PAMMILANGNGANG 4:15 - KITTA' MATANGKASA'

^15-20 Nakana Batara mae ri Musa siagang Harun, “Ri wattunna nubongkara' pakkemaanga, Harun siagang ana'na musti antamaki ri KemaKu na narangka' ngaseng sikontu barang-baranga siagang pakkakasa' niaka anjoreng. Nampami punna le'baki anjo, akkullemi tu Kehat battu untu' ambuleki. Mingka takkulleai ke'nanga anciniki, anreppesi yareka anseroi anjo barang-baranga, lanri le'ba'namo nisa'la' anjo barang-baranga untu' iNakke. Punna nagaukangi ke'nanga anjo kammaya, mattantu matei ke'nanga. Jari, sollanna natena nacappu' anjo tu Kehat battu ri suku Lewi, Harun siagang ana'-ana'na musti ansarei tugasa' ke'nanga angkanaya apa massing naerang anjo ke'nanga. Iaminjo tugasa'na tu Kehat ri wattunna nipalette' KemaKu. Eleazar, ana'na Harun tanggong jawa' mae ri sikontu KemaKu, minynya' lampua, dupaya, koro'bang gandung tuli nipatalaya, minynya' upacara siagang sikontu apa niaka ilalang ri anjo KemaKu.”

PAMMILANGNGANG 4:15 ပူးပေါင်းရင်းမြစ်များ

2 SAMUEL 15:24

Nia' tongi anjoreng Imang Zadok siagang Imang Abyatar kammayatompa sikontu tu Lewi angngerangi Patti ParjanjianNa Batara. Nipadongkoki anjo Patti Parjanjianga, siagang tena naniangkaki lalang tenanapa na'lampa ngaseng sikontu ra'yaka ambokoi anjo kotaya.

2 SAMUEL 6:13

Ri wattunna a'jappamo annang dakka sikamma tau angngangkakai anjo Patti Parjanjianga, nasuromi Daud ke'nanga ammantang. Nampa assare koro'bang mae ri Batara, iamintu sapi laki siagang ana' sapi nipakaco'mo'.

1 KARAENG-KARAENG 8:3

A'rappunna ngasemmo anjo pamimpinga, naangka'mi imang-imanga anjo Patti Parjanjianga,

1 PATTOTTORANG 15:15

Na ri wattunna nipalette' anjo Pattia, naangka'mi ke'nanga nai' ri salangganna nampa napisang siagang bulekang, situru' paratorang Napassareanga Batara tete ri Musa.

1 PATTOTTORANG 15:2

Nakanamo Daud, “Tu Lewiji bawang akkulle angngangkaki Patti ParjanjianNa Batara, nasaba' iami ke'nanga nipile ri Batara untu' ampisangi anjo Pattia, siagang allayani mae ri Ia sa'genna satunggu-tungguna.”

1 PATTOTTORANG 23:26

Lanri kammana anjo, ia KemaNa Batara siagang sikontu pakkakasa' eroka nipake untu' assambayang tenamo naparallu nipisang ri tu Lewi.”

KALAPPASSANG 19:12

Apparekko pammatei ri tammulilina anne monconga a'jari pa'baeng-baeng tenaya nakkulle nalaloi anjo bansaya. Pisangkai anjo bansaya angngambi' ri monconga, ba'lalo takkulleai ke'nanga a'reppese'. Inai-nai allaloi pa'baeng-baenna, lanihukkung matei;

KALAPPASSANG 19:21

nampa Nakanamo Batara ri ia, “Naungko nampa nupakainga' ngaseng anjo taua angkanaya takkulleai ke'nanga allaloi anjo pa'baeng-baenga untu' battu mae ancinikKa'. Punna nadakkai ke'nanga anne parentaya, jai ri ke'nanga lamate.

KALAPPASSANG 27:7

nampa nupantama' ri ponto-ponto niaka ri rua sa'rinna anjo tampa' pakkoro'bangnganga ri wattunna nibule' anjo tampa' pakkoro'bangnganga.

KAIMANGNGANG 16:13

Anjo dupaya musti natunui ri dallekanna Patti Parjanjianga, sa'genna natongko' anjo pa'rangka'na Patti Parjanjianga siagang umbunna siagang takkullea nacini' Harun, nasaba' punna naciniki, tena tamatena.

PAMMILANGNGANG 1:50

Suroi ke'nanga angngurusuki KemaKu siagang sikontu pakkakasa'na. Tugasa'na ke'nanga iamintu ampisangi KemaKu siagang pakkakasa'na kammayatompa naurusuki. Musti akkemai ke'nanga ri tammulilina.

PAMMILANGNGANG 1:51

Punna a'lettekko, tu Lewi musti ambongkaraki KemaKu, nampa napasang ammotere' ri tampa' pakkemaang berua. Pantaranganna ke'nanga, manna nai punna a'reppeseki ri anjo KemaKu musti nihukkung matei.

PAMMILANGNGANG 10:21

Le'baki anjo a'lampami suku Kehat ampisangi barang-barang matangkasaka. Punna battu ke'nanga mange ri tampa' pakkemaang berua, le'ba'mi nipaenteng poleang KemaNa Batara.

PAMMILANGNGANG 18:3

Suku Lewia musti nagaukangi kawajibanna ke'nanga mae ri kau ngaseng siagang najamai tugasa'na ke'nanga ri KemaKu; mingka takkulleai ke'nanga anreppesi tampa' pakkoro'bangnganga yareka anseroi barang-barang matangkasaka ri Kamara' Matangkasaka. Punna nadakkai ke'nanga anjo paratoranga, baji' ke'nanga kammayatompa ikau, lamatei.

PAMMILANGNGANG 3:38

Lalang ri pakkemaanga, Musa siagang Harun kammayatompa sikamma ana'na ke'nanga musti angngallei tampa' ri dallekang KemaNa Batara, ri bageang rayana. Iami ke'nanga tanggong jawa' mae ri upacara ibadaya untu' bansa Israel ri Kamara' Matangkasaka. Pantaranganna ke'nanga, manna pole inai punna napaccoba-cobai nagaukang anjo jama-jamanga musti nihukkung matei.

PAMMILANGNGANG 4:14

Nampa musti napadongko' ke'nanga irate ri anjo mejanga sikontu pakkakasa' nipakea punna nigaukang ibadaya ri anjo tampa' pakkoro'bangnganga: tampa' pepe', garpu, sude', siagang katoang. Nampa musti narangka' ke'nanga yangasenna anjo siagang silawara' kukkulu' alusu' siagang napataba kayu pa'bule'na.

PAMMILANGNGANG 7:9

Mingka tu Kehat tena nannarima karoba yareka sapi battu ri Musa, nasaba' anjo barang-barang matangkasa' lanaeranga ke'nanga musti nasompoi irate ri salangganna ke'nanga.

PAOLE 31:9

Nampa natulisi' Musa hukkunNa Karaeng Allata'ala nampa napassareang mae ri imang-imang Lewi nisarea tugasa' untu' angngurusuki Patti Parjanjianga, siagang mae ri sikamma pamimpinna Israel.

YOSUA 4:10

Sikamma imanga ammenteng tulusuki ri tangnga-tangngana Binanga Yordan sa'genna le'ba' ngaseng nagaukang anjo taua sikontu apa Naparentakanga Batara mae ri ke'nanga tete ri Yosua. Anjo kammaya sicocoki siagang pangngunju'-pangngunju' battua ri Musa mae ri Yosua. Akkaro-karomi umma' Israel a'limbang ri Binanga Yordan.

1 SAMUEL 6:19

Mingka lanri attoa'na siapa are tau ri Bet-Semes antama' ri anjo Patti Parjanjianga, nia'mo tujupulo tau ri ke'nanga mate nibuno ri Batara. Nampa natujumo susa ke'nanga nasaba' nipitujui ke'nanga ri Batara bala lompo.