ROMA 3:28 - KITTA' MATANGKASA'

²⁸ Nasaba' bodona kana kammaminne: Nikanaya tau assibajikimo ammotere' siagang Allata'ala teai lanri nagaukanna apa-apa tattulisika lalang ri hukkung-hukkung agama Yahudia, passangalinna lanri tappa'na ri Isa Almasi.

ROMA 3:28 ပူးပေါင်းရင်းမြစ်များ

YOHANES 5:24

Ma'nassa kontutojengi anne kana-kanangKu: Inai-nai amparhatikangi kana-kanangKu, siagang tappaki mae ri Ia assuroA' battu, ma'nassa nagappami katallassang mannannunganga. Tenamo nalanihukkung; ta'lappasa'mi battu ri kamateanga nanagappa katallassanga.

YOHANES 6:40

Memang, iaminne Nakaerokanga ManggeKu: Sikamma tau ancinikai Anaka na tappa' ri Ia, nagappami katallassang satunggu-tunggua, siagang laKupattallasa' poleangi sallang ri Allo Kiamaka.”

ROMA 3:26

Mingka kamma-kamma anne Natuntu'mi Allata'ala dosa-dosaya, lanri ero'na Napa'butti kaadelanNa. Kammaminjo carana, naNapappicinikammo katojenganNa; na inai-nai tappa' mae ri Isa, Napa'nyatami mae ri anjo taua angkanaya assibajikimi ammotere' siagang Allata'ala.

ROMA 4:5

Mingka nia' tau tena nausaha kalenna napare' panna'gallang; passangalinna napappirannuangi kalenna mae ri Allata'ala, nasaba' Allata'alami allappassangi tau dorakaya battu ri dosa-dosana. Lanri iaminjo tappa'na nanitarimamo anjo taua a'jari tau nikarannuang ri atinNa Allata'ala.

ROMA 5:1

Kamma-kamma anne assibajiki maki' ammotere' siagang Allata'ala, lanri tappa' maki' mae ri Ia. Siagang lanri kammana, attallasa' maki' lalang kasiamakkanga siagang Allata'ala, tete ri Batarata Isa Almasi.

ROMA 8:3

Apa tenaya nakkulle nagaukang hukkung-hukkung agamaya, lanri lammana batangkalenta ikatte rupataua, iaminjo le'ba' Nagaukang Allata'ala. Le'ba'mi Nabeta Allata'ala koasana dosaya lalang ri sipa'na rupataua; iamintu lalang Nasurona battu Ana' KalenNa, le'bakamo battu sanrapang rupatau dorakaya, sollanna Natangkasi dosa-dosata.

1 KORINTUS 6:11

Nia' siapa are jainu appanggaukang kamma anjo riolo. Mingka kamma-kamma anne le'ba' mako nitangkasi battu ri dosa-dosaya, sollannu a'jari umma' matangkasa'Na Allata'ala. Le'ba' mako assibajiki ammotere' siagang Allata'ala lanri tappa'nu mae ri Batara Isa Almasi siagang lanri koasa Roh battu ri Allata'alata.

GALATIA 2:16

Mingka niassengi angkanaya lanri tappa'na taua mae ri Isa Almasi nakkulle assibajiki ammotere' siagang Allata'ala; teai lanri nagaukanna hukkung-hukkung agamaya. Ikambe pole, tappa' tommaki' mae ri Isa Almasi; sollanta akkulle assibajiki ammotere' siagang Allata'ala tete ri anjo matappatta. Jari teai lanri kigaukanna hukkung-hukkung agamaya. Nasaba' tena manna sitau lakkulle assibajiki ammotere' siagang Allata'ala lanri nagaukanna hukkung-hukkung agamaya.

GALATIA 3:24

Jari anjo hukkung agamaya a'jari sanrapangi pajaga mae ri kalenta, sa'genna battu Almasi ampassibajikiki' ammotere' siagang Allata'ala, lanri tappatta mae ri Almasi.

GALATIA 3:8

Le'ba' memammi nipau lalang ri Kittaka angkanaya akkullei assibajiki ammotere' bansa maraenga siagang Allata'ala punna tappa' ke'nanga mae ri Ia. Le'ba'mi nipauang la'bi riolo Abraham anjo Kabara' Bajika ilalang ri janji angkanaya, “Battu ri kaumi nalaNabarakkaki Allata'ala sikontu rupataua ri lino.”

FILIPI 3:9

siagang nakuakkulle asse're tojeng-tojeng siagang Ia. Teaimi kalengku angngusahai passisambungang bajikku siagang Allata'ala, iamintu lanri kuturukinna hukkung agamaya. Kamma-kamma anne a'jari baji'mi passisambungangku siagang Allata'ala, lanri tappaka' mae ri Almasi. Jari battu ri KalenNa Allata'ala anjo passisambungang bajika, siagang lanri katappakkang mae ri Isa Almasi.

TITUS 3:7

sollanna lanri lammoro' pangngamaseanNa Isa nakiakkullemo assibajiki ammotere' siagang Allata'ala kammayatompa nakigappamo katallassang sitojennaya siagang katallassang mannannungang niminasaia.

YAKOBUS 2:18

Gassingka nia' tau angkana, “Nia' tau tanjeng ri tappa'na siagang nia' todong tau tanjeng mae ri panggaukanna.” Lakukanamo ri ia, “Picinikiangsa' antekamma batena akkulle taua nikana tappa' mingka tena na'nyata lalang ri panggaukanna, nampa kupicinikiang todong lalang ri panggaukangku untu' ampa'nyatai angkanaya ma'nassa nia' tappakku.”

YAKOBUS 2:20

Ma'nassa sanna' dongo'nu! Maka paralluko nipa'buttiang angkanaya ma'nassa tena matu-matunna nia' tappatta punna tena na'nyata lalang ri panggaukanta?

YAKOBUS 2:24

Jari singara'mi kamma-kamma anne, angkanaya nanitarima baji' taua ri Allata'ala iamintu lanri panggaukanna anjo taua; jari teai lanri tappa'na bawang.