ROMA 2:10 - KITTA' MATANGKASA'

¹⁰ Mingka sikamma tau nangaia a'gau' baji' lanisarei kala'birang, siagang kalompoang kammayatompa katallassang salewangang ri Allata'ala; uru-uruna mae ri tu Yahudia, kammayatompa mae ri bansa-bansa maraenga.

ROMA 2:10 ပူးပေါင်းရင်းမြစ်များ

AYUB 22:21

Jari, Ayub, assiama' mako siagang Batara, sollanna nunggappa kasannangngang. Punna nugaukang kammaya anjo, mattantu anggappako kaupakkang.

PAMMUJI 15:2

Tau tenaya callanna siagang anggaukangi bajika ri tallasa'na, siagang tau lambusuka ampaui tojenga;

PAMMUJI 29:11

Poro nisare lalo kagassingang umma'Na ri Batara, na Napa'jari ke'nanga salewangang.

PAMMUJI 37:37

Parhatikangi tau bajika siagang tau lambusu' pa'maika; tau nangaia assiama' bajiki allo ri bokona.

PANGNGEBARANG 11:18

Kaupakkanna tau ja'dalaka iamintu kaupakkang takontutojeng, kaupakkanna tau a'gau' bajika iami kaupakkang sitojennaya.

PANGNGEBARANG 8:18

Ri nakke sadiai pakkalumanynyangnganga kammayatompa kalompoanga siagang kacopponganga.

YESAYA 26:12

O, Batara, iKatte lampa'jari salewangangi ikambe; sikontu najamaya ikambe, iKattemi anggaukangi untu' ikambe.

YESAYA 32:17

Tunggala' taua lanagaukangi apa annabaya, sa'genna nia' kasalewangang siagang kasannangngang sa'genna satunggu-tungguna.

YESAYA 48:18

Ebara' angkana nuparhatikangi sikamma parentaKu, lasalewangangko rapang binanga tenaya nale'ba' kalotoro', laupakko rapang bombang ri tamparang tenaya nale'ba' ammari-mari.

YESAYA 48:22

Tena kasalamakkang mae ri tau ja'dalaka,” Kammaminjo kananNa Batara.

YESAYA 55:12

Lanubokoi Babel siagang rannu, siagang niantarakko assulu' siagang salama'. Monconga siagang buluka larannui siagang lakkio' rannui, latempa-tempai sikamma poko' kayua ri kokoa.

YESAYA 57:19

LaKusarei kasannangngang sikontu taua, baji' tau ambania kammayatompa tau bellaya. LaKupakabajiki ummakKu.

YEREMIA 33:6

Mingka sallang laKupakabajiki ammotere' anne kotaya siagang pandudu'na; lakassaki ammotere' ke'nanga. LaKusarei ke'nanga kasalewangang siagang kaamangngang alla'bia.

PAMMILANGNGANG 6:26

Dasi-dasi Nanakamaseangko siagang Nasareko passiamakkang Batara.

MATIUS 10:13

Na punna natarimajako anjo taua antama' ri balla'na, boli'mi kamma nammantang anjo barakkaka ri ke'nanga sibatu balla'. Mingka punna tanatarimayako ke'nanga, alle poleammi ammotere' anjo barakkaka.

LUKAS 1:79

kammaminjo na Nasingari sikontu taua niaka lalang ri sassang siagang kamallakkang. Nauluki' mange ri oloang a'lampa mangea ri kabajikanga.”

LUKAS 12:37

Teai sipato' upa'na ngaseng palayang-palayang nirapikanga sadia attayang ri wattunna battu karaenna. Patappa'mi angkanaya: lasadiai anjo karaenga assuroi anjo palayang-palayanga ammempo, nampa nasuro layani kalenna anjo karaenga.

LUKAS 19:42

Lalang angngarru'Na Nakana, “O kodong, baji'na mamo ka'de' nuassemmo anne alloa apa lakkullea angngerang passiamakkang! Mingka kamma-kamma anne takkulleai nucini'.

LUKAS 22:14

Ri wattunna narapi'mo wattunna lanikanre anjo kanre Paskaya, ammempomi Isa siagang ana'-ana' gurunNa ri mejang parjamuanga.

LUKAS 9:48

Nampa Nakana ri ana'-ana' gurunNa, “Inai-nai antarimai anne anaka passabakkang iNakke, battuanna iNakkemi natarima. Na inai-nai antarimA', battuanna natarima tommi Allata'ala assuroA' battu. Nasaba' inai-nai kaminang tuna ri kau, iami kaminang la'biri'!”

YOHANES 12:26

Inai-nai ero' a'jari palayang mae ri Nakke, musti amminawangi ri Nakke; sollanna kemae-kemae pammantangangKu akkulle tongi nia' palayangKu anrurungangA'. Inai-nai a'jari palayang ri Nakke, iami lanipakala'biri' ri ManggeKu.”

YOHANES 14:27

Kubolikang mako kasalewangang. Kasalewangang battua ri KalengKu Kupassareang mae ri kau. Na anjo apa Kupassareanga mae ri kau, tasangkammayai apa napassareanga linoa mae ri kau. Teako lussaki pa'mai'nu, siagang teako mallakki.

YOHANES 16:33

Kupau ngasengi anne mae ri kau, sollannu anggappa salewangang lanri asse're ngasengko siagang iNakke. Lasessako lalang ri linoa. Mingka jarreki pa'mai'nu! Le'ba'mi Kubeta anne linoa!”

LAMPA-LAMPANA 10:35

Inai-nai malla' ri Allata'ala siagang anggaukangi kabajikanga, iami nitarima ri Allata'ala, manna pole bansa apa.

ROMA 14:17

Nasaba' punna lalang ri pamarentahanNa Allata'ala, tena naparallu nikanaya apa-apa akkullea nikanre yareka apa-apa akkullea niinung. Mingka ia parallua iamintu angkanaya mannuruki rupataua ri ero'Na Allata'ala, nakasiaki nikanaya salewangang ri pa'maika, kammayatompa karannuang Napassareanga RohNa Allata'ala.

ROMA 15:13

Allata'alami tampa' panrannuannu. Poro Nabonei pa'mai'nu sikontu karannuang siagang salewangang, lanri tappa'nu mae ri Ia, sollanna lanri koasa RohNa Allata'ala nanupila' manrannuang mae ri Allata'ala.

ROMA 2:7

Nasarei Allata'ala katallassang sitojennaya siagang mannannunganga tau jarreka anggaukangi kabajikanga, sollanna nagappa katallassang mala'birika, katallassang malompoa siagang satunggu-tunggua.

ROMA 2:9

Sikamma tau nangaia a'gau' ja'dala', iami lapanra' siagang lasessa; uru-uruna tu Yahudia, nampa pole bansa-bansa maraenga.

ROMA 5:1

Kamma-kamma anne assibajiki maki' ammotere' siagang Allata'ala, lanri tappa' maki' mae ri Ia. Siagang lanri kammana, attallasa' maki' lalang kasiamakkanga siagang Allata'ala, tete ri Batarata Isa Almasi.

ROMA 8:6

Punna nikoasai pikkirannu ri sipa'-sipa' ma'rupataua, kale'bakkanna lanugappai kamateanga. Mingka punna nikoasai pikkirannu ri RohNa Allata'ala, kale'bakkanna lanugappai katallassanga siagang passiamakkanga siagang Allata'ala.

ROMA 9:21

Sai ero'-ero'na todong anjo taua antekamma tanja'na anjo pammantangang bungaya napareka? Battu ri sikangkang butta pi' anjo taua akkullei napare' ruang rupa anjo pammantangang bungaya: se're baji', namaraenganga tena nabaji' dudu.

ROMA 9:23

Mingka ero' tongi ampappicinikangi mae ri katte kate'neang masukkuka, ia Napassareanga mae ri katte tau Nakamaseanga. Kamma-kamma anne Napasadia maki' untu' antarimai anjo kate'neanga.

GALATIA 5:22

Mingka, punna nipimping ri RohNa Allata'ala taua, iaminne wassele'na: sikamaseangi ke'nanga, rannui, assiamaki, sa'baraki siagang lammoro' pa'maiki, bajiki ri paranna tau, majarreki,

GALATIA 5:6

Nasaba' punna asse'remi tallasatta siagang Almasi, tenamo naparallu anjo nikanaya mannuruki yareka tena, mae ri paratorang sunnaka. Ia mami parallu anjo tappaka mae ri Almasi; na anjo tappaka ma'nassai lalang ri pangngamaseanta mae ri paranta tau.

FILIPI 4:7

Na Iaminjo Allata'ala takkullea napahang akkala'na rupataua, lassareko katallassang salewangang; siagang langkatutui nyawanu siagang pikkirannu le'bakamo asse're siagang Isa Almasi.

1 TIMOTIUS 1:17

Siratangi nipakalompo siagang tuli nipuji Allata'ala, Karaenna sikontu jammanga, lanri Iami mannannungang, tenaya nakacinikang siagang tenaya ruanna! Aming.

IBRANI 2:7

Untu' wattu sinampekang Kipa'jarimi irawanganna sike'de' malaekaka; Kisarei empoang mala'biri' siagang malompo,

YAKOBUS 2:22

Anrinni a'nassami angkanaya anjo katappakkanga musti nipa'nyatai lalang ri panggaukanga sollanna a'jari sukku'.

YAKOBUS 3:13

Punna nia' tau cara'de' siagang baji' ateka' ri tangnga-tangnganu, parallui napappicinikang katallassang bajika, nagaukangi apa-apa bajika, kammayatompa cara'deki na tuna pa'mai' ri katallassanna.

1 PETRUS 1:7

Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi.

1 PETRUS 5:4

Na punna battu sallang Pakalawaki Mala'birika, langgappa mako hadia sannaka ga'gana. Anjo hadiaya takkulleai amminra kaga'ganna.

1 SAMUEL 2:30

INakke, Karaeng Allata'alana Israel, riolo le'ba'Ma' a'janji angkanaya kaluarganu siagang turungannu la'jari palayang mae ri Nakke, salaku imang sa'genna satunggu-tungguna. Mingka kamma-kamma anne tenamo naKuero' ri anjo kammaya! Nasaba' inai-nai ampakala'biriKa' iami laKupakala'biri', na inai-nai anghina' iami laKuhina.