PAMMUJI 119:108 - KITTA' MATANGKASA'

¹⁰⁸ Kitarimai pappala' doang sukkurukku, o, Batara, siagang Kiajarakka' hukkung-hukkunTa.

PAMMUJI 119:108 ပူးပေါင်းရင်းမြစ်များ

2 PATTOTTORANG 31:14

Kore ana'na Yimna, tu Lewi, a'jari kapala pangawala' ri Pakke'bu' Lompo Timboro'na Balla'Na Batara, nisarei tugasa' untu' antarimai passare-passare nipassareanga mae ri Batara, nampa nabage-bage.

PAMMUJI 119:12

Mammujia' mae ri Katte, o, Batara, Kiajarakka' ri katantuanTa.

PAMMUJI 119:130

Punna nipakasingaraki, angngerangi singara' ajaranTa, assarei pangngassengang mae ri tau biasaya.

PAMMUJI 119:169

Poro ta'rapiki mae ri Katte pakkiokku, o, Batara, Kisarea' pangngassengang, situru' janjinTa.

PAMMUJI 119:26

Kumangakui panggaukangku, nampa appialimaKi' ri nakke; Kiajaria' katantuanTa.

PAMMUJI 27:6

Anne kamma ammetama' mae ri musungku niaka angkatulunga'; jari makkio' rannuma' assare koro'bang sukkuru' ri BallatTa; erokka' akkelong siagang mammuji mae ri Batara.

HOSEA 14:2

He bansa Israel, ammotere' mako mae ri Karaeng Allata'alanu! Passabakkang dosanu nutappeccoro' siagang tu'guru'.

PAMMILANGNGANG 29:39

Iaminjo sikamma paratorang ri passala'na koro'bang nitunua, koro'bang nipatalaya, koro'bang je'ne' anggoroka, kammayatompa koro'bang passiamakkang tenaya nakkulle tanupassareang mae ri Batara ri sikamma passua'-suarrang le'baka nipattantu. Sikamma anjo koro'banga a'jari pannambai mae ri sikamma koro'bang nupassareanga untu' ambayaraki tinja'nu yareka koro'bang ero' kalennu.

IBRANI 13:15

Lanri kammana, tete ri Isa, paralluki' tuli mammuji-muji ri Allata'ala; iaminjo a'jari koro'bang sukkurutta mae ri Ia, nipassareanga lalang kana-kana nipaua untu' ampakala'biriki arenNa.