PAOLE 16:10 - KITTA' MATANGKASA'

¹⁰ nampa pakalompoi Allo Lompo Pakkattoanga untu' ampakala'biriki Karaeng Allata'alanu. Ri anjo alloa angngerangko passare ero' kalennu mae ri Ia, situru' jaina dalle' Napassareanga mae ri kau.

PAOLE 16:10 ပူးပေါင်းရင်းမြစ်များ

1 PATTOTTORANG 29:14

Inakke siagang anne ra'yakku sikontutojenna tena pakkullena assare apa-apa mae ri Katte, lanri yangasenna passareTa tonji. Na anne apa napassareanga ikambe iKatte tonji pata.

2 PATTOTTORANG 31:14

Kore ana'na Yimna, tu Lewi, a'jari kapala pangawala' ri Pakke'bu' Lompo Timboro'na Balla'Na Batara, nisarei tugasa' untu' antarimai passare-passare nipassareanga mae ri Batara, nampa nabage-bage.

KALAPPASSANG 35:29

Sikontu tu Israelka massing naerammi passarena ke'nanga siagang ati maci'nonna mae ri Batara untu' jama-jamang Naparentakanga Batara tete ri Musa.

PANGNGEBARANG 10:22

Lanri barakka'Na bawang Batara na'jari kalumanynyang taua; anjama terasaka takkulleai natambai barang-baranga.

YO"EL 2:14

Barang ero'ji Karaeng Allata'alanu ampinrai ero'Na, na Nabarakkakiko alla'bi-la'bi. Sa'gennu akkulle ngaseng angngerang passare koro'bang anggoro' siagang gandung mae ri Batara, Allata'alanu.

KAIMANGNGANG 12:8

Punna tena pakkullena anjo bainea appasadia sikayu ana' gimbala', musti angngerangi ruang kayu jangang-jangang bodobangkeng yareka bukkuru' rungka: sikayu untu' koro'bang nitunu na sikayu untu' koro'bang pammopporang dosa. Imanga musti nagaukangi upacaraya untu' antangkasi kara'massanna anjo bainea, sa'genna a'jari tangkasa'.

KAIMANGNGANG 23:15

Appakkaramula ri le'ba'namo allo Pammari-marianga, ri wattu nupassareanna mae ri Batara wassele' basse gandung bungasa'nu, musti nurekengi pintuju tattujua allo.

KAIMANGNGANG 25:26

Punna tena tau ampasuluki, mingka ri allo ri boko a'jari nia' pakkullena siagang anggannaki doe'na untu' ampasuluki anjo tampaka,

KAIMANGNGANG 5:7

Mingka punna tena pakkullena anjo tau kasalanga appasadia gimbala' yareka bembe untu' antangkasi dosana, musti angngerangi sipasang jangang-jangang bukkuru' yareka jangang-jangang bodobangkeng rungka, sikayu untu' koro'bang nipammopporanna dosana, nampa sikayu pole untu' koro'bang nitunu.

PAMMILANGNGANG 28:26

Ri allo makase'rena Allo Lompo Pakkattoanga, allo lompo lappasa'na tappintujua tattuju allo, ri wattunna nupassareang gandung berua mae ri Batara, musti asse're ngasengko untu' anggaukangi ibadaya, siagang takkulleako anggaukangi jama-jamang battalaka.

PAMMILANGNGANG 31:28

Untu' passare nisa'la' mae ri Nakke, Batara, musti nuallei battu ri anjo bageanna sikamma tantaraya tasse're lalanna ta'limang bilangnganga, baji' battu ri tau nitahanga, kammayatompa battu ri sapia, keledaia, gimbalaka, siagang bembea.

1 KORINTUS 16:2

Punna allo Minggu, iamintu allo bungasaka, paralluko massing assare doe', situru' massing panggappanu. Boliki anjo doeka sa'gengku battu, sollanna punna battua', tenamo naparallu nipasse're pole.

2 KORINTUS 8:10

Turu' ri panggappaku, kamma-kamma anne siratang memang tommi nupa'le'ba' anjo apa-apa le'baka nupakaramulai ri taung allaloa. Nasaba' ikaumi uru-uru annawa-nawai siagang ampakaramulai anne jama-jamanga.

2 KORINTUS 8:12

Punna rellako assare, ma'nassa laNatarimai Allata'ala anjo passarenu. Lanatarimai situru' pakkullenu, tena nasituru' apa tenaya ri kau.

PAOLE 16:11

A'rannu-rannuko ri dallekanNa Karaeng Allata'alanu, ri anjo tampa' le'baka Napattantu, siagang ngaseng ana'-ana'nu, ata-atannu, kammayatompa tu Lewi, tubattu-battua, ana'-ana' kukanga siagang sikamma janda niaka ammantang ri kota-kotanu.

PAOLE 16:9

“Rekengi pintuju tattujui allo, appakkaramula ri allo pakkaramula akkattonu gandung,