ROMA 13:4 - KITTA' MATANGKASA'

⁴ Nasaba' anjo pamarentaya atanNa Allata'ala, anjamaya untu' kabajikannu. Mingka punna a'gau' ja'dalakko, memang musti mallakko mae ri pamarentaya; nasaba' tena naporo nia'naja koasana anghukkungi taua. Iami atanNa Allata'ala, ampabattuai hukkunganNa Allata'ala mae ri tau a'gau' ja'dalaka.

ROMA 13:4 ပူးပေါင်းရင်းမြစ်များ

1 KARAENG-KARAENG 10:9

Nipujimi Batara, Allata'alata! Lalang Naangkatta a'jari karaeng Israel, Napappicinikammi Batara antekamma mangngaiNa mae ri katte. Tena le'ba'-le'ba'na Nakamaseang bansa Israel; Iaminjo saba'na na Naangkakki' a'jari karaenna ke'nanga, sollanna akkulle kipaenteng hukkunga siagang kaadelanga.”

2 PATTOTTORANG 19:6

siagang nasarei ke'nanga parenta kammaya anne, “Bajiki batenu appanggaukang, lanri punna angngadeliko teai lanri arenna rupataua, passangalinna lanri arenNa Batara. Naparhatikangko punna annappukiko se'reang kara-kara.

PANGNGEBARANG 16:14

Pangngalarroinna karaenga sanrapangi kabara' hukkungang mate; tau cara'deka usahai untu' ampanaungi larrona!

PANGNGEBARANG 20:2

Larrona karaenga sanrapangi sa'ra arrunna singaya; tau ampakanassuai sangkammai nacilakai kalenna.

PANGNGEBARANG 20:26

Karaeng cara'deka naassengi angkana inai tau ja'dala'; lanahukkungi na tanapammopporangnga ke'nanga.

PANGNGEBARANG 20:8

Punna ammempo karaenga ri kaderaya ri pangadelang, akkullei nacini' sikontu tau ja'dalaka.

YESAYA 1:17

appilajara' mako anggaukangi bajika. Paentengi kaadelanga siagang pa'rapusuki tau anjallakkanga; sarei ha'na ana' kukanga siagang alleangangi parkarana sikamma jandaya.”

YEREMIA 5:28

kammayatompa a'jari co'mo' siagang coppong tallasa'na. Tena sanggana kaja'dallanna ke'nanga. Tena na'gau' adele' lalang ri passala'na ana'-ana' kukanga, siagang tena naalleangngangi ha'na sikamma tau nijalakkanga.

YEHEZKIEL 22:27

Sikamma pagawe-pagawe pamarentana rapangi serigala angkae-kaei apa nakokkoka. Nagaukangi ke'nanga ammunoa lanri poro ero'na anggappa passawallang.

YEHEZKIEL 25:14

BansaKu Israel laKupakei untu' ampa'balassi Edom; siagang Edom lanihukkungi situru' kahebakkanna pangngalarroingKu. Lanaassengi Edom angkanaya antekamma kasia'na nitujua ri pangngalarroingKu. INakke, Batara, anne akkana.”

MIKHA 3:9

Pilangngeri anne kana-kanangku, he ikau ngaseng tukoasana Israel nakabirisia kaadelanga siagang amputara' balekai katojenganga.

ROMA 12:19

Sikamma sari'battangku! Tea' laloko a'balasaki ri kaja'dallanna taua mae ri kau; boli'mi kamma na Allata'ala ampabattui hukkunganna. Nasaba' nia' tattulisi' lalang ri Kittaka angkanaya, “Nakana Batara, iNakkemi lambalasaki panggaukanna taua. INakkemi langhukkungi.”

ROMA 13:6

Lanri kammana tommi anjo nanua'bayara' sima; nasaba' anjo pamarentaya pagaweNa Allata'ala ampajappayai anne tugasa'na memang.

1 TESALONIKA 4:6

Ri anne passalaka, tea' laloko niakki appanggaukang sala yareka annipu mae ri sari'battanna. Pirangalloang le'ba'mi napau sitojeng-tojenna ikambe mae ri kau ngaseng angkanaya laNahukkungi Batara sikontu tau anggaukangai kasalang kammaya anjo.

YOSUA 20:5

Punna niondangi ri anjo tau eroka a'balasa' sa'genna mange anjoreng, takkulleai pandudu'na anjo kotaya ampassareangi anjo taua mae ri anjo tau angngondanga. Musti nala'langngi ke'nanga, nasaba' tena nakunjungi anjo pammunoanga, siagang teai lanri birisi'na nammuno.

YOSUA 20:9

Yangasemmi anjo kota-kota palariang nipattantua untu' sikontu umma' Israel siagang untu' bansa maraeng niaka ammantang ri tangnga-tangngana ke'nanga. Inai-nai ambunoi paranna tau natenaja nakunjungi, akkullei anggappa pa'la'langngang ri anjo kota-kotaya battu ri pangngondanna tau eroka a'balasa' mae ri ia; takkulleai nibuno punna tenapa naniadeli ri dallekanna tau jaia.

1 PETRUS 2:14

kammayatompa mae ri guburnur nisarea koasa ri anjo Kapala pamarentahang untu' anghukkungi tau a'gau' ja'dalaka siagang untu' ampakalompoi tau a'gau' bajika.