PAOLE 8:16 - KITTA' MATANGKASA'

¹⁶ Ri parang lompoa Nasareko manna untu' a'jari kanrenu, iamintu kanre tenaya naassengi boe-boenu. Nagaukangai Batara kammaya anjo lanri ero'nu naso'ri siagang nakellaina tuna pa'mai'nu, sollanna akkulle a'gau' baji' mae ri kau ri kale'bakkanna.

PAOLE 8:16 ပူးပေါင်းရင်းမြစ်များ

PA'JARIANG 22:1

Siapa are wattu ribokoanganna Naso'rimi Allata'ala kajarrekanna tappa'na Abraham. Nakio'mi Allata'ala anjo Abraham angkana, “Abraham!” Appialimi Abraham angkana, “Iye' Batara.”

2 PATTOTTORANG 32:31

Siagang ri wattunna battu sikamma tunisuroa battu ri Babel untu' ampakkuta'nangngangi antekamma batena appakalannasa' nammolle ri garrinna, nilappassammi Hizkia ri Batara untu' a'gau' ri ero'na, lanri ero'na niso'ri pa'mai'na.

AYUB 42:12

Nibarakkakimi Ayub ri Allata'ala la'bi-la'biangngang pole lalang sesa tallasa'na, na ri tenanapa nale'ba' nituju ri bala. Nia' napatang Ayub barang-barang: 14.000 kayu gimbala', 6.000 kayu unta, 2.000 kayu sapi, siagang 1.000 kayu keledai.

PAMMUJI 119:68

Saba' ikatte bajikKi' siagang bajiki Kigaukanga, ajaria' ri sikamma katantuanTa.

KALAPPASSANG 15:25

Appala' doang dudumi Musa mae ri Batara. Nampa nipicinikiammo ri Batara sipolong kayu. Naallemi Musa anjo kayua nampa napasambila antama' ri je'neka, sa'genna a'jari la'ba anjo je'neka, nakkullemo niinung. Anjoremmi ri tampaka assare Batara paratorang-paratorang mae ri ke'nanga, siagang anjoreng tommi Naso'ri ke'nanga.

KALAPPASSANG 16:15

Wattunna nacini' tu Israel anjo kammaya, tanaassengai ke'nanga angkana apa anjo. Jari massing sikuta'nammi ke'nanga angkana, “Apa anjo?” Nakanamo Musa ri ke'nanga, “Iaminjo kanre Napassareanga Batara mae ri kau ngaseng.

KALAPPASSANG 16:31

Anjo kanrea naarengi tu Israel manna. Tanja'na kammai lisere'-lisere' ca'di, keboki, nakasia'na kammai kanrejawa ammakea je'ne' bani.

KALAPPASSANG 16:4

Nakanamo Batara ri Musa, “Kamma-kamma anne lappaturungA' kanre alla'bi-la'bi rapang bosi untu' ikau ngaseng. Tunggala' allo musti appasse'reko kanre untu' siganna'na nukanre siallo. Kammaminjo bateKu ero' anso'ri ummakKu, sollanna akkulle Kuasseng angkana apaka ma'nassa mannuruki tojenji ke'nanga ri sikamma parentaKu yareka tena.

KALAPPASSANG 20:20

Appialimi Musa angkana, “Teako mallakki. Nabattu Allata'ala kaero'nuji Naso'ri sollanna nutuli mannuruki mae ri Ia, siagang tena nudoraka.”

PANGNGEBARANG 17:3

Bulaeng siagang pera' niuji' ri pepeka, mingka atinna taua niuji ri Batara.

DANIEL 11:35

Sipa'gang battu ri anjo pamimping-pamimping cara'deka lanibunoi, mingka anjo kammaya a'jari paccobai mae ri umma'Na Allata'ala sollanna a'jari matangkasa' ke'nanga. Anjo kammaya lakajariangi sa'genna narapi' kala'busang jammanga, iamintu jammang le'baka Napattantu Allata'ala.

ROMA 8:28

Niassengi angkanaya Allata'ala ngaseng angngatoroki sikontu apa-apaya, sa'genna a'jari baji' mae ri sikamma tau angkamaseangai, iamintu sikamma tau Nakioka situru' ero' panggaukanNa.

2 KORINTUS 4:17

Na anne kasusaang tenaya nasiapa jaina, le'baka nakasia' ikambe siagang tenaya nasiapa sallona, iami langngerang wassele' katallassang mate'nea, wassele' sannaka lompona anggaranna siagang akkullea mannannungang. Bella lompona anjo kate'neanga na anjo kasusaanga ri kamma-kammaya anne.

PAOLE 13:3

tea' laloko erokki amparhatikangi. Napakei Karaeng Allata'alanu anjo taua untu' anso'riko, lanri ero'Na Nacini' angkanaya apaka ma'nassa mangngamaseang tojengko mae ri Batara yareka tena.

PAOLE 8:2

U'rangi! Patampulo taungko Napimping Karaeng Allata'alanu lalang pa'jappang bella ammalo ri parang lompoa. Erokko Naso'ri Batara ilalang ri anjo pa'jappanga, sollanna akkulle Nacini' apa niaka lalang ri atinnu, siagang apaka lanuturukiji parenta-parentaNa yareka tena.

PAOLE 8:3

Nalappassangko cipuru', nampa Nasareko manna untu' nukanre. Ikau siagang boe-boenu tale'bakako angnganre kanre kammaya anjo rioloangnganna. NaNagaukang Batara anjo kammaya lanri erokko Naajara' angkanaya anjo rupataua tena naporo kanreji bawang nakkulle attallasa', passangalinna battu ri sikontu apa Nakananga Batara.

YAKOBUS 1:12

Maupaki tau sa'baraka ri wattunna nataba paccoba. Nasaba' punna akkullemi attahang lalang ri anjo paccobaya, lanatarimami passawallanna, iamintu katallassang le'baka Napa'janjiang Allata'ala mae ri sikamma tau mangngamaseanga ri Ia.

1 PETRUS 1:7

Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi.