ROMA 10:5 - KITTA' MATANGKASA'

⁵ Natulisiki Musa angkanaya inai-nai assibajiki siagang Allata'ala situru' hukkung-hukkung agamaya, iami lattallasa' lanri mannurukinna mae ri anjo hukkung-hukkung agamaya.

ROMA 10:5 ပူးပေါင်းရင်းမြစ်များ

NEHEMIA 9:29

Kipakaingaki ke'nanga sollanna naturuki pangngajaratTa, mingka borroi ke'nanga na natolla' hukkunTa. Nama'nassana, punna nigaukang hukkunTa, mattantu lanikatutui katallassanga. Kapala batui na terasa' nyawa ke'nanga, taeroka mappilangngeri, taeroka mannuruki.

YESAYA 55:3

Pilangngeri, he bansaKu, battu mako mae ri Nakke, laKusareko katallassang sitojennaya. Lanri pangngamaseang siagang kajarrekang Kupa'janjianga ri Daud, appareKa' janji mannannungang siagang ikau ngaseng.

YEHEZKIEL 20:11

Anjoreng Kusarei ke'nanga parenta-parentaKu siagang Kupangngajarrangi mae ri ke'nanga hukkung-hukkungKu mustia naturuki ke'nanga, nasaba' inai-nai anturuki iami latuli attallasa'.

YEHEZKIEL 20:13

Mingka anjoreng ri parang kassika angngewa tongi ke'nanga mae ri Nakke. Nadakkai ke'nanga parenta-parentaKu, siagang natollaki hukkung-hukkung ampattantuai angkanaya inai anturuki latuli attallasaki. Sanna' nara'massinna ke'nanga allo Pammari-marianga. Lanri kammana anjo, anjoreng ri parang kassika sadiaMa' ero' a'jallo' lanri larroKu mae ri ke'nanga siagang ampanraki ke'nanga.

YEHEZKIEL 20:21

Mingka anjo tau rungka-rungkaya tena todong namappilangngeri ri Nakke. Nadakkai ke'nanga hukkung-hukkungKu siagang nabalang parekangi parenta-parentaKu, ampattantuai angkana inai-nai tau anturuki latuli attallasaki. Nara'massi ke'nanga allo Pammari-marianga. Lanri kammana anjo sadiaMa' ero' ampabattui pangngalarroingKu mae ri ke'nanga anjoreng ri parang kassika siagang ambunoi ke'nanga.

KAIMANGNGANG 18:5

Turuki paratorang-paratoranga siagang hukkung-hukkung Kupassareanga mae ri kau. Punna nugaukangi kammaya anjo, lasalamakko lalang tallasa'nu. INakkemi Batara.”

ROMA 7:10

Jari anjo hukkung-hukkung agama nikanaya ri uru-uruna lassare katallassang, ba'lalo angngeranji kamateang mae ri kalengku.

GALATIA 3:12

Mingka anjo hukkung-hukkung agamaya tena natanjeng mae ri katappakkanga. Nia' tattulisi' lalang ri Kittaka angkanaya inai-nai anggaukangi hukkung-hukkung agamaya, lanri iatommi anjo hukkung agamaya nattallasa'.

PAOLE 4:1

Nampa nakana Musa mae ri anjo bansaya, “Turuki sikontu hukkung kupangngajarranga mae ri kau ngaseng, sollannu attallasa' sa'genna nupammantangngi anjo butta laNapassareanga Batara, Allata'alana boe-boenu, mae ri kau.

FILIPI 3:9

siagang nakuakkulle asse're tojeng-tojeng siagang Ia. Teaimi kalengku angngusahai passisambungang bajikku siagang Allata'ala, iamintu lanri kuturukinna hukkung agamaya. Kamma-kamma anne a'jari baji'mi passisambungangku siagang Allata'ala, lanri tappaka' mae ri Almasi. Jari battu ri KalenNa Allata'ala anjo passisambungang bajika, siagang lanri katappakkang mae ri Isa Almasi.