PAMMILANGNGANG 18:8 - KITTA' MATANGKASA'

⁸ Nakana Batara mae ri Harun, “U'rangi! Sikontu passare nisa'la' nipassareanga mae ri Nakke, ia tenaya nitunui, iaminjo bageannu. Iaminjo bageannu le'baka nipattantu sa'genna satunggu-tungguna. Anjo Kupassareangi mae ri kau siagang mae ri jari-jarinu.

PAMMILANGNGANG 18:8 ပူးပေါင်းရင်းမြစ်များ

2 KARAENG-KARAENG 12:16

Doe' battua ri koro'bang sambe karugiang siagang battu ri koro'bang pammopporo' dosa tena nanipantamaki ri anjo pattia. Anjo doe' kammaya nipassareangi mae ri imang-imanga.

2 PATTOTTORANG 31:4

Pantaranganna anjo nasuroi karaenga pandudu' Yerusalem angngerang passare le'baka nipattantu untu' sikamma imanga siagang tu Lewia, sollanna akkulle ke'nanga amparhatikang tojeng-tojengi siagang ampassareangi sikontu wattunna untu' allayani ri Balla'Na Batara sangkamma niaka tattulisi' lalang ri hukkung-hukkunNa Batara.

2 PATTOTTORANG 31:5

Le'baki nipa'la'bang nipabattu anjo parentaya, massing angngerammi tu Israel mange ri Balla'Na Batara passarena ke'nanga iamintu massing wassele' bungasa' nagappaya ke'nanga, kammayami anggoro', tarigu, minynya' zaitun, je'ne' bani, siagang wassele' lamung-lamung maraengannaya. Angngerang tommi ke'nanga passare bage sampulona battu ri pa'barang-baranganna ke'nanga.

KALAPPASSANG 28:43

Anjo saluaraka musti tuli napakei ke'nanga punna antama' ri KemaKu yareka nareppesi tampa' pakkoro'bangnganga untu' anggaukangi ibadaya salaku imang ri Kamara' Matangkasaka, sollanna tena namate ke'nanga lanri kacinikangi bageang kalenna tenaya nasiratang nicini'. Anjo paratoranga tuli nipakei untu' Harun siagang jari-jarina.”

KALAPPASSANG 29:21

Allei sike'de' cera' niaka irate ri tampa' pakkoro'bangnganga siagang sike'de' minynya' upacara, nampa nupiracciki Harun siagang ana'-ana'na kammayatompa pakeanna ke'nanga. Kammaminjo carana Harun siagang ana'-ana'na kammayatompa pakeanna ke'nanga nisa'la' untu' iNakke.

KALAPPASSANG 29:28

Iaminne kaputusangKu tenaya nakkulle nipinra: Ri wattunna battu ummakKu ampassareangi anjo koro'bang passiamakkanga, barambanna siagang bongganna anjo olo'-oloka iami bageanna sikamma imanga. Iaminjo passarena ummakKu untu' iNakke.

KALAPPASSANG 29:29

Pakeang ibadana Harun musti nasossorangi mae ri ana'-ana'na, sollanna akkulle napake ke'nanga ri wattunna nilanti'.

KALAPPASSANG 40:13

Pipakei Harun siagang pakeang imang, siagang minynyaki sollanna nisa'la' untu' allayaniA' salaku imang.

KALAPPASSANG 40:15

Nampa minynyaki ke'nanga sangkamma batenu amminynyaki manggena ke'nanga, sollanna akkulle todong ke'nanga allayaniA' salaku imang. Lanri anjo upacara minynyaka, iami ke'nanga siagang jari-jarina anta'galaki jama-jamang kaimangnganga.”

YESAYA 10:27

Anjo wattua laKulappassangko battu ri panjallakkanna Asyur, nampa tenamo nakoasa ke'nanga mae ri kau.”

KAIMANGNGANG 21:10

Imang Lompoa le'ba'mi nilanti' ri wattu nitirikinna minynya' upacara ulunna siagang nipatabana pakeang imang lompoa ri kalenna. Lanri kammana anjo takkulleai nabalang parekang a'jari rotto' uu'na yareka nakekkeki pakeanna lanri natujuna kasusaang kamateang.

KAIMANGNGANG 23:20

Anjo rotia siagang ruang kayua gimbala' musti nipassareangi ri imanga salaku passare nipappicinikang mae ri Batara siagang iaminjo a'jari bageanna imanga. Anjo sikamma passarea matangkasaki.

KAIMANGNGANG 6:16

La'binna anjo labuka musti nipareki roti tenaya nammake pa'gambang siagang nakanrei sikamma imanga ri tampa' le'baka nipattantu untu' anjo, iamintu ri paranglakkenna KemaNa Batara. Iaminjo bageanna sikamma imanga ia Napassareanga Batara mae ri ke'nanga battu ri koro'bang nipatalaya. Anjo kanrea teai sipato' tangkasa'na, sangkamma koro'bang nipammopporanna dosaya siagang koro'bang passambe karugiang.

KAIMANGNGANG 6:18

Untu' satunggu-tungguna sikamma bura'ne jari-jarina Harun akkullei nakanre anjo rotia; iaminjo bageang attantuna ke'nanga battu ri kanre-kanreang nipassareanga mae ri Batara. Tau maraenga punna naseroi anjo kanre le'bakamo nikoro'bangkang, langgappai bala lanri koasa katangkassanna anjo koro'banga.

KAIMANGNGANG 6:20

iamintu ri passala'na koro'banga punna nilanti' jari-jarina Harun a'jari imang. Ri allo wattunna nilanti', musti assarei sikilo labu' gandung mae ri Batara. Bageruanna musti napassareangi ri wattu bari'basa', na sesanna ri wattunna karueng.

KAIMANGNGANG 6:26

Imang ampassareangai anjo koro'banga musti nakanrei anjo koro'banga ri tampa' le'baka nipattantu untu' anjo, iamintu ri paranglakkenna KemaNa Batara.

KAIMANGNGANG 7:14

Battu ri anjo a'rupa-rupaya roti musti nipassareangi sipa'gang mae ri Batara; iaminjo bageanna imang angngalleai cera'na anjo olo'-oloka nampa napatiri' mae ri tampa' pakkoro'bangnganga untu' koro'bang passiamakkang.

KAIMANGNGANG 7:28

Napassareangi Batara mae ri Musa anne paratorang-paratoranga

KAIMANGNGANG 7:6

Sikamma tu bura'nea lalang ri kaluargana imang-imanga akkullei nakanre anjo dageng koro'banga, mingka musti nakanrei ke'nanga ri tampa' le'baka nipattantu, nasaba' anjo koro'banga teai sipato' tangkasa'na.

KAIMANGNGANG 8:30

Le'baki anjo naallemi Musa sipa'gang minynya' upacaraya siagang sipa'gang cera' niaka rate ri tampa' pakkoro'bangnganga, nampa naparacci' mae ri Harun siagang sikamma ana'na kammayatompa mae ri pakeanna ke'nanga. Kammaminjo carana Musa nanasa'la'mo ke'nanga siagang pakeanna ke'nanga untu' Batara.

PAMMILANGNGANG 18:9

Battu ri passare kaminang matangkasa' tenaya nitunui irate ri tampa' pakkoro'bangnganga, anne kammaya anne untu' ikau: Koro'bang nipatala, koro'bang pammopporang dosa, siagang koro'bang passambe karugiang. Yangasenna anjo sikammaya passare matangkasa' a'jaria bageannu siagang bageanna sikamma ana'nu.

PAMMILANGNGANG 5:9

Apa-apa mamo napassareang tu Israel mae ri Batara, anjo passare nisa'la'na a'jari bageannai imang antarimayai anjo passarea.

1 KORINTUS 9:13

Tantu nuassemmi angkanaya inai-nai anjama lalang ri Balla'Na Allata'ala, battu anjoremmi ri Balla'Na Allata'ala anggappa kanre ke'nanga. Siagang inai-nai angngurusuki tampa' pakkoro'bangnganga, anggappa tongi bageang battu ri anjo koro'bang nipassareanga anjoreng.

PAOLE 12:11

Nampa lammile Karaeng Allata'alanu se're tampa' untu' lanupake anynyomba mae ri Ia. Anjoreng mako musti a'lampa angngerangi sikontu apa kuparentakanga, iamintu koro'bang nitunua siagang sikamma koro'bang maraengannaya, koro'bang bage sampulona panggappannu siagang koro'bang nupa'janjianga mae ri Batara.

PAOLE 12:6

Anjoremmi ri tampaka musti nuerang sikamma koro'bang nitunua siagang sikamma koro'bang maraenganga, passare bage sampulona panggappannu siagang passare maraengannaya, koro'bang pa'bayara' tinja'nu, koro'bang passare ero' kalennu, kammayatompa ana' sapi, ana' bembe, siagang ana' gimbala' bungasa' lassuka.

PAOLE 18:1

“Sikontu suku Lewi nisarei tugasa' a'jari imang; lanri kammana takkulleai ke'nanga annarima bageang butta ri Israel. Anjo ke'nanga musti attallasaki battu ri sikamma passare siagang koro'bang-koro'bang maraengannaya nipassareanga mae ri Batara.

PAOLE 26:13

angkana mako ri Karaeng Allata'alanu, ‘Battu ri bage sampulona wassele' kattoang mustia nipassareang mae ri Katte, Batara, tena manna sike'de' ammantang ri ballakku; yangasenna le'ba'mi kupassareang mae ri tu Lewi, tubattu-battua, ana'-ana' kukanga siagang jandaya, sangkamma Naparentakanga Karaeng Allata'ala mae ri nakke. Battu ri parenta-parentaNa Batara ri passala'na passare bage sampuloa battu ri panggappanga, tena manna sirupa kudakkai.

IBRANI 1:9

MangngaiKo ri kaadelanga, birisikKo ri kajekkonganga; iaminjo saba'na, naNapileKo Allata'ala, iamintu Allata'alaNu, na Nasareko kalompoang, langngeranga karannuang, la'bianganga na agang-aganNu.”

1 YOHANES 2:20

Mingka nutarimami RohNa Allata'ala, le'baka Napaturung Isa Almasi. Iaminjo saba'na nanuassemmo pangngajarang tojenga.

1 YOHANES 2:27

Mingka ri passala'na kalennu ngaseng, le'ba'mi Napaturung Almasi RohNa mae ri kau ngaseng. Na lalang nia'na RohNa ri kau ngaseng, tenamo naparallu nia' tau angngajarakko. Nasaba' iaminjo RohNa angngajarakko untu' sikontu passalaka; na anjo apa Napangngajarranga kontutojengi, teai balle-balle. Lanri kammana, paralluko mannuruki ngaseng mae ri anjo apa Napangngajarranga; siagang paralluko tuli asse're siagang Almasi lalang ri katallassannu.