ROMA 14:14 - KITTA' MATANGKASA'

¹⁴ Lanri assileo'na katallassangku siagang Batara Isa, tappa' sikalima' angkanaya sikontutojenna tena apa-apa harang ri passala'na sikontu apa-apa nikanrea; mingka harangi anjo apa-apaya mae ri se'reang tau, punna niharangngangi ri anjo taua.

ROMA 14:14 ပူးပေါင်းရင်းမြစ်များ

MARKUS 7:2

Le'baki nacini' ana'-ana' gurunNa Isa angnganre nara'masa' limanna. Tena nabissai rolong limanna, situru' atoranna agamaya.

LAMPA-LAMPANA 10:28

Le'baki anjo nakanamo ri ke'nanga, “Nuasseng ngasenji sari'battang, angkanaya situru' ajarang agamana tu Yahudia, tanipa'biangai ke'nanga angkunjungi balla'na bansa maraenga, yareka assileo' siagang bansa maraenga. Mingka le'ba'ma' Napabattuang Allata'ala, angkanaya takkulleai kucini' ra'masa' yareka harang tau maraenga.

ROMA 14:2

Nia' tau nakana a'rupa-rupai kanre-kanreang akkulle nakanre. Mingka nia' todong tau lammai tappa'na nanakana gangang-ganganji akkulle nakanre.

ROMA 14:20

Teako passabakkang apa-apa nikanre, nanupanraki apa-apa le'baka Napare' Allata'ala. Memang sikontu kanre-kanreanga hallala' ngasengi untu' nikanre; mingka punna passabakkang anjo apa nukanrea nadoraka taua, sala mako.

ROMA 14:23

Mingka inai-nai bata-bata angkanrei apa-apaya, nakamma nakanrena tonja anjo apa-apaya, iami lanipasala ri Allata'ala, nasaba' teai lanri tappa'na ri apa annabaya siagang salaya nappanggaukang anjo taua. Na apa-apa mamo nigaukang tena nasiagang tappa', sala ngasengi.

1 KORINTUS 10:25

Sikamma dageng niaka nibalukang ri pasaraka akkullei nukanre. Tea' mako paressai rolong, manna pole nania' bata-batana nyawanu.

1 KORINTUS 8:10

Ia kupakkanaya iaminne: Alarapanna ikau, jarreka tappa'nu, sitabangko ammempo angnganre lalang ri balla' barhalaya, nampa nia' tau ancinikko. Punna tena najarre' tappa'na anjo taua, tantu labaranimi anjo taua angkanrei anjo kanre le'baka nipassareang mae ri barhalaya.

1 KORINTUS 8:7

Mingka manna nakamma, tena nayangaseng taua angngassengi anjo passalaka. Nia' biasai riolo anynyomba mae ri barhalaya. Jari lanri kammanami anjo nasa'genna kamma-kamma anne tuli nakanana ke'nanga angkanaya anjo kanre le'baka nipassareang mae ri barhalaya a'jarimi kanre barhala. Jari punna nakanrei ke'nanga anjo kanrea, nakana dorakai kalenna ke'nanga; nasaba' tenapa najarre' tappa'na ke'nanga.

1 TIMOTIUS 4:4

Sikontu apa-apa Napa'niaka Allata'ala sikontutojenna baji' ngasengi; tena manna sirupa akkulle niharangngang punna nitarimai siagang sukkuru' battu ri Allata'ala.

TITUS 1:15

Sikontu apa-apaya tangkasa' ngasengi mae ri tau tangkasaka. Mingka mae ri tau ra'masaka pikkiranna siagang tau tenaya natappa' tena sikali apa-apa matangkasa', nasaba' ra'masa'namo pikkiranna siagang ati mailalanna ke'nanga!