PAOLE 26:14 - KITTA' MATANGKASA'

¹⁴ Battu ri anjo passare bage sampuloa battu ri panggappanga, manna sike'de' tania' kukanre ri wattungku susa kamateang; yareka tena kuerang assulukang balla' ri wattungku ra'masa', yareka kupassareangi salaku pappatala untu' tau matea. Mannurukima' mae ri Katte, o, Batara; sikontu apa Kiparentakanga ri passala'na anjo passare bage sampuloa battu ri panggappanga, le'ba'mi kugaukang ngaseng.

PAOLE 26:14 ပူးပေါင်းရင်းမြစ်များ

PAMMUJI 106:28

Nampa anynyomba Baal ke'nanga ri Peor, na nakanre kanre nipassareanga mae ri rewata-rewataya.

PAMMUJI 18:22

Mannurukia' ri parentaNa Batara na tena kumassaile ma'boko battu ri Allata'alaku.

YEREMIA 16:7

Tena todong tau laero' appare' pammaca-macang untu' ansaleori tau susaya. Tena lamminawang turu' susa ba'lalo manna tau ammoteranga manggena yareka amma'na.

YEHEZKIEL 24:17

Gassingka kalangngerangi anjo karru'nu. Teako a'jappai natena nummake soro'bang, yareka tena nummake pa'lapa' bangkeng, kamma tau kamateanga. Tea tongko bongongi rupannu, siagang teako angnganrei roti nikanrea ri wattu kamateang.”

HOSEA 9:4

Ri sikamma anjo pa'rasanganga tena nulakkulle assare anggoro' siagang koro'bang olo'-olo' untu' ampakasannangi atinNa Batara. Anjo kanrenu lanapa'jari ra'masa' kabusuki sikamma tau angkanreai, sangkamma kanre nikanrea ri wattunna upacara nitarawanna tau matea. Anjo kanrea poro battannuji bawang angkasiaki matu-matunna; manna sike'de' tena nalanierangi mae ri Balla'Na Batara untu' a'jari passare anjoreng.

KAIMANGNGANG 21:1

Nasuroi Batara anjo Musa ampabattui anne parentaya mae ri sikamma imang jari-jarina Harun angkanaya, “Se'rea imang takkulleai nara'massi kalenna lanri amminawanna anghaderi upacara panguburanna bija pammanakanna,

KAIMANGNGANG 21:11

Ia le'ba'mi nipassareang mae ri Nakke untu' a'jari iNakke pata, jari takkulleai nara'massi kalenna. Tena todong nakkulle nara'massi KemaKu lanri assulu'na battu ri KemaKu nampa antama' ri balla' niaka tumatena, manna pole naanjo tau matea iamintu manggena yareka amma'na.

KAIMANGNGANG 7:20

Punna nia' tau angkanrei anjo dagenga ri wattu ra'masa'na, tenamo nanibilangi anggota umma'Na Allata'ala.

MALEAKHI 2:13

Siagang anne pole paggaukannu maraenga. Tampa' pakkoro'bangnganNa Batara nupirassi je'ne' mata; angngarrukko siagang appiraungko lanri taerokami Batara antarimai koro'bang-koro'bannu.

PAOLE 15:5

assala' mannurukiko mae ri Karaeng Allata'alanu, siagang nugaukang baji' sikontu apa kuparentakanga mae ri kau anne alloa.

PAOLE 16:11

A'rannu-rannuko ri dallekanNa Karaeng Allata'alanu, ri anjo tampa' le'baka Napattantu, siagang ngaseng ana'-ana'nu, ata-atannu, kammayatompa tu Lewi, tubattu-battua, ana'-ana' kukanga siagang sikamma janda niaka ammantang ri kota-kotanu.

PAOLE 26:13

angkana mako ri Karaeng Allata'alanu, ‘Battu ri bage sampulona wassele' kattoang mustia nipassareang mae ri Katte, Batara, tena manna sike'de' ammantang ri ballakku; yangasenna le'ba'mi kupassareang mae ri tu Lewi, tubattu-battua, ana'-ana' kukanga siagang jandaya, sangkamma Naparentakanga Karaeng Allata'ala mae ri nakke. Battu ri parenta-parentaNa Batara ri passala'na passare bage sampuloa battu ri panggappanga, tena manna sirupa kudakkai.

PAOLE 26:15

Battu ri tampa' katangkasanTa ri suruga poro ero' lalo maKi' amparhatikangi siagang ambarakkaki ummatTa Israel; barakkaki tongi anjo pa'rasangang kalumanynyanga siagang copponga buttana, anjo Kipassareanga mae ri kambe, situru' janjinTa mae ri boe-boena ikambe.’ ”