PAOLE 3:6 - KITTA' MATANGKASA'

⁶ Sikontu anjo kotaya niancuru' kabusuki; sikontu tu bura'nea, tubainea siagang ana'-anaka nibuno kabusuki, sangkamma le'baka nigaukang mae ri kota-kotana Karaeng Sihon battu ri Hesybon.

PAOLE 3:6 ပူးပေါင်းရင်းမြစ်များ

PAMMILANGNGANG 21:2

Jari attinja'mi tu Israel mae ri Batara angkana, “Punna Kisare mamo pammetang ikambe mae ri anjo bansaya, anjo ke'nanga siagang sikamma kota-kotana lanitumpasaki ri kambe sa'genna cappu'.”

PAOLE 1:4

Anjo kajariangi ri le'ba'namo Musa ambetai Sihon, iamintu karaeng Amori, ammarentaya ri kota Hesybon; kammayatompa le'ba' tommi nabeta Og, karaeng Basan, ammarentaya ri kota-kota Asytarot siagang Edrei.

PAOLE 2:24

“Le'ba'namo nilaloi daera Moab, Nakanamo Batara ri nakke, ‘Kamma-kamma anne a'lampa mako allimbangi Binanga Arnon. LaKupassareangi mae ri kau Karaeng Sihon, iamintu karaeng Amori ammarentaya ri Hesybon, kammayatompa sikontu pa'rasanganna. Bunduki anjo karaenga, nampa nupammantangngi buttana.

PAOLE 2:34

Anjo memang wattua niallemi siagang niancuru'mi sikamma kotaya kammayatompa nibunomi sikontu pandudu'na, bura'ne, baine siagang ana'-ana'. Tena niboli' attallasa'.

PAOLE 29:6

Tena roti lanukanre siagang tena je'ne' anggoro' yareka inungang terasa' lanuinung, mingka Nasareko Batara sikontu apa nuparalluanga sollanna nuasseng angkanaya Iami Karaeng Allata'alanu.

PAOLE 3:2

Mingka Nakanamo Batara mae ri nakke, ‘Teako mallakki mae ri ia, Musa. LaKupassareangi anjo taua mae ri kau, kammayatompa tantarana siagang sikontu daerana. Gaukammi mae ri ia sangkamma apa le'baka nugaukang mae ri Sihon, karaenna tu Amori ammarentaya ri Hesybon.’

PAOLE 3:5

Sikontu anjo kotaya nipakajarreki siagang tembo'-tembo' pattahangngang tinggia; nipakajarreki siagang pakke'bu'-pakke'bu' lompo siagang panjoli pakke'bu' kassaka untu' antongkoki pakke'bu' lompona anjo kotaya. Pantaranganna anjo nia' jai kota maraeng tenaya nammake kalli' tembo'.

YOSUA 11:14

Sikontu pandudu'na anjo kotaya nibuno ngasemmi; tena manna sitau nilappassang attallasa'. Mingka sikontu barang-baranna niaka anggaranna siagang olo'-olo' piarana niallei ri tu Israel nampa nakammai ke'nanga.