ROMA 16:17 - KITTA' MATANGKASA'

¹⁷ Sikamma sari'battangku ngaseng! Sanna' kupala'na mae ri kau ngaseng: tutuko mae ri tau eroka appasisala-sala siagang tau eroka angkacoi tappa'na taua mae ri Batara. Assisalai anjo kammaya siagang apa le'baka nipangngajarrang mae ri kau. Pakabellai kalennu battu ri tau kammaya anjo.

ROMA 16:17 ပူးပေါင်းရင်းမြစ်များ

MATIUS 18:17

Punna tena ija napilangngeri pappakainga'na anjo siapaya tau, nampami nipau mange ri jama'aka. Kale'bakkanna, punna tena ijapa naero' ampilangngeri pappakainga'na jama'aka, pasangkammami pasingara' sima siagang tau kapere' anjo taua siagang tau tena natappa' ri Allata'ala.”

MATIUS 18:7

Teai sipato' cilakana anne linoa lanri jaina passabakkang na'jari doraka rupataua. Mingka memang tuli lania'na anjo passabakkang kammaya. Mingka la'biangampa cilakana tau a'jari passabakkanga nadoraka paranna tau!

MATIUS 7:15

“Tutuko mae ri na'bi-na'bi palassua. Sanrapangi nicini' gimbala' ke'nanga, mingka sikontutojenna sanrapangi kongkong nye'nyereka lalang nyawana ke'nanga.

LUKAS 17:1

Nakana Isa mae ri ana'-ana' gurunNa, “Mattantu lania' apa-apa a'jaria passabakkang na'gau' dosa taua. Mingka cilakami tau a'jaria passabakkang!

LAMPA-LAMPANA 15:24

Nia' kabara' nalangngere' ikambe angkanaya nia' siapa are tau battu ri kambe le'ba' mae ri kau ngaseng assareko pangngajarang sala, sa'gennu a'jari lussa' siagang lingu napakamma ke'nanga. Sikontutojenna teai ikambe assuroi anjo ke'nanga battu mae ri kau ngaseng anggaukangi anjo kammaya.

1 KORINTUS 11:18

Nasaba' uru-uru kulangngereka iamintu angkanaya punna a'rappungangko salaku jamaah, assisa'la'-sa'lakko a'jari a'rupa-rupa golongang nampa assigea'-geakko. Na anne kabaraka kukira-kira nia' kamma tojenna.

1 KORINTUS 3:3

nasaba' mannuruki ijako ri cara sipa'-sipa' rupataua lalang ri katallassannu. Nasaba' punna massing sikimburu ijako siagang masarro ijako assiba'ji para ikau, sai iami anjo buttina ma'nassanu mannuruki ijako ri cara sipa'-sipa' tau tenaya natappa' ri Allata'ala lalang ri katallassannu?

GALATIA 2:4

manna pole nakamma nia' siapa are tau ero' ansuro passai. Anjo ke'nanga tau antama' cokko-cokko ri golonganta, assara-sarai a'jari sari'battang siagang ikatte. Antama' cokko-cokkoi ke'nanga lanri eroki nasalidiki kabebasanta ikatte tau assileoka katallassanta lalang ri Isa Almasi. Eroki ke'nanga ampoterangki' ammotere' mange ri katallassanta riolo, a'jari ata.

FILIPI 3:17

Sikamma sari'battangku! Turukimi conto niaka ri kalengku. Le'ba' mako nasare ikambe conto annabaya; lanri kammana, parhatikangi baji'-baji' katallassanna sikamma tau anturukiai anjo conto napassareanga ikambe.

KOLOSE 2:8

Paralluko tutu, gassingka nia' tau anggodako siagang pikkirang tenaya matu-matunna siagang angngeranga mange ri oloang salaya. Anjo pikkirang-pikkirang kammaya teai pikkirang battu ri Isa Almasi, passangalinna pikkirang battuji ri rupataua siagang roh-roh koasaya ri anne linoa.

2 TESALONIKA 3:6

Sikamma sari'battangku, lanri koasaNa Batara Isa Almasi, kikellai ngasengko sollanna nupakabella kalennu battu ri tau a'mala'-malasaka, siagang tau taeroka anturuki pangngajarang napabattua ikambe mae ri ke'nanga.

1 TIMOTIUS 1:3

Kukellaiko sollannu ammantang ri Efesus. Anne le'ba' mako kupauang baji'-baji' ri wattungku mange ri daera Makedonia. Nasaba' nia' siapa are tau ri Efesus angngerang pangngajarang sala. Na parallu nupammari angngajara' sala anjo ke'nanga.

2 TIMOTIUS 3:5

Manna namannuruki lahere'na ke'nanga nicini' anggaukangi napassuroanga agamaya, mingka sikontutojenna tanatarimayai ke'nanga kakoasanna anjo agamaya. Pakabellai kalennu battu ri tau kammaya anjo.

TITUS 3:10

Punna nia' tau appasisala-sala lalang ri jama'aka, parallui nupakainga' sikali yareka pinruang; le'baki anjo punna taeroka mappilangngeri tea' mako agangi pole sipa'rappungang.

1 YOHANES 2:19

Ia musu-musunNa Almasi, iamintu sikamma tau a'lampayamo ambokoiki', nasaba' anjo ke'nanga teai memangi taunta. Punna taunta anjo ke'nanga, tantu tuli ammantangi assiagang ikatte. Mingka assulu'mi ke'nanga battu ri katte, sollanna a'jari singara'mo angkanaya tena manna sitau battu ri ke'nanga antama' tojeng-tojenga ri golonganta.

YUDAS 1:19

Yangasemmi anne ke'nanga tau lappa'niaka passisala-salang siagang nikoasaia ri sipa'-sipa' ero' pakkalinoanga. Anjo ke'nanga tau tena ngaseng nanipantamai ri RohNa Allata'ala.