ROMA 2:22 - KITTA' MATANGKASA'

²² Nuajaraki taua sollanna tena nassalimara'; mingka kalennu a'gau' bawang! Birisikko mae ri barhalaya; mingka kalennu angngallei barang-barang niaka ri balla' barhalaya.

ROMA 2:22 ပူးပေါင်းရင်းမြစ်များ

PAMMUJI 50:17

Saba' taerokako antarimai pappakaingakKu, siagang nutollaki parenta-parentaKu.

YEREMIA 5:7

Nakana Batara, “Angngapa namusti Kupammopporang dosa-dosana ummakKu? NabokoiMa' ke'nanga siagang anynyombami ke'nanga ri tenaya na Allata'ala. Kusarei ke'nanga kanre sa'genna bassoro', mingka kammaji a'gau' bawanna, siagang masarroi a'lampa ke'nanga mange ri baine pasundalaka.

YEREMIA 9:2

Ka'de' kukkulle anggappa ri parang luara' pa'bangngiang untu' tau lalang pa'jappang! Lakubokoi bansaku, kulari mange anjoreng untu' ampakabellai kalengku battu ri ke'nanga. Tau pabali' ballang ngasengi ke'nanga, passe'reang tau tenaya namajarre' pa'mai'na,

YEHEZKIEL 22:11

bainenna paranna tau, yareka mintunna, yareka andi' aona.

MALEAKHI 1:14

Nitunraimi patipu assarea ri Nakke olo'-olo' tenaya anggaranna, punna nia'ja olo'-olo' maraengannaya bajika le'baka napa'janjiang ri Nakke! Nasaba' iNakke Karaeng Malompo, siagang nipakalompoa ri sikontu bansaya.”

MALEAKHI 1:8

Punna assareko ri Nakke olo'-olo' buta, garringa yareka pesoka, maka teai panggaukang sala anjo kammaya? Coba sai bedeng passareang anjo olo'-olo' kammaya mae ri guburnurka! Maka lasannangi nyawana siagang lanagaukangi kabajikanga mae ri kau?”

MALEAKHI 3:8

Kamma-kamma anne akkuta'nanga' mae ri kau: Maka akkullei rupataua antipui Allata'ala? Tantu tena nakkulle. Mingka kamma tonji annipunu. Akkuta'nangko angkana, ‘Antekamma batena annipu ikambe?’ PialingKu: Lalang a'bayara'nu bage sampulo battu ri panggappannu siagang lalang assarenu passare.

MATIUS 12:39

Appialimi Isa nakana, “Teai sipato' ja'dala'na siagang dorakana taua ri anne jammanga. NusuroA' anggaukangi gau' appakalannasaka? Manna se're tania' lanipicinikiangko gau' appakalannasa' pantaranganna gau' appakalannasa' le'baka kajariang ri kalenna Na'bi Yunus.

MATIUS 16:4

Teai sipato' ja'dala'na siagang dorakana ngaseng taua ri anne jammanga. NusuroA' anggaukangi gau' appakalannasaka. Mingka manna sirupa gau' appakalannasa' tena todong lanipicinikiangko, pantaranganna gau' appakalannasa' le'baka kajariang ri kalenna Na'bi Yunus.” Le'baki akkana kamma Isa, a'lampami ambokoi ke'nanga.

MARKUS 11:17

Nampa Naajara' ngaseng tau niaka anjoreng. Nakana, “Nia' tattulisi' lalang ri Kittaka angkana: Nakana Allata'ala, ‘BallakKu laniarengi tampa' pappala' doangang untu' sikontu bansaya.’ Mingka ikau ngaseng nupa'jari pa'ru'mungang paella'!”

LAMPA-LAMPANA 19:37

Anne taua nuerangi mae anrinni teai passabakkang le'ba'na naalle passa apa-apa niaka ri balla' rewataya, yareka lanri le'ba'na nahina ke'nanga rewatanta.

ROMA 12:9

Angngamaseangko siagang ci'nong pa'mai'. Musti nukabirisi gau' ja'dalaka, siagang anna'gala' jarrekko mae ri apa-apa bajika.

YAKOBUS 4:4

Teai ngasengko tau majarre'! Maka nuassengi angkanaya punna agangko mae ri linoa, a'jari musuko mae ri Allata'ala? Jari inai-nai ero' a'jari agang mae ri anne linoa, napa'jarimi kalenna musu mae ri Allata'ala.