PAOLE 12:31 - KITTA' MATANGKASA'

³¹ Tea' laloko palembai carana anjo bansa-bansaya anynyomba ri rewata-rewatana ke'nanga untu' anynyomba ri Karaeng Allata'alanu, nasaba' anjo ke'nanga punna anynyombai nagaukangi apa-apa pallaka siagang Nakabirisia Batara. Ba'lalo manna ana'na ke'nanga natunui ke'nanga irate ri tampa' pakkoro'bangnganga salaku koro'bang untu' rewata-rewatana ke'nanga.

PAOLE 12:31 ပူးပေါင်းရင်းမြစ်များ

2 KARAENG-KARAENG 16:3

Sangkamma tongi karaeng-karaeng Israel batena appanggaukang ri tallasa'na, ba'lalo napassareangi ana' bura'ne kalenna a'jari koro'bang mae ri rewataya, situru' kabiasang ja'dala'na sikamma tau nibongkaya ri Batara battu ri butta Kanaan ri wattunna napantamakki tu Israel anjo pa'rasanganga.

2 KARAENG-KARAENG 17:31

tu Awa appareki patung Nibhas siagang Tartak, siagang tu Sefarwaim napassareangi ana' kalenna ke'nanga a'jari koro'bang nitunu mae ri Rewata Adramelekh siagang Anamelekh.

2 KARAENG-KARAENG 21:2

Dorakai Manasye ri Batara, lanri naturuki kabiasang ja'dala'na bansa-bansa nabongkaya Batara battu ri Kanaan ri wattu napantamakkinna tu Israel anjo pa'rasanganga.

2 KARAENG-KARAENG 3:27

Lanri kammana anjo naallemi ana' bura'nena, nampa napassareang anjari koro'bang irate ri tembo'na kotaya mae ri rewatana Moab. Jari malla'mi tu Israel, sa'genna napamunduru' pasukanna ke'nanga battu ri anjo kotaya nampa ammotere' mange ri pa'rasanganna ke'nanga.

2 PATTOTTORANG 33:2

A'gau' dosai mae ri Batara sangkamma kaja'dallang nagaukanga bansa-bansa le'baka Nabongka Batara assulu' battu ri butta Kanaan ri wattunna napantamakki tu Israel anjo pa'rasanganga.

2 PATTOTTORANG 36:14

Pantaranganna anjo, Balla'Na Batara le'baka Natangkasi Batara untu' KalenNa, nira'massi ri pamimping-pamimpinna tu Yehuda, imang-imanga, siagang ra'yaka, lanri amminawang turu'na todong ke'nanga anynyomba barhala siagang naturuki panggaukanna bansa-bansa dorakaya ri tammulilina ke'nanga.

PAMMUJI 106:37

Nakoro'bangkangi ana'-ana'na ke'nanga mae ri barhala-barhala Kanaan.

KALAPPASSANG 23:2

Teako katuru'-turukangngi mae ri tau jaia punna a'gau' ja'dala' ke'nanga yareka napalekko salai hukkunga lanri assarena kasa'biang takontutojeng.

YEREMIA 32:35

Ambangungi ke'nanga tampa'-tampa' pakkoro'bangngang untu' Rewata Baal ri Ka'bung Lappara' Hinom, nampa napassareang ana'-ana'na ke'nanga a'jari koro'bang mae ri Rewata Molokh. Padahala', tale'bakai Kusuro ke'nanga anggaukangi anjo kammaya, ba'lalo tale'bakai ammumba lalang ri pikkirangKu angkanaya lanagaukangi ke'nanga anjo panggaukang appakaringi'-ringi' kammaya siagang napa'jari dorakai tu Yehuda.”

YEREMIA 7:31

Se're tampa' pakkoro'bangngang niarenga Tofet le'ba'mi nabangung ke'nanga ri Ka'bung Lappara' Hinom untu' napake ampassareangi ana'-ana'na ke'nanga a'jari koro'bang nitunu. Padahala' iNakke tena le'bakai Kusuro anggaukangi anjo kammaya, ba'lalo tena le'bakai ammumba anjo pikkirang kammaya lalang ri pikkirangKu.

YEHEZKIEL 20:31

Ba'lalo sa'genna anne alloa nura'massi kalennu lanri angngerannu passare siagang nutunui ana'-ana'nu salaku koro'bang mae ri barhala-barhalaya. Nampa barani ijako appala' pangngunju' battu ri Nakke? Lanri iNakke, Allata'ala mattallasaka, Batara Kaminang Tinggia, tena nalaKupa'biangko appala' pangngunju' battu ri Nakke.

YEHEZKIEL 23:27

Kammami anjo bateKu lampamari balere'nu siagang sikontu gau' bawang nugaukanga appakkaramula ri nia'nu ri Mesir. Tenamo nulamanrannuang pole mae ri manna pole barhala battu kemae yareka angngu'rangi mae ri Mesir.”

KAIMANGNGANG 18:21

Teako passareangngi kalase'renna ana'nu untu' nikoro'bangkang lalang ri panynyombanga mae ri Rewata Molokh, lanri anjo panggaukang kammaya nahinai arenNa Allata'ala, Bataranu.

KAIMANGNGANG 18:3

Tea' laloko turuki panggaukanna bansa Mesirka, iamintu pammantangannu le'ba'ka, yareka tau niaka ri Kanaan iamintu tampa' lanumangeia Kupimping kamma-kamma anne.

KAIMANGNGANG 20:2

ampabattui anne passalaka mae ri bansa Israel angkanaya, “Inai-nai ri kau yareka bansa maraeng niaka ammantang tuli ri alla'nu angkoro'bangkangi ana'na mae ri Rewata Molokh, musti nisambilai batu ri tau jaia sa'genna mate.

MIKHA 6:7

Apaka lasannangi Batara punna angngerangki' mae ri Ia assa'bu-sa'bu gimbala' yareka alla'bi-la'bi minynya' zaitun? Mustika nipassareangi mae ri Ia ana' bungasatta salaku pannangkasi mae ri dosa-dosata?

PAOLE 12:30

Punna le'baki niancuru' anjo bansa-bansaya, tutu laloko, gassingka nuturuki ke'nanga anynyomba ri rewata-rewata maraenga, nasaba' anjo panggaukang kammaya angngerangi bala.

PAOLE 12:4

Ri wattunnu anynyomba mae ri Karaeng Allata'alanu, teako palembai carana sikamma anjo taua anynyomba ri rewata-rewatana ke'nanga.

PAOLE 20:18

Bunoi ke'nanga, sollanna tena napa'jariko ke'nanga doraka mae ri Karaeng Allata'alanu lanri naajara'nu anggaukangi panggaukang-panggaukang appakaringi'-ringika untu' rewata-rewatana ke'nanga.

PAOLE 9:4

Punna le'baki Karaeng Allata'alanu ambongkai ke'nanga untu' ikau, teako sala pahangngi angkanaya Naerangko mange anjoreng untu' ampatangi anjo buttaya lanri baji'nu siagang nugaukanna ero'Na Karaeng Allata'alanu, sa'gennu siratang antarimai anjo buttaya. Tena sikali nakamma anjo! Nabongkai Batara anjo bansa-bansaya untu' ikau lanri ja'dala'na ke'nanga. Nalappassangko Batara angngallei buttana ke'nanga, lanri ero'Na anrupai janjinNa mae ri boe-boenu iamintu Abraham, Ishak siagang Yakub.