ROMA 3:2 - KITTA' MATANGKASA'

² Mattantu jai matu-matunna! Lomoro' se're, nasaba' tu Yahudiami Napappirannuangi Allata'ala anjo kana-kananNa.

ROMA 3:2 ပူးပေါင်းရင်းမြစ်များ

PAMMUJI 119:140

Majarreki janjinTa nakkulle nipatappa', sanna' kungaina.

YESAYA 8:20

Appiali mako kamma anne, “Pilangngeri ajaranNa Batara! Tau tenaya na'bicara situru' anjo pangngajaranga, tena panrannuanna.”

YOHANES 5:39

Nupilajari Kittaka lanri nupikkiriki angkanaya kammaminjo carana nanugappa katallassang mannannunganga. Na iaminjo Kittaka a'jari sa'bi ri KalengKu.

LAMPA-LAMPANA 7:38

Musa tommi niaka ri tangnga-tangngana bansa Israel ri parang kassika, a'jaria tetena malaeka' naaganga a'bicara ri Bulu' Sinai siagang boe-boeta. Iami antarimayai battu ri Allata'ala kabara' katallassanga eroka nipabattu mae ri katte.

ROMA 1:2

Anjo Kabara' Bajika le'ba'mi Napa'janjiang Allata'ala ri jammang riolo, Nasuro pabattua ri na'bi-na'bia, siagang le'ba'mi tattulisi' lalang ri Kittaka.

ROMA 2:18

Anggappako pitunju'-pitunju' battu ri anjo hukkung-hukkunga, sa'genna nuasseng sikamma apa Nakaerokia Allata'ala, siagang nuassengi nupattantu angkana kereanga baji'.

ROMA 3:1

Jari punna kamma, apami upa'nu a'jari tu Yahudi? Siagang apami matu-matunnu anturuki anjo atoranna sunnaka?

ROMA 3:3

Mingka antekamma punna nia' sitangnga tu Yahudi tena namajarre'? Maka iaminjo passabakkang nala'jari talajarrekamo Allata'ala?

ROMA 9:4

Ike'nammi umma' nipilea siagang nipa'jaria ana'-ana' KalenNa ri Allata'ala, kammayatompa le'baka angkasiaki kakoasanNa Allata'ala. A'janjimi Allata'ala mae ri ke'nanga, siagang nisaremi ke'nanga hukkung-hukkung agama. Nipauammi ri Allata'ala ke'nanga angkanaya antekamma batena ke'nanga musti anynyomba ri Allata'ala; kammayatompa natarimami ke'nanga janji-janjinNa Allata'ala.

1 KORINTUS 9:17

Ebara' angkana battu ri ero' kalengku nakugaukang anjo jama-jamanga, akkulle memanga' attayang gaji. Mingka iaji nakubirittakang anjo Kabara' Bajika lanri nisuro memang tonga'. Allata'ala assarea' tugasa' anggaukangi anjo jamanga.

2 KORINTUS 5:19

Ia biritta napabattua ikambe iamintu angkanaya Napa'jari assibajikimi Allata'ala rupataua mae ri KalenNa, tete ri Almasi. TaNabilangai sikontu kasalang le'baka nagaukang rupataua mae ri KalenNa. Na ikambemi Nasuro Allata'ala ambirittakangi anjo kabaraka.

GALATIA 2:7

Ba'lalo anjo nicini' tu nipakala'birika namangakuimi angkana Allata'ala assuroa' ambirittakangi anjo Kabara' Bajika mae ri bansa-bansa maraenga. Sangkamma todong Iami assuroi Petrus ambirittakangi anjo Kabara' Bajika mae ri bansa Yahudia.

1 TIMOTIUS 6:20

Timotius! Katutui bajiki anjo apa nipappirannuanga ri kau! Pakabellai kalennu battu ri pa'bicarang tenaya matu-matunna siagang passigea'-geakkang ri apa-apa nikanaya “Pangngissengang”, nampa teaiji pangngissengang.

IBRANI 5:12

Sikontutojenna narapi'mi wattunnu la'jari guru; mingka ma'nassa parallu ijako appilajara' mae ri tau maraenga ri passala'na poko'-poko' pangngajaranNa Allata'ala. Takkullea pako nisare kanre terasa'; parallu ijako angnginung dadi'.

1 PETRUS 4:11

Inai-nai appabattu biritta, musti napabattui biritta battua ri Allata'ala; inai allayani ri paranna tau, musti allayani situru' kagassingang battua ri Allata'ala; sollanna ilalang yangaseng-ngasenna, akkullemi nipakala'biri' Allata'ala tete ri Isa Almasi. Iami Makoasa siagang siratanga nipakala'biri' sa'genna satunggu-tungguna. Aming.

PAPPICINI' 19:10

Nampa su'ju'ma' ri dallekanna anjo malaekaka, ero' anynyomba ri ia; mingka nakanamo ri nakke, “Teako! Teako anynyombai ri nakke, mingka Allata'ala nusomba! Nasaba' inakke ata tonja' sangkamma ikau siagang sikontu sari'battannu anna'gala' jarreka mae ri biritta tojenga, Napabattua Isa!” Nasaba' iaminjo kasa'bianga mae ri Isa assarei taua pangngissengang untu' ampabattui biritta battua ri Allata'ala.

PAPPICINI' 22:6

Nampa nakana anjo malaekaka mae ri nakke, “Sikamma anne bicaraya sangnging bicara kontutojeng siagang akkullei nipatappa'. Karaeng Allata'ala iamintu le'baka ampassareangi RohNa mae ri na'bi-na'bia, iami assuroi malaeka'Na untu' ampappiassengangi mae ri ata-atanNa apa-apa tenayamo nasallo namusti kajariang.”