PAOLE 12:3 - KITTA' MATANGKASA'

³ Rumbangi sikamma tampa' pakkoro'bangnganna ke'nanga siagang allei lissarrang sikamma benteng batu nakanaya karamaki ke'nanga. Tunui gamba'-gambara'na Rewata Asyera siagang ancuruki patung-patung barhalana ke'nanga, sa'genna tenamo nakkulle nisomba poleang anjo rewata-rewata ri sikamma anjo tampaka.

PAOLE 12:3 ပူးပေါင်းရင်းမြစ်များ

1 KARAENG-KARAENG 14:15

laNahukkummi Batara tu Israel sa'genna sanrapang apa-apa ta'ronang-ronanga nianyukkang ri je'ne'. Lanipasuluki ra'ya' Israel ri Batara battu anrinni ri anne pa'rasangang bajika ia le'baka nipassareang ri boe-boena ke'nanga. Lanipatassia'-siaraki ke'nanga anta'leanna Binanga Efrat, lanri napabattuna ke'nanga larroNa Batara, iamintu lanri appare'na ke'nanga patung-patung rewata baine Asyera.

1 KARAENG-KARAENG 15:13

Toana, Maakha, napammari battu ri kadudukanna salaku amma' karaeng, lanri le'ba'na appare' patung barhala salaya untu' Asyera, iamintu rewata baine untu' kacoppongang lamung-lamung. Narumbangi Asa anjo barhalaya nampa natunu ri Lappara' Kidron.

2 KARAENG-KARAENG 11:18

Le'baki anjo appada-padami ra'yaka a'bakka mange anruntungi balla' panynyombanga ri Baal. Tampa' pakkoro'bangnganna siagang patung-patunna niancuru' kabusuki. Nampa imanna Baalka iamintu Matan, nibunoi ri dallekanna sikamma anjo tampa'-tampa' pakkoro'bangnganga. Nasaremi Yoyada tugasa' pangawalaka untu' anjagai Balla'Na Batara,

2 KARAENG-KARAENG 18:4

Naputtai tampa'-tampa' panynyombanga mae ri rewataya, siagang naruntungi tembo'-tembo' siagang patung-patung Dewi Asyera. Naancuru' tongi ulara' tambagaya bate pare'na Musa niarenga Nehustan. Nasaba', sa'genna anjo wattua tuli attunu iji dupa tu Israel untu' ampakalompoi anjo ulara' tambagaya.

2 KARAENG-KARAENG 23:14

Tembo'-tembo' rewata siagang patung Dewi Asyera niruntungi, nampa anjo butta le'ba' pammantanganna nibangung anjo tembo'-temboka siagang patung-patunga natambungi Yosia siagang buku-buku tau.

2 PATTOTTORANG 14:2

Sannangi nyawaNa Karaeng Allata'ala ri Asa, lanri nagaukanna Asa kaadelanga siagang kabajikanga.

2 PATTOTTORANG 14:3

Napakabellai tampa'-tampa' pakkoro'bangnganna bansa maraenga siagang tampa'-tampa' panynyombanga mae ri barhalaya. Tembo'-tembo' patung rewataya naancuruki, siagang benteng-bentenna patung Dewi Asyera narumbangi.

2 PATTOTTORANG 19:3

Mingka manna nakamma nia' tongija apa baji' ri kalenta. Le'ba'mi Kipakabella sikontu patunna Dewi Asyera nasombaya ra'yaka siagang kiusahakang tommi anggaukangi ero'Na Allata'ala lalang tallasatta.”

2 PATTOTTORANG 31:1

Le'baki nagaukang ke'nanga anjo passua'-suarranga, a'lampami sikontu ra'yaka mange ri sikontu kota Yehuda, nampa naancuru' patung-patunna barhalaya, naruntung sikontu patung-patung le'baka nibangung untu' Dewi Asyera, siagang naputta tampa'-tampa' pakkoro'bangnganga siagang tampa'-tampa' panynyombanga mae ri barhalaya. Kamma tomminjo nagaukang ke'nanga ri tampa'-tampa' maraenga ri Yehuda siagang ri daera-daera Benyamin, Efraim, siagang Manasye. Le'baki anjo massing ammotere' ngasemmi ke'nanga mange ri massing kamponna.

2 PATTOTTORANG 34:3

Narapi'namo 8 taung sallona ammarenta, ri umuru' rungka dudua iji, appakkaramulami Yosia anynyomba mae ri Allata'ala nasombaya Karaeng Daud boe-boena. Narapiki patang taung ribokoanganna, appakkaramulami naancuru' tampa'-tampa' panynyombang barhalaya, patung-patung Dewi Asyera, siagang barhala-barhala maraengannaya.

PAMMUJI 16:4

Boli'mi kamma tu anynyombaya ri rewata-rewata pila' katambang si'nana. Taeroka' assare koro'bang mae ri rewata-rewataya, ba'lalo taeroka' ampaui arenna ke'nanga.

KALAPPASSANG 23:13

Parhatikangi sikontu apa le'baka Kupau mae ri kau. Teako appakalompoi rewata-rewata maraeng, ba'lalo manna nutappua arenna tena todong nakkulle.”

KALAPPASSANG 23:24

Teako anynyombai ri sikamma patung-patung pa'la'langanna ke'nanga siagang teako palembai carana ke'nanga anggaukangi ibadana. Ancuru' ngasengi anjo sikamma patung-patung pa'la'langanna ke'nanga, siagang tepoki sikamma benteng-bentenna batu napakea ke'nanga untu' anggaukangi ibadana.

KALAPPASSANG 34:13

Jari, tea' laloko gaukangi kammaya; mingka rumbangi sikamma tampa' pakkoro'bangnganna ke'nanga, ancuruki sikamma batu-batu karama'na ke'nanga, kammayatompa ta'bang ngasengi sikamma benteng-bentenna Asyera, iamintu barhalana ke'nanga.

YESAYA 27:9

Mingka iapa nakkulle nipammopporang dosa-dosana Israel punna nigiling sikamma tampa' pakkoro'bangnganga mae ri rewata-rewataya sa'genna a'jari alusu' rapang pa'leo'. Sikamma pa'dupanga siagang pannanraina rewata baine niarenga Asyera musti niancuru' tongi.

YEREMIA 17:2

Sikamma taunnu assambayangi ri tampa'-tampa' pakkoro'bangnganga siagang benteng-benteng barhala le'baka nabangung untu' rewata niarenga Dewi Asyera ri tunggala' poko' kayu copponga, ri coppo'-coppo'na buluka,

HOSEA 2:17

Tenamo nalaKupa'biang antappui arenna Baal, sa'genna nakaluppaimo taua anjo arenga.

MIKHA 5:14

Lalang allumpana larroKu laKubalasaki kaja'dallanna sikontu bansa tenaya namannuruki ri Nakke.”

ZAKHARIA 13:2

Ri anjo alloa laKupattaenami areng-arenna barhala-barhalaya battu ri anne buttaya, sa'genna tenamo manna sitau angngu'rangi. Sikontu tau nakanaya kalenna na'bi siagang tau a'balle-ballea nakana kalenna napantamakki roh, laKubongka kabusuki.

PAMMILANGNGANG 33:52

musti nubongkai sikontu pandudu'na anjo pa'rasanganga. Ancuru' ngasengi sikontu barhalana ke'nanga battua ri batu siagang bassi-bassiang kammayatompa tampa'-tampa' ibadana ke'nanga.

PAOLE 12:4

Ri wattunnu anynyomba mae ri Karaeng Allata'alanu, teako palembai carana sikamma anjo taua anynyomba ri rewata-rewatana ke'nanga.

PAOLE 7:25

Tunui sikamma patung-patung barhala nasombaya ke'nanga. Teako cinnai ri pera' yareka bulaeng niaka ri kalenna siagang teako allei untu' kalennu. Punna nudakkai anjo parentaya tena tamatenu, nasaba' Nakabirisi Karaeng Allata'alanu anynyombaya ri patung barhalaya.

PAOLE 7:5

Lanri kammana anjo, rumbangi tampa'-tampa' pakkoro'bangnganna anjo bansa-bansaya, ancuru' ngasengi benteng-benteng batu nakanaya ke'nanga karamaki, ra'bai gamba'-gambara'na barhala Asyera, siagang tunui sikamma patung-patung barhala nasombaya ke'nanga.

PAPPICINI' 13:1

Nampa nia' kucini' sikayu olo'-olo' ammumba battu lalang ri tamparanga. Nia' sampulo tanru'na na tuju ulunna. Ri massing-massing tanru'na nia' songko' karaeng, kammayatompa ri massing ulunna nia' tattulisi' se're areng anghinayai Allata'ala.

HAKING-HAKING 2:2

Jari takkulleako appare' passikko' passijanjiang siagang tau niaka ammantang anrinni ri pa'rasanganga. Sikamma tampa' pakkoro'bangnganna ke'nanga musti nurumbangi'.’ Mingka tena nugaukangi anjo apa Kupassuroanga. Ba'lalo ta'bale'na nugaukanga!