PAMMUJI 95:8 - KITTA' MATANGKASA'

⁸ “Teako terassi ulunnu sangkamma boe-boenu ri Meriba, sangkamma wattunna ri Masa ke'nanga, ri parang lompoa.

PAMMUJI 95:8 ပူးပေါင်းရင်းမြစ်များ

KALAPPASSANG 17:2

Jari a'moro-moromi ke'nanga ri Musa nakana, “Sarei ikambe je'ne' inung.” Appialimi Musa angkana, “Angngapa nu'moro-moro anso'ri Batara?”

KALAPPASSANG 17:7

Anjo tampaka niarengi Masa, lanri anjorengi ri tampaka tu Israel naso'ri Batara wattunna akkuta'nang ke'nanga angkana, “Apaka Narurungangki' Batara yareka tena?” Anjo tampaka niareng tongi Meriba, lanri anjoremmi ri tampaka akkunrareng tu Israel.

KALAPPASSANG 8:15

Ri wattunna nacini' karaenga angkanaya mate ngasemmi anjo tumpanga, kapala batumi pole. Na kamma le'baka Napau Batara, taerokai karaenga anjampangi kananna Musa siagang Harun.

DANIEL 5:20

Mingka ri wattunna a'jari tampo, kapala batu siagang palla', nigulummi battu ri kakaraenganna sa'genna tappela'mo kala'biranna.

PAMMILANGNGANG 14:11

Nakanamo Batara mae ri Musa, “Siapapi sallona anne taua langngewA'? Sa'ge kemae ke'nanga taeroka tappa' ri Nakke, manna pole jaimi gau' malompo Kugaukang ri tangnga-tangngana ke'nanga?

PAMMILANGNGANG 14:22

angkanaya manna sitau anne sikamma taua tena lattallasa' untu' antama' ri pa'rasangang le'baka Kupa'janjiang mae ri boe-boena ke'nanga. Nasaba' taerokai ke'nanga mannuruki mae ri Nakke, siagang tulusu' ero'na ke'nanga ampaccoba-cobaiA'. Nampa le'ba'mi nacini' ke'nanga sioro'na cayaKu, siagang gau'-gau' malompo Kugaukanga ri Mesir siagang ri parang lompoa.

PAMMILANGNGANG 14:27

“Kemae sa'genna anjo sikamma tau ja'dalaka tuli la'moro-moro mae ri Nakke? Sikontu kunrarenna ke'nanga Kulangngere' ngasemmi.

PAMMILANGNGANG 20:13

Iaminjo timbuseng je'ne' niarenga Meriba. Nasaba' anjoremmi ri tampaka a'moro-moro tu Israel mae ri Batara, siagang anjoreng tommi Napappicinikang kakoasanNa Batara matangkasaka mae ri anjo bansaya.

LAMPA-LAMPANA 19:9

Mingka nia' siapa are ri ke'nanga sanna' terasa'na pa'mai'na, siagang taerokai tappa'. Nacallami ke'nanga ri dallekang pa'rappunganna anjo taua, anjo pangngajarang ri passala' ero'Na Allata'ala ampasalamaki rupataua lalang ri KalenNa Isa. Lanri kammana, a'lampami Paulus ambokoi ke'nanga, nampa a'lampa siagang tau tappakamo ri Isa mange ri kamara' sikolana Tiranus. Anjoreng, allo-allomi sipa'bicara siagang taua.

ROMA 2:5

Mingka kapala batu ngasengko siagang taerokako ampinrai gau'nu. Jari battu ri kau ngaseng tonji napila' battala' hukkungang lanugappaya sallang punna Allo Kiama', iamintu punna Napa'nyata sallang pangngalarroiNa Allata'ala siagang Napabattu hukkunganNa adeleka.

PAOLE 6:16

Teako paccoba-cobai Karaeng Allata'alanu sangkamma nugaukanga ri Masa.

IBRANI 12:25

Lanri kammana, tutu laloko, gassingka taerokako ampilangngeri kananNa Tau ampabattuai biritta battua ri Allata'ala. Ia tau tenaya naero' ampilangngeri biritta nipabattua battu ri Allata'ala lalang ri anne linoa, takkulleai allariangi kalenna. La'biangampa ikatte anne, allangngerekai anjo a'bicaraya battu ri suruga! Punna taerokaki' ampilangngeri, antekamma bateta lakkulle ta'lappasa'.

IBRANI 3:13

Jari sollanna tena manna sitau ri tangnga-tangnganu nitipu ri dosaya sa'genna tamappilangngeria ri Allata'ala, paralluko allo-allonu sipakainga' ilalang attallasatta ija ri anjo jammang napakkanaia Kittaka “Anne Jammanga”.

YUDAS 1:5

Yangasenna anjo nuasseng ngasemmi. Mingka, erokko kupakainga' ri passala' antekamma bateNa Batara ampasalamaki umma' Israel battu ri butta Mesir; mingka ribokoanganna Nabunoi sikamma tau tenaya natappa' ri alla'na ke'nanga.

1 SAMUEL 6:6

Apa matu-matunnu ampatterassangi ulunnu sangkamma karaeng Mesir riolo? Teako kaluppai antekamma bateNa Allata'ala ampare' karek-karenangi ke'nanga, sa'genna jarra ke'nanga, nampa Nalappassang anjo tu Israel ambokoi Mesir.