ROMA 2:27 - KITTA' MATANGKASA'

²⁷ Lanapasalako anjo tu tenaya nisunnaki ikau tu Yahudia. Nasaba' niaki hukkung agama Yahudia ri kau, siagang pole ikau nisunnakko, mingka tena nanuturuki anjo hukkunga. Tena nanisunnaki ke'nanga, mingka iami ke'nanga anturuki hukkung-hukkung agama Yahudia.

ROMA 2:27 ပူးပေါင်းရင်းမြစ်များ

MATIUS 3:15

Mingka appialimi Isa Nakana, “Boli'mi kamma rolong ri kamma-kammaya anne. Nasaba' lanri kammana minjo nanigaukang ngaseng sikamma Nakaerokia Allata'ala.” Jari nije'ne'mi Isa ri Yohanes.

LAMPA-LAMPANA 13:22

Ri wattunna Nalekka' Allata'ala empoanna Saul a'jari karaeng, Naangka'mi pole Allata'ala karaeng maraenga iamintu Daud a'jari karaenna ke'nanga na iaminne kananNa Allata'ala ri passala'na Daud, ‘Kugappami Daud, ana'na Isai, ampakasannangai atingKu. Iami langgaukangi erokKu.’

ROMA 13:10

Inai-nai angkamaseangi paranna tau, tena olona la'gau' ja'dala' ri paranna tau. Jari inai-nai angkamaseangi paranna tau, sangkammami angkanaya nagaukang ngasemmi sikamma apa napassuroanga hukkung agamaya.

ROMA 2:15

Panggaukannami ke'nanga ampa'nassai angkanaya tattulisiki ri atinna ke'nanga anjo apa-apa napassuroanga anjo hukkung-hukkunga. Atinnami pole ke'nanga ampa'nassai anjo passalaka, nasaba' nia' wattunna nanipasala yareka nanipannaba ri pikkirang kalenna todong ke'nanga.

ROMA 2:20

ikaumi gurunna tau bodo pikkiranga, siagang gurunna tau tenayapa nappikkiri' tau toa. Tappakko angkanaya lanri nuassenna anjo hukkung agama Yahudia, jari nia' ngasemmi ri kau sikamma pangngassenganga siagang pangngajarang katojenganga.

ROMA 2:25

Punna nuturuki hukkung-hukkung agama Yahudia, nia' tommo matu-matunnu nisunna'. Mingka punna takkulleako anggaukangi anjo apa-apa nipassuroanga lalang ri anjo hukkung-hukkunga, ma'nassa tena sikalimo matu-matunnu nisunna'.

ROMA 2:26

Punna nia' bansa maraeng tena nanisunnaki, mingka naturuki hukkung-hukkung agama Yahudia, jari maka tena nalaNapasangkamma Allata'ala anjo taua tau le'ba' nisunna'?

ROMA 2:29

Mingka ia nikanaya tu Yahudi tojeng-tojeng iamintu tu Yahudia memang todong lalang ri atinna siagang nyawana; naia nikanaya sunna' tojeng-tojeng iamintu sunna' lalanga ri atia, ia Nagaukanga RohNa Allata'ala; jari tena nalalang ri kittaka nitulisi'. Tau kammaya minjo lannarima pammuji battu ri Allata'ala; jari teai battu ri rupataua.

ROMA 3:30

Nasaba' se'reji Allata'ala. Iami assarei oloang tu Yahudia assibajiki ammotere' siagang Allata'ala, lanri tappa'na ke'nanga. Ia tommi assarei oloang bansa-bansa maraenga assibajiki ammotere' siagang Allata'ala, lanri tappa'na todong ke'nanga.

ROMA 8:4

Kammaminjo Nagaukang Allata'ala, sollanna akkulle nigaukang anjo apa-apa Nakaerokia lalang ri hukkung-hukkung agama Yahudia, lalang ri batangkalenta ikatte tau mannurukia mae ri RohNa Allata'ala, jari teai mannurukia mae ri sipa'-sipa' ma'rupatauta.

1 KORINTUS 7:19

Nasaba' nipinawangi yareka tena anjo paratorang sunnaka, rua-rua tena naparallu. Ia parallua iamintu mannurukia ri sikamma parentaNa Allata'ala.

2 KORINTUS 3:6

Iami assarei pakkulle ikambe a'jari palayang untu' parjanjiang berua; iamintu parjanjiang tatta'galaka ri RohNa Allata'ala, jari teai ri hukkung tattulisika. Nasaba' anjo tattulisika angngerangi kamateang, mingka anjo RohNa Allata'ala angngerangi katallassang.

GALATIA 5:14

Nasaba' anjo sikontu bonena hukkung agamaya le'ba'mi nipakabodo a'jari se're hukkung, iamintu angkanaya, “Parallui nukamaseang parannu tau sangkamma nukamaseanna batangkalennu.”

EFESUS 2:11

Sikamma sari'battang, pantaranganna bansa Yahudia! U'rangi katallassannu wattu riolo; nigallarakko “tau tenaya nassunna'”, ri tu Yahudi nakanaya kalenna assunna' (battuanna anggappami pammatei ri kalenna, nipareka ri rupataua).

2 TIMOTIUS 3:15

Musti nuu'rangi angkanaya battu ri ca'dinu iji nanuassennamo Kittaka. Anjo Kittaka akkulleko nasare pangngassengang untu' anggappai kasalamakkanga tete ri katappakkang mae ri Isa Almasi.

IBRANI 11:3

Lanri tappatta, nanipahammo angkanaya anne linoa nipa'jari battu ri KananNa Allata'ala; jari, apa-apa akkullea nicini', kajariang battu ri apa-apa takkullea nicini'.