PAMMUJI 107:38 - KITTA' MATANGKASA'

³⁸ Nisarei ri Batara ke'nanga jai ana', siagang olo'-olo' piarana ke'nanga pila' a'bija-bijai.

PAMMUJI 107:38 ပူးပေါင်းရင်းမြစ်များ

PA'JARIANG 1:28

Nampa Nabarakkaki ke'nanga angkana, “Ammana'-mana' mako siagang accucu-cucu mako nu'jari jai, sollanna napammantangngi sossorannu sikontu buttaya siagang nanakoasai. Kusareko tugasa' untu' amparakai sikamma juku'-jukuka, jangang-janganga, siagang sikontu olo'-olo' maraenganga ia liaraka.

PA'JARIANG 12:2

LaKusareko bija majai, siagang laKupa'jari ke'nanga bansa lompo ri lino. LaKubarakkakiko siagang laKupa'jari masahoroki arennu, sa'gennu la'jari barakka'.

PA'JARIANG 17:16

LaKubarakkaki anjo bainennu siagang lanalassukangi sitau ana' bura'ne ia laKupassareanga mae ri kau. LaKubarakkaki Sara, siagang iami la'jari anronna sikontu bansa-bansaya. Battu ri turunganna lania' siapa are jaina la'jari karaeng.”

PA'JARIANG 17:20

Mingka laKuturukiangko pappala'nu ri sesena Ismael. Lanri kammana nalaKubarakkaki Ishak siagang laKusarei turungang majai. Iami la'jari boe-boena sampuloa anrua kapala suku, siagang laKupa'jari turunganna se'reang bansa lompo.

PA'JARIANG 30:43

Kammaminjo na'jari sanna'mo kalumanynyanna Yakub. Jai sikalimi bembena, gimbala'na, untana, keledaina, siagang tunisuro-surona.

PA'JARIANG 31:9

Kammaminjo bateNa Allata'ala angngallei olo'-olo'na bapa'nu nampa Napassareang mae ri nakke.

PA'JARIANG 9:1

Nabarakkakimi Allata'ala anjo Nuh siagang sikamma ana'na na Nakana, “Ammana'-manakko siagang accucu-cucuko nu'jari jai, sollanna akkulle sossorannu napammantangngi sikontu linoa.

AYUB 12:23

Na'jari bansa-bansaya a'bakka' siagang kala'biang, nampa Napanraki ke'nanga sa'genna ancuru'.

KALAPPASSANG 1:12

Mingka pila' nijallakkangi ke'nanga ri tu Mesir, pila' katambangi jaina anjo tu Israel. Pila' a'la'bammi ke'nanga mae ri sikontu anjo pa'rasanganga, sa'genna a'jari malla'mo tu Mesir ri ke'nanga.

KALAPPASSANG 1:7

Mingka anjo turunganna tu Israel a'bija-bijami a'jari sanna' jaina. Teai sipato' linta'na katambang jaina ke'nanga, sa'genna ero'mi rassi pa'rasangang Mesir napakamma ke'nanga.

KALAPPASSANG 12:38

Jai sikali sapi naerang ke'nanga, kammayatompa gimbalaka siagang bembea. Jai todong bansa maraeng amminawang.

PANGNGEBARANG 10:22

Lanri barakka'Na bawang Batara na'jari kalumanynyang taua; anjama terasaka takkulleai natambai barang-baranga.

YEREMIA 30:19

Pandudu'na lanapujiA' siagang kelong-kelong, siagang akkio' a'rannu-rannu pa'mai'. LaKupa'jari ke'nanga nipakalompo siagang tenamo nanihinai, siagang jaina ke'nanga pila' laKutambai.

YEHEZKIEL 37:26

LapparekKa' parjanjiang siagang ke'nanga untu' ampattantui kaamangnganna ke'nanga sa'genna satunggu-tungguna. LaKubarakkaki ke'nanga siagang laKutambai jaina ke'nanga. LaKubangungi ri pa'rasanganna ke'nanga BallakKu, lammentenga anjoreng satunggu-tungguna.

PAOLE 28:11

Lanisareko ana' majai. La'jari jai olo'-olo' piaranu siagang lalla'bi-la'bi wassele' kattoannu ri pa'rasangang Napa'janjianga Batara mae ri boe-boenu untu' Napassareang mae ri kau.

PAOLE 28:4

Nibarakkakiko, sa'genna jai ana'nu, jai wassele' kattoannu, siagang a'jari jai sapinu kammayatompa gimbala'nu.

PAOLE 30:9

Sikontu usahanu laNapa'jari ngasengi Karaeng Allata'alanu; la'jari jai ana'nu siagang olo'-olo'nu; alla'bi-la'bi wassele'na sikamma kokonnu. Sannangi nyawaNa Batara ampa'jari salewangangko, sangkamma todong sannanNa nyawaNa assarei salewangang boe-boenu.

PAOLE 7:13

LaNakamaseangko siagang laNabarakkakiko, sa'genna a'jari jai ana'nu na pila' katambang jainu. LaNabarakkaki sikamma kokonnu, sa'genna angngerang wassele' gandung, anggoro' siagang minynya' zaitun. LaNabarakkakiko sa'genna a'jari jai sapinu, bembenu siagang gimbala'nu. Sikontu anjo barakkaka lanutarimai ri pa'rasangang Napassareanga Batara mae ri kau, situru' janjinNa mae ri boe-boenu.

PAOLE 7:14

Battu ri sikontu bansaya ri lino, tena manna se're anggappa barakka' alla'bi-la'bi kammaya ikau ngaseng. Ikau ngaseng siagang sikontu olo'-olo'nu tena sikali latamanang.