PAPPICINI' 9:20 - KITTA' MATANGKASA'

²⁰ Mingka anjo tau ammantanga, tenaya nanibunoi ri anjo balaya, tena tompa natoba' battu ri dosa-dosa nagaukanga ke'nanga. Tenapa nammari ke'nanga anynyomba mae ri setang-setanga, siagang mae ri barhala-barhala bulaenga, peraka, tambagaya, batua siagang kayu tenaya nakkulle accini' yareka allangngere', yareka a'jappa.

PAPPICINI' 9:20 ပူးပေါင်းရင်းမြစ်များ

2 KARAENG-KARAENG 22:17

Le'ba'Ma' nabokoi ke'nanga siagang assaremi ke'nanga koro'bang mae ri rewata-rewata maraenga. Sikontu anjo apa nagaukanga ke'nanga napanaiki larroKu. LarroA' mae ri Yerusalem, siagang tena nakkulle nipanaung larroKu.

2 PATTOTTORANG 28:22

Lalang ri wattu anjo kasukkaranga, ba'lalo pila' dorakaji Ahas mae ri Batara.

2 PATTOTTORANG 34:25

Ma'bokomi ke'nanga ri Nakke siagang assaremi ke'nanga koro'bang mae ri rewata-rewata maraenga. Sikontu anjo apa nagaukanga ke'nanga napanaiki larroKu. LarroA' mae ri Yerusalem, siagang anjo larroKu takkulleai naung.

PAMMUJI 106:37

Nakoro'bangkangi ana'-ana'na ke'nanga mae ri barhala-barhala Kanaan.

YESAYA 2:8

Kemae-kemae nia' barhala, siagang anynyombai ke'nanga ri patung-patung bate pare' kalennaji ke'nanga.

YESAYA 41:7

Tukang kayua napakajarreki pa'mai'na tukang bulaenga, tau a'de'deka appakanipisi' bassi siagang palu-palu, napakalompoi pa'mai'na tau a'de'deka rate ri pa'de'dekanga. Nakana, ‘Baji' sikali bate jamanu’; nampa napakajarre' siagang paku sollanna tagioka.

YEREMIA 1:16

LaKuhukkungi ummakKu, lanri dorakai ke'nanga siagang nabokoiA'. Assaremi ke'nanga koro'bang mae ri rewata-rewata maraenga, kammayatompa appare'mi ke'nanga patung-patung nampa nasomba.

YEREMIA 25:6

Napisangkaiko anjo na'bi-na'bia anynyomba siagang assambayang mae ri rewata-rewata maraenga. Napisangkaiko ke'nanga anynyomba ri barhala-barhala nupareka kalennu, nasaba' anjo kammaya napakalarroi Batara. Punna nuturuki anjo parentaNa Batara, tena Nahukkungko.

YEREMIA 44:8

Apa saba'na nanugaukang apa-apa ampabattuai larroKu? Battuko mae siagang ammantangko ri Mesir, pa'rasangang tenaya nuassengi, nampa anynyombako barhala siagang assareko koro'bang mae ri anjo rewata-rewataya! Apaka erokko angngancuruki kalennu sollannu nihina ri sikontu bansaya ri lino siagang nipake arennu salaku pattunra?

YEREMIA 5:3

Sikontutojenna ia Natuntuka Batara iamintu pa'mai' tamamminraya. Natunrungko Batara, mingka tena nujampangi. Nalicakko, mingka taerokako niajara'. Kapala batuko, siagang taerokako toba' battu ri dosa-dosanu.

YEREMIA 51:17

Nacini'na ngaseng anjo kammaya sadara'mi rupataua, angkanaya kalenna toloi na tena pammahanna. Siri'mi panre bulaenga napakamma, nasaba' patung barhala napareka sangnging palusu' na tena nyawana.

DANIEL 5:23

Kipakatinggi kalenta mae ri Batara niaka ri suruga siagang baraniki' ansuro erangi antama' mangko'-mangko' le'baka nirampasa' battu ri Balla'Na Batara. Nampa ikatte siagang sikamma tumalompota, sikamma bainenta siagang baine piarata angnginungi battu ri anjo mangko'-mangkoka. Ammuji-mujiki' mae ri rewata-rewata nipareka battu ri bulaeng, pera', tambaga, bassi, kayu siagang batu, iamintu rewata-rewata tenaya nakkulle accini' yareka allangngere' yareka ammahang apa-apa. Tena kipakalompoi Allata'ala ampattantuai tallasatta siagang mateta siagang ampattantuai oloang katallassanta.

DANIEL 5:4

Lalang angnginunna ke'nanga, mammuji-mujimi ke'nanga ri rewata-rewata nipareka battu ri bulaeng, pera', tambaga, kayu siagang batu.

KAIMANGNGANG 17:7

Bansa Israel musti tamamminrayai mae ri Batara, siagang tena sikali-kali nakkulle anynyamballe ke'nanga olo'-olo' ri koko-kokoa untu' passare mae ri sikamma jing ja'dalaka. Anjo paratoranga musti nituruki sa'genna satunggu-tungguna.

MIKHA 5:13

Patung-patunna Dewi Asyera ri pa'rasangannu laKurumbangi siagang kota-kotanu niaka pattahanganna laKuancuruki.

MATIUS 21:32

Nasaba' battumi Yohanes Paje'ne' ampicinikiang ngasengko carana katallassang Nakaerokia Batara, mingka taerokako tappa' ri pangngajara'na; mingka parentea siagang bai'-baine ja'dalaka tappaki ri ia. Na ikau ngaseng, manna pole nucini' ngasemmi anjo apa kajarianga tena tompa natappinra pikkirannu siagang tena tongija nuero' tappa' ri Batara.”

LAMPA-LAMPANA 17:29

Jari, lanri ana'-ana'Naki' Allata'ala, takkulleaki' ampasangkammai Allata'ala siagang patung bulaeng nipareka, yareka pera', yareka batu nipareka situru' kacara'dekanna rupataua.

LAMPA-LAMPANA 19:26

Na kamma-kamma anne massing nucini'mi siagang massing nulangngere'mi, apa nagaukanga anjo Paulus. Napaui angkana anjo rewata-rewata napareka rupataua tena sikali nakkulle nikana rewata. Najaimo tau akkulle a'jari tappa' ri anjo pangngajaranna; tena na ri Efesus bawang mingka a'birimmi a'la'bang todong ri sikontu daera Asia.

LAMPA-LAMPANA 7:41

Anjo wattua appare'mi ke'nanga se're patung ana' sapi. Nampa angngerang ke'nanga koro'bang mae ri anjo patunga; siagang assua'-suara'mi ke'nanga untu' ampakalompoi anjo apa napare' kalennaya ke'nanga.

2 KORINTUS 12:21

Kukamallakkangi gassingka Napakatuna' Allata'alaku sallang ri dallekannu punna battua' angkunjungiko. Ranggasela tonga' gassingka jaiko sallang lampakarruka', lanri tenana nuero' ampinrai gau' dosanu allaloa, anggaukangi gau' bawanga, gau' ra'masaka, kammayatompa gau' tenaya nasiratang.

PAOLE 31:29

Kuassengi angkanaya punna matema', anjo taua la'jari ja'dalaki siagang lanatollaki apa le'baka kupangngajarrang mae ri ke'nanga. Nampa lanituju sallang ke'nanga ri bala, lanri napakanassuna Batara lanri nagaukanna ke'nanga apa Napappisangkanga Batara.”

PAOLE 32:17

Assarei ke'nanga koro'bang mae ri roh-roh ja'dalaka teai mae ri Allata'ala, mae ri rewata-rewata takontutojeng, taniassenga siagang tanipakala'biri'ka ri boe-boena riolo.

PAOLE 4:28

Anjorengko lanynyomba mae ri rewata-rewata bate pare' limanna rupa taua, iamintu rewata-rewata nipareka battu ri kayu siagang batu, tenaya nakkulle accini' siagang tenaya nakkulle allangngere', tenaya nakkulle angnganre yareka angngara'.

1 TIMOTIUS 4:1

Naterassimi Napau RohNa Allata'ala angkanaya ri jammang labattua sallang, nia' sipa'gang tau lambokoi siagang lansassali Almasi. Lamminawang turuki sallang ke'nanga mae ri roh-roh salaya, siagang lanapinawangi ajarang-ajarang setanga,

PAPPICINI' 15:1

Nampa nia' kucini' ri langika apa appakalannasaka siagang sannaka heba'na. Nia' tuju malaeka' siagang tuju bala kala'busanga. Iaminne kala'busanna Napappicinikang kalarroanNa Allata'ala.

PAPPICINI' 16:8

Le'baki anjo natumpami bonena pammoneanna anjo malaeka' makaappaka mae ri mataalloa; nanipa'biammo mataalloa ampa'jari ammutungi rupataua battu ri bambang ta'liwaka.

PAPPICINI' 9:19

Anjorengi ri bawana siagang ingkonna kagassinganna anjo jaranga. Ingkonna sangkammai ulara' ruaya ulunna. Iaminjo ingkonna napake ansessai rupataua.

PAPPICINI' 9:21

Tena todong natoba' ke'nanga anggaukangi ammunoa, pangngassengang baca-bacaya, panggaukang bawanga, kammayatompa a'lukkaka.