PA'JARIANG 46:1 - KITTA' MATANGKASA'

¹ Naparutusu'mi Yakub sikamma pa'barang-baranganna, nampa a'lampa. Anrapiki ke'nanga ri Bersyeba, assaremi koro'bang mae ri Allata'ala, Ia nasombaya Ishak, manggena.

PA'JARIANG 46:1 ပူးပေါင်းရင်းမြစ်များ

PA'JARIANG 12:8

Le'baki anjo napatulusu'mi jappana a'lampa timboro', ri daera a'bontoa irayanganna kota Betel nampa akkema ri alla'na kota Betel siagang kota Ai. Betel ilaukang siagang Ai irayangngang. Ambangung tommi anjoreng tampa' pakkoro'bangngang nampa anynyomba ri Batara.

PA'JARIANG 21:14

Ammukona bari'basa', nasaremi Abraham kanre Hagar siagang se're pammoneang je'ne' untu' a'jari bokong ri lampana. Napadenge'mi anjo anaka ri dongko'na Hagar, nampa nasuro anjo bainea a'lampa. A'lampami Hagar mange ri parang lompona Bersyeba.

PA'JARIANG 21:31

Kammaminjo naniaremmo anjo tampaka Bersyeba, nasaba' anjoremmi anjo tau ruaya massing assumpa.

PA'JARIANG 21:33

Nampa a'lamummo Abraham se're poko' kayu niarenga tamariska ri Bersyeba, siagang appakkaramula anjo wattua napakemi anjo tampaka untu' anynyomba ri Batara, Allata'ala mannannunganga.

PA'JARIANG 22:13

Assailemi Abraham mae ri tammulilina anjo tampaka, nampa nia'mo nacini' sikayu gimbala' laki ia tassambanga tanru'na ri rompo'-rompoka. Naallemi Abraham anjo gimbalaka nampa napassareang mae ri Batara untu' a'jari koro'bang tunuang sambe ana'na.

PA'JARIANG 28:10

Nabokoimi Yakub Bersyeba nampa a'lampa mange ri Haran.

PA'JARIANG 28:13

Na ri sa'rinna ammentemmi Batara siagang Nakana, “INakkemi Batara, Allata'ala napakalompoa Abraham siagang Ishak. LaKupassareangi mae ri kau siagang mae ri turungannu anne butta nupanra'baia.

PA'JARIANG 31:42

Ebara' angkana tena Najagaia' Allata'alana boeku, iamintu Allata'ala napakalompoa Abraham siagang Ishak, ma'nassa salloma' le'ba' kisuro a'lampa tanggappaya apa-apa. Mingka Naparhatikangi Allata'ala kasusaangku siagang jama-jamang le'baka kugaukang, nampa ri bangngia le'ba'mi Napassareang apa Napattantua.”

PA'JARIANG 31:53

Allata'ala napakalompoa Abraham siagang manggeku Nahor la'jari haking mae ri katte.” Nampa assumpamo Yakub lanri Allata'ala nasombaya Ishak, manggena, untu' anrupai anjo janjinna.

PA'JARIANG 33:20

Nampa ambangung tampa' pakkoro'bangngang anjoreng ri tampaka. Naaremmi “El, Allata'alana Israel”.

PA'JARIANG 35:7

Ambangummi Yakub anjoreng se're tampa' pakkoro'bangngang nampa naareng anjo tampaka “El-Betel”, lanri le'ba'na Napappicinikang KalenNa Allata'ala ri ia anjoreng, ri wattu larina battu ri daenna.

PA'JARIANG 4:4

Na naalle tommo Habel kalase'renna ana' gimbala' bungasa'na, nanasamballe, nampa nakoro'bangkang bageang kaminang bajika mange ri Batara. Sannammi nyawaNa Batara mae ri Habel siagang anjo koro'bang napassareanga.

PA'JARIANG 45:28

Nakanamo, “Tallasa' iji anakku Yusuf! Iaji anjo bawang kukaeroki! Musti a'lampa' mange anciniki ri tenanapa kumate.”

PA'JARIANG 8:20

Appaentemmi Nuh se're tampa' pakkoro'bangngang ri Batara. Nampa angngallemi tassikayu-kayunna massing tassirupaya jangang-jangang siagang olo'-olo' maraengannaya ia hallalaka, nampa napassareang a'jari koro'bang nitunua irate ri anjo tampa' pakkoro'bangnganga.

AYUB 1:5

Punna le'ba' anjo massing pa'gaukanga, tuli ambangung bari'basaki Ayub nampa assare koro'bang untu' tungga'-tunggala' ana'na sollanna nipammopporang ke'nanga ri Batara. Saba' nakana pikkiranna Ayub, gassingka dorakami anjo ana'-ana'na siagang nahinai Allata'ala natanaassenga kalenna.

AYUB 42:8

Jari, angngalleko kamma-kamma anne tuju kayunna sapi laki siagang tuju kayunna bembe laki, nampa a'lampako mange ri Ayub. Passareang ngasengi anjo sikammaya, a'jari koro'bang untu' kalennu. Lappala' doangi Ayub untu' ikau ngaseng, nampa laKupilangngeri pappala' doanna. Tena nalaKupakasirikko, manna nusiratang annarima hukkungang. Teai kammatojenga nupau ri passala'na KalengKu, mingka Ayub napaui kammatojenga.”

AMOS 7:9

Tampa'-tampa' napakea jari-jarina Ishak untu' anynyomba laniancuruki. Tampa'-tampa' matangkasa'na tu Israel laniruntungi. LaKuputtai jari-jarina Yerobeam.”

LAMPA-LAMPANA 7:15

A'lette'mi Yakub mae ri Mesir. Nanjoremmo mate siagang boe-boeta.

YOSUA 24:4

nampa Kusare anjo Ishak rua ana', iamintu Yakub siagang Esau. Anjo Esau Kusarei daera pa'moncongang Edom a'jari pisakana, mingka Yakub, anjo boe-boenu, a'letteki mange ri Mesir, siagang ana'na ngaseng.

1 SAMUEL 3:20

Iaminjo saba'na na sikontu umma' Israel battua ri sikontu anjo pa'rasanganga namangakuimi angkanaya anjo Samuel na'biNa Batara. Kere-kere wattu na'bicara Samuel, sikontu bansa Israel mappilangngeri ngasengi. Tuli Napappicikikang iji KalenNa Batara ri Silo, ri tampa' uru NapappicinikanNa KalenNa mae ri Samuel Na'bicara siagang ia.

1 SAMUEL 8:2

Ana'na toaya niarengi Yoël, na makaruaya niarengi Abia. A'jari hakingi ke'nanga ri Bersyeba.