PAMMILANGNGANG 18:5 - KITTA' MATANGKASA'

⁵ Ikauji bawang, Harun, siagang sikamma ana'-ana'nu musti anggaukangi tugasa' lalanga ri Kamara' Matangkasaka siagang tampa' pakkoro'bangnganga, sollanna tenamo naKularro poleang mae ri bansa Israel.

PAMMILANGNGANG 18:5 ပူးပေါင်းရင်းမြစ်များ

1 PATTOTTORANG 23:24

Iaminjo areng-arenna turunganna Lewi, ia niaka nicata' situru' areng kapala pa'rappungang bijanna siagang massing kaluargana ke'nanga. Umuru'na ke'nanga ruampulo taung siagang rateangannaya na nisare tugasa' lalang ri Balla'Na Batara.

1 PATTOTTORANG 23:32

Nisare tongi tugasa' ke'nanga untu' amparakai KemaNa Batara kammayatompa Balla'Na Batara, siagang ambantui sikamma sari'battanna ke'nanga, iamintu sikamma imang turunganna Harun, untu' anggaukangi passambayanganga ri anjo tampaka.

1 PATTOTTORANG 24:5

Nasaba' baji' nalalang ri turunganna Eleazar, kammayatompa lalang ri turunganna Itamar, nia' pajaba'-pajaba' Balla'Na Batara siagang pamimping-pamimping agama, jari untu' anjo pambageang tugasaka niallemi nigoccang.

1 PATTOTTORANG 9:19

Ia nisarea tugasa' anjagai pakke'bu' antamaya ri KemaNa Batara iamintu Salum siagang yangasenna bijanna, iamintu kammaya Korah. (Salum iamintu ana'na Kore, cucunna Ebyasaf.) Riolo boe-boena todong ke'nanga anggaukangi anjo tugasaka ri wattunna allayani ke'nanga ri KemaNa Batara.

1 PATTOTTORANG 9:23

Appakkaramulai anjo wattua ia ke'nanga siagang turunganna ke'nanga tuli a'jarimi pajaga pakke'bu' lompona Balla'Na Batara.

1 PATTOTTORANG 9:33

Sipa'gang tu Lewi maraengannaya, iami tugasa' anjari pakelong lalang ri Balla'Na Batara. Sikamma kapala-kapala kaluargana ke'nanga ammantangi ri siapa are bangunang ri Balla'Na Batara. Tena nisarei ke'nanga tugasa' maraeng, lanri tugasa' allo bangngi ke'nanga.

KALAPPASSANG 27:21

Harun siagang sikamma ana'na musti angngurusuki anjo lampua battu ri karueng sa'genna bari'basa' ri tampa' kahaderangKu, pantaranna kaeng ta'gentunga ri dallekanna Patti Parjanjianga. Anjo parentaya musti nigaukangi untu' satunggu-tungguna ri tu Israel siagang sikontu jari-jarina.”

YEREMIA 23:15

Nakana Batara Kaminang Koasaya, “LaKusarei anjo sikamma na'bia ri Yerusalem lamung-lamung pai' untu' nakanre siagang racung untu' nainung, lanri passabakkang iaminjo ke'nanga nasikontu taua ri pa'rasanganga tenamo napakalompoA'.”

YEHEZKIEL 44:15

Nakana Batara Kaminang Tinggia, “Ri wattungKu nabokoi bansa Israel, imang-imang tu Lewi battua ri jari-jarina Zadok tamamminrayai allayaniA' lalang ri BallakKu. Lanri kammana anjo iami anjo ke'nanga musti allayaniA' siagang battu mae ri dallekangKu untu' angngerang passare janna siagang cera'na sikamma koro'banga.

YEHEZKIEL 44:16

Ke'nangaji bawang akkulle antama ri BallakKu, allayaniA' ri tampa' pakkorobangngangKu, siagang ampimpingi ibadaya ri BallakKu.

KAIMANGNGANG 10:6

Nampa nakana Musa mae ri Harun siagang sikamma ana'na maraenga, iamintu Eleazar siagang Itamar, “Teako lappassangngi akkara'ngasa' uu'nu siagang teako kekkeki pakeannu lanri ero'na nupappicinikang angkanaya si'nako lanri kamateangko. Punna kamma anjo nugaukang, lamateko, siagang sikontu umma' Israel lanikalarroi ri Batara. Mingka sikontu umma' Israel maraenga akkulle si'na lanri anjo tau ruaya mate nakanrei pepe'Na Batara.

KAIMANGNGANG 24:3

Harun musti naatoroki anjo lampu-lampua battu ri karueng sa'genna bari'basa' ri tampa' kahaderanNa Batara, ri pantaranna gordeng antongkokai Patti Parjanjianga ri Kamara' Kaminang Matangkasaka. Anjo parentaya musti nigaukangi sa'genna satunggu-tungguna.

ZAKHARIA 10:3

Nakana Batara, “Sanna' larroKu mae ri tukoasa ammarentaya ri ummakKu, siagang laKuhukkungi ke'nanga. Mingka pandudu'na Yehuda iNakke ampatangi, siagang iNakke, Batara Kaminang Koasaya lamparakai ke'nanga. LaKupa'jari ke'nanga rapang jarang pa'bundukang makassaka untu' iNakke.

PAMMILANGNGANG 1:50

Suroi ke'nanga angngurusuki KemaKu siagang sikontu pakkakasa'na. Tugasa'na ke'nanga iamintu ampisangi KemaKu siagang pakkakasa'na kammayatompa naurusuki. Musti akkemai ke'nanga ri tammulilina.

PAMMILANGNGANG 1:53

Mingka tu Lewi musti akkemai ri tammulilina KemaKu. Musti najagai ke'nanga sollanna tena tau anrepesi sa'gengKu larro siagang Kuhukkungi umma' Israel.”

PAMMILANGNGANG 16:46

nampa nakana Musa mae ri Harun, “Allei tampa' pepe'nu, bonei siagang bara pepe' battu ri tampa' pakkoro'bangnganga siagang bonei dupa irateanna. Erangi linta' mae ri ummaka siagang gaukangi upacara pammopporang dosaya untu' ke'nanga. Lintakko! A'rinrami larroNa Batara siagang appakkaramulami garringa.”

PAMMILANGNGANG 18:4

Musti anjamai ke'nanga siagang ikau, kammayatompa nagaukangi tugasa' niaka passisambunganna siagang sikamma palayananga lalang ri KemaKu; mingka tenaya nanisarei ha' untu' anjo jama-jamanga, tena nipa'biangi anjama siagang ikau.

PAMMILANGNGANG 8:19

nampa anjo tu Lewia Kupassareangi mae ri Harun siagang sikamma ana'-ana'na, sollanna akkulle nagaukang tugasaka untu' tu Israel lalang ri KemaKu. Kammayatompa sollanna appala' ke'nanga pammopporokKu untu' bansa Israel, sollanna anjo bansaya tena natujui bala punna battui ke'nanga a'reppese' dudu ri anjo tampa' matangkasaka.”

PAMMILANGNGANG 8:2

“Pauangi Harun angkanaya punna napataba anjo tujua lampu mae ri anjo bangkeng lampua, musti napataba bajiki sollanna akkulle nasingari bageang dallekanna anjo lampua.”

1 TIMOTIUS 1:18

Anakku, Timotius! Kupappirannuangi anne jama-jamanga mae ri kau, lanri kuu'ranginna pappasanNa Allata'ala, napabattua na'bi-na'bia ri tangnga-tangngana jama'aka ri passala'na kalennu. Parallui nupa'jari sanrapang bokong anjo pappasanga, lalang jama-jamang bajika.

1 TIMOTIUS 3:15

sollanna punna tenapa nakulinta' battu, nuasseng memammi angkana antekamma bateta musti attallasa' salaku ana'-ana'Na Allata'ala, iamintu jama'aNa Allata'ala mattallasaka. Iaminne jama'aka a'jari sanrapang benteng panjarrekinna siagang pattumpa'na katojengang battua ri Allata'ala.

1 TIMOTIUS 5:21

Ri dallekanNa Allata'ala, Isa Almasi, siagang malaeka'-malaeka' nipileNa, kupala' tojeng-tojengi ri kau sollanna nuturuki anne pappakaingaka; teako ranggaselai manna ri nai, siagang teako assialle-alleangangi.

1 TIMOTIUS 6:20

Timotius! Katutui bajiki anjo apa nipappirannuanga ri kau! Pakabellai kalennu battu ri pa'bicarang tenaya matu-matunna siagang passigea'-geakkang ri apa-apa nikanaya “Pangngissengang”, nampa teaiji pangngissengang.