta'nang ri Batara untu' inakke siagang untu' sikontu ra'ya' Yehuda ri passala'na anne kittaka. Larroi Batara mae ri katte lanri tenana nagaukangi boe-boeta parenta-parenta niaka tattulisi' lalang ri anne kittaka.”

YEREMIA 4:8

Lanri kammana, angngarru' siagang appiraung mako, ammake mako kaeng karung tanra susanu. Lanri a'rinra-rinrana larroNa Batara tenapa nammono' battu ri Yehuda.

PIRAUNG 2:22

Kikioki musu-musu nakamallakkanga ikambe untu' assua'-suara' ja'dala' ri tammulilina ikambe. Nabuno kabusuki ke'nanga sikontu le'baka naparakai siagang nasayanga ikambe. Ri wattu larroTa, tena manna sitau akkulle lari.

YEHEZKIEL 7:19

Bulaenga siagang peraka lanapelaki ke'nanga ri aganga rapang loro, nasaba' ri allo napa'bettese'na kalarroanNa Batara, anjo bulaenga siagang peraka takkulleai ampasalamaki ke'nanga, ba'lalo ia ngasemmi anjo angngerangi ke'nanga mae ri dosaya. Takkulleai napake ke'nanga untu' ampassukkuki cinnana yareka ambonei battanna ke'nanga.

ZEFANYA 1:18

Ri anjo wattu allo hebaka, laNapa'nyatai larroNa Batara, na sikontu bulaenna siagang pera'na ke'nanga takkulleai ampasalamaki kalenna ke'nanga. Sikontu buttaya laancuruki assolong, nitunu ri pepe' kalarroanNa. Ti'ring laNabi'buki sikontu nyawa niaka ri tompo'na anne buttaya.

PAMMILANGNGANG 32:14

Na kamma-kamma anne, angngewa tommako sangkamma bapa'nu ngaseng. Ikau memang pa'rappungannako tau dorakaya, ampakalompoai nassuNa Batara mae ri bansa Israel!

YOHANES 15:22

Ebara' angkana tena naKubattu siagang tenapa naKupabattuang ngaseng anjo sikammaya mae ri ke'nanga, tenaja naladoraka ke'nanga. Mingka kamma-kamma anne tenamo alasanna ke'nanga untu' antongkoki dosana ke'nanga.

YOHANES 3:36

Inai-nai ampatappaki anjo Anaka, iami langgappai katallassang satunggu-tunggua. Mingka inai-nai tamannurukia ri anjo Anaka, talanagappayai katallassanga. Iami lanihukkung ri Allata'ala sa'genna satunggu-tungguna.

ROMA 1:17

Nasaba' iaminjo Kabara' Bajika ampa'nassai angkana antekamma batena a'jari baji' ammotere' passisambunganna rupataua siagang Allata'ala. Carana, iamintu tappaki taua ri Allata'ala battu ri pakaramulanna sa'genna kala'busang. Kammaminjo niaka tattulisi' lalang ri Kittaka angkanaya, “Inai-nai tappa' ri Allata'ala sa'genna a'jari baji'mo ammotere' passisambunganna siagang Allata'ala, iami lattallasa'!”

ROMA 5:13

Ri wattu tenanapa nanipassareangi hukkung-hukkung agama Yahudia, nia' memammi dosaya lalang lino. Mingka tena nanituntuki dosaya, lanri tenapi anjo hukkung akkullea nidakkai.

1 KORINTUS 15:56

Racunna kamateanga, iamintu dosaya, siagang anjo dosaya lalangi ri hukkung agamaya a'boya oloang.

GALATIA 3:10

Sikamma tau tanjenga mae ri hukkung-hukkung agamaya, laniparawa ngasengi ri pangngalarroiNa Allata'ala. Nasaba' nia' tattulisi' lalang ri Kittaka angkanaya, “Inai-nai tena najarre' anggaukangi apa-apa tattulisika lalang ri Kitta' Hukkung Agamaya, langgappai pangngalarroi battu ri Allata'ala!”

GALATIA 3:19

Jari punna kamma, untu' apa padeng nanipassareang anjo hukkung agamaya? Pialinna iamintu angkanaya, anjo hukkunga nipappitambangi sollanna nipa'nassa gau' dosana rupataua. Wattu tappakena anjo hukkung agamaya sa'gennaji kabattuanna sitau sossoranna Abraham le'baka nipau lalang ri janjinNa Allata'ala mae ri Abraham. Anjo hukkung agamaya, malaeka'-malaeka' ampabattui tete ri rupataua.

EFESUS 5:6

Teako erokki nitipu ri bicara-bicara tenaya bonena. Nasaba' ia ngasemmi anne kammaya ampammumbai pangngalarroiNa Allata'ala mae ri tau tenaya namannuruki ri Ia.

KOLOSE 3:6

Yangasennami anjo kammaya ampabattui pangngalarroinNa Allata'ala mae ri tau tenaya namannuruki ri Ia.

1 YOHANES 3:4

Inai-nai anggaukangi dosaya, nadakkaimi hukkunNa Allata'ala, nasaba' nikanaya dosa iamintu nidakkai hukkunNa Allata'ala.

PAPPICINI' 19:15

Battu ri bawaNa nia' assulu' pa'dang tarang; siagang iaminjo pa'danga laNapake ambetai bansa-bansaya, nampa laNaparenta ke'nanga siagang takkang bassi. LaNapaccoki anggoroka lalang ri pammaccokang anggoro' kalarroanNa Allata'ala Kaminang Koasaya.