PAOLE 31:12 - KITTA' MATANGKASA'

¹² Suroi sikontu tu bura'nea, bai'-bainea siagang ana'-anaka, siagang bansa maraeng niaka ammantang ri kota-kotanu asse're untu' ampilangngeri anjo pambacanga, sollanna appilajara' ke'nanga ampakala'biriki Karaeng Allata'alanu, kammayatompa majarrekko mannuruki ri parenta-parentaNa.

PAOLE 31:12 ပူးပေါင်းရင်းမြစ်များ

EZRA 10:1

Lalang appala' doanna Ezra siagang angngarru' appala' popporo' ri dallekanna Balla'Na Batara, sanna' jaina tu Israel battu a'rappungang, bura'ne, baine, siagang ana'-ana'. Nakulilingi ke'nanga anjo Ezra nampa angngarru' lompo ngaseng.

KAIMANGNGANG 9:5

Sikontu anjo napappasangnganga Musa naerang ngasemmi ke'nanga mange ri dallekanna Kemaya, nampa sikontu umma' Israel a'rappungammi anjoreng untu' anggaukangi ibadaya mae ri Batara.

HAGAI 1:12

Nampa Zerubabel siagang Yosua kammayatompa sikontu umma' Israel niakamo ammotere' battu ri pammelakkanga ri Babel, naturukimi kana-kananna Hagai, iamintu suroNa Batara. Nagaukammi ke'nanga apa Naparentakanga Batara mae ri ke'nanga, lanri malla'na ri Batara.

YOHANES 5:39

Nupilajari Kittaka lanri nupikkiriki angkanaya kammaminjo carana nanugappa katallassang mannannunganga. Na iaminjo Kittaka a'jari sa'bi ri KalengKu.

PAOLE 29:29

Nia' siapa are passala' Narahasiakang Karaeng Allata'ala mae ri katte; mingka le'ba'mi Napa'nyata hukkunNa mae ri katte, na ikatte siagang sikontu jari-jarita musti mannuruki mae ri anjo hukkunga sa'genna satunggu-tungguna.”

PAOLE 29:9

Jari paralluko tamamminraya pa'mai'nu mannuruki ri sikontu anne parjanjianga, sollannu anggappa wassele' lalang sikontu usahanu.

PAOLE 31:13

Kammaminjo carana na anjo ana'-ana'nu tenayapa nale'ba' allangngereki hukkunNa Karaeng Allata'alanu akkullemi nalangngere' siagang appilajara' ampakalompoi Batara lalang attalasa'na ke'nanga ri pa'rasangang tenayamo nasallo nanupammantangngi ri ba'leanna Binanga Yordan.”

PAOLE 4:10

ri passala'na anjo alloa, ri wattu ammentennu ri dallekanNa Karaeng Allata'alanu ri Moncong Sinai. Anjo wattua Nakana Batara ri nakke, ‘Passe'rei anjo bansaya, sollanna appilajara' ke'nanga mannuruki mae ri Nakke lalang sikontu tallasa'na, kammayatompa sollanna naajara' ana'-ana'na ke'nanga mannuruki mae ri Nakke.’

YOSUA 8:33

Sikontu tu Israel, siagang sikamma pamimpinga, komandang-komandang tantaraya, haking-hakinga, kammayatompa bansa maraeng niaka ammantang ri alla'na ke'nanga, massing ammenteng ngasengi ke'nanga ri ba'leang kairi kananna anjo Patti ParjanjianNa Batara, a'dalle mae ri sikamma Imang Lewi ambulekai anjo Patti Parjanjianga. Bage ruana anjo taua a'dalle mangei ri Moncong Gerizim, nampa bage ruana maraenga a'dalle' mangei ri Moncong Ebal. Le'ba'mi naparentakang Musa, anjo atanNa Batara, sollanna nagaukang ke'nanga anjo kammaya punna narapi'mo wattunna ke'nanga untu' antarimai barakka' Napa'janjianga Batara.

YOSUA 8:35

Sikamma parentana Musa nabacakangi Yosua mae ri sikontu umma' Israel niaka asse're anjoreng, kammayami tubai'-bainea, ana'-anaka, siagang sikamma bansa maraeng niaka ammantang ri alla'na ke'nanga.