PAMMUJI 20:6 - KITTA' MATANGKASA'

⁶ Na makkio' marannu ikambe lanri pammetannu, nimangngangka' bate-bate untu' mammuji ri Allata'alata. Poro Napa'jari Batara sikontu pappala'nu.

PAMMUJI 20:6 ပူးပေါင်းရင်းမြစ်များ

1 KARAENG-KARAENG 8:43

poro battu ri pammantanganTa ri suruga Kipilangngeri pappala' doanna siagang Kiturukiangi pappala'na. Lanri kammana anjo nasikontu bansaya ri lino angngassengKi' siagang mannuruki ri Katte sangkamma ummatTa Israel. Lanaassengi ke'nanga angkanaya anne balla' kubangunga iami tampa' untu' assambayang mae ri Katte.

PAMMUJI 17:7

Kipicinikianga' pangngamaseang malompoTa saba' Kipasalamaki tau ma'la'langa mae ri Katte, amangi ke'nanga ri sa'rinta battu ri pa'bakkana musua.

PAMMUJI 18:35

Nalatia' untu' a'bundu', sa'genna akkulle kupabantang anrong pana kaminang kassaka.

PAMMUJI 18:50

Jari kupakalompo maKi' ri alla'na bansa-bansaya, siagang makkelomma' pammuji-muji mae ri Katte.

PAMMUJI 2:2

Assamai ambangung sikamma karaenna lino na situju sikamma pinggawaya mangngewa ri Batara karaeng nipileNa.

PAMMUJI 28:8

Batara Nasarei kagassingang umma'Na, Napattojengi siagang Napasalamaki karaeng nipileNa.

PAMMUJI 41:11

Kamaseang laloa', o, Batara, Kipammolle laloa' ri garringku, sollanna kukkulle ambalasaki kaja'dallanna sikamma balingku.

PAMMUJI 9:15

sollangku mammuji ri Katte ri dallekanna pandudu' Yerusalem. Lakkio'-kiokka' ma'rannu-rannu lanri Kipasalamakka'.

YESAYA 57:15

Saba' kammaminne kananNa Allata'ala Kaminang Tinggia na matangkasa', makoasaya sa'genna satunggu-tungguna, “AmmantangA' ri tampa' tinggia siagang tangkasaka, mingka ammantang tongA' ri alla'na tau tuna pa'maika siagang tau assesse' lalanga lanri dosa-dosana, untu' ampamollei sumanga'na siagang panrannuanna ke'nanga.

YESAYA 58:9

Punna appala' doangko, laKuturukiangko pappala'nu. Punna akkiokko mae ri Nakke, lappialiA' mae ri kau. Tea' mako jallakkangi parannu tau, pammarimi passimusuanga siagang pitinaya.

YESAYA 63:15

O Batara, Kiparhatikangi battu ri suruga, battu ri pammantangang matangkasatTa siagang mala'birika. Kemae pangngamaseanTa siagang kabaranianTa? Kemae kalammoranTa siagang pangngarimanginTa? Tea' laloKi' tahangngi anjo untu' ikambe.

MIKHA 4:5

Tunggala' bansaya ri tompo'na buttaya massing anynyombai siagang mannuruki ri massing rewata kalenna. Mingka ikatte lamannurukiki' mae ri Karaeng Allata'alata siagang anynyomba ri Ia untu' satunggu-tungguna.

MATIUS 6:9

Jari, punna erokko assambayang pakammaminne batenu: ‘O, Manggea ri suruga: IKattemi Allata'ala Tenaya Ruanna Poro iKatte nisomba siagang nipakala'biri'.

LAMPA-LAMPANA 2:33

Niangka'mi nai' ri empoang kaminang tinggia siagang nisaremi koasa ri Allata'ala, nampa Natarima RohNa Allata'ala, le'baka Napa'janjiang Manggea. Na anne apa nulangngereka siagang nucinika kamma-kamma anne iaminjo RohNa Allata'ala, Napaturunga mae ri kambe.

LAMPA-LAMPANA 2:36

Iaminjo saba'na namusti naasseng tojeng-tojeng sikontu bansa Israel angkanaya anjo Isa, le'baka nusalli', Iatommi anjo Isa le'baka Naangka' Allata'ala a'jari Batara siagang Karaeng Tumappasalamaka!”

LAMPA-LAMPANA 4:10

Jari, ikatte ngaseng, kammayatompa sikontu bansa Israel, musti kiasseng ngasengi angkanaya lanri kagassinganNa siagang kakoasanNa Isa Almasi anjo battua ri Nazaret, nakkullemo nia' ammenteng ri dallekannu ngaseng anne taua. Kamma-kamma anne gassimmi siagang salewangammi tubuna anne tau le'baka peso', lanri anjo Isa Almasi. Ikatte ngasemmi le'ba' ansalliki anjo Isa Almasi. Mingka nipattallasa' poleammi ammotere' ri Allata'ala.

LAMPA-LAMPANA 5:31

Siagang nisaremi ri Allata'ala empoang siagang kakoasang matinggi, a'jari Pamimping siagang Mappasalamaka; sollanna nisare kasampatang bansa Israel untu' a'jari toba' battu ri dosa-dosana na nipammopporang.