PA'JARIANG 42:21 - KITTA' MATANGKASA'

²¹ Nampa nakanamo massing para ia ke'nanga, “Kamma-kamma anne nihukkung maki' passabakkang salanta mae ri anditta pirangngalloang; appala' tulungi mingka tena nijampangi, manna nasessamo nicini'. Iaminjo saba'na nakianggappamo sessa ri kamma-kammaya anne.”

PA'JARIANG 42:21 ပူးပေါင်းရင်းမြစ်များ

PA'JARIANG 41:9

Nakanamo pangngurusu' inunganga ri karaenga, “Anne alloa musti namangakui kasalanna atanta.

PA'JARIANG 44:16

Appialimi Yehuda angkana, “Apa akkulle nagaukang ikambe karaeng? Antekamma batena ikambe akkulle assassala' yareka ampattojengi kalenna ikambe? Nasungkemi Allata'ala kasalanna ikambe. Kamma-kamma anne ikambe anne a'jari ata ngaseng maki' mae ri katte, karaeng; teai ri ia bawang kipanggappaya anjo cangkiri' peraka.”

PA'JARIANG 45:3

Nakanamo Yusuf ri anjo sikamma sari'battanna, “Inakke minne Yusuf. Attallasa' iji bapa'?” Nacini'na anjo kammaya, malla' sikalimi anjo sikamma sari'battanna, sa'genna takkullea appiali.

PA'JARIANG 50:15

Ri matenamo manggena ke'nanga, nakanamo sikamma sari'battanna Yusuf, “Antekamma ebara' angkana napammoli'-molikangki' Yusuf nampa nabalasa' anjo kaja'dallanta pirangalloang?”

2 SAMUEL 12:13

Nampa nakanamo Daud ri Natan, “Dorakama' mae ri Batara.” Appialimi Natan angkana, “Le'ba' maki' Napammopporang Batara; jari tena kilamate karaeng.

1 KARAENG-KARAENG 17:18

Nakanamo anjo jandaya ri Elia, “AtanNa Allata'ala, angngapa nakigaukang anne kammaya mae ri nakke? Apaka battuki' mae untu' a'jari saba' naNau'rangi Allata'ala dosaku, sa'genna musti mate anakku?”

PANGNGEBARANG 21:13

Inai taeroka mappilangngeri ri kunrarenna tau kakuranganga, tena todong nalaniparhatikang punna appala' tulung.

PANGNGEBARANG 28:17

Tau ammunoa tulusu' kammai tuniondang na kasia' sa'genna narapi' a'jala'na; manna sitau takkulle antahangi.

YEREMIA 2:17

Kalennu tonji a'jari passabakkang sikontu apa kajarianga mae ri kalennu, lanri ri wattunnu Kuulu ri pa'jappannu, ma'bokoko ri Nakke, Karaeng Allata'alanu

YEREMIA 2:19

Kaja'dallannu tonji anghukkungi kalennu, nisessako lanri nusorongbokoA', iNakke, Allata'alanu. Kamma-kamma anne kasia'mi pai'na siagang paccena punna nubokoiA' siagang tena nupakalompoA'. INakke, Karaeng Allata'alanu anne le'ba' a'bicara; iNakkemi Karaeng Allata'ala Kaminang Tinggia siagang Makoasaya.”

YEREMIA 4:18

Yehuda, kalennu tonji ampabattui anjo balaya mae ri kalennu. Batenu attallasa' siagang sikamma panggaukannu a'jari passabakkang mae ri sikontu anjo passessa ampa'rissiai atinnu.

HOSEA 5:15

LaKubokoi ummakKu sa'genna sukku'mo pa'risi'na ke'nanga lanri dosa-dosana, nampa battu ke'nanga amboyA'. Nakulle kapang lalang ri kapa'risanna ke'nanga nalappattujuammo amboyA'.”

PAMMILANGNGANG 32:23

Mingka u'rangi, punna tena nurupai janjinnu, dorakako mae ri Batara siagang lanihukkungko lanri anjo dosanu.

MATIUS 7:2

Nasaba' antekamma batenu mangngadeli ri parannu tau, kamma tomminjo batenu laniadeli ri Allata'ala. Siagang pa'baku' apa nupake ambakuki parannu tau, ia tomminjo sallang pa'bakuka laNapake Allata'ala ambakukko.

MARKUS 9:48

Anjoreng takkulleai mate rinrana pepeka, siagang takkulleai mate oloka.

LUKAS 16:28

Nasaba' nia' lima sari'battangku anjoreng. Kisuro sai Lazarus ampakaingaki ke'nanga, sollanna tena lalo natu'guru' todong ke'nanga antama' ri tampa' passessaya anne.’

LAMPA-LAMPANA 19:18

Jaimi tau tappakamo ri Isa battu ammangakui ri dallekanna tau jaia sikamma panggaukang salana ke'nanga ri wattu allaloa.

YAKOBUS 2:13

Nasaba' talaNapa'nyatayai pangngamaseanNa Allata'ala mae ri tau tenaya nangngasseng mangngamaseang. Mingka la'bi jarrekangangi pangngamaseanga na anjo hukkunganga!

1 YOHANES 1:9

Mingka punna nimangakui dosa-dosata mae ri Allata'ala, laNarupaimi janjinNa siagang laNagaukammi apa-apa adeleka mae ri katte. LaNapammopporangi dosa-dosata siagang laNatangkasiki' battu ri sikontu kaja'dallanga.

HAKING-HAKING 1:7

Angkanami Adoni-Bezek, “Riolo nia' tujupulo karaeng le'ba' kupolong anrong limanna siagang anrong bangkenna; nampa kusare ke'nanga angkanrei sesa-sesa kanre tu'guruka battu ri mejangku. Kamma-kamma anne Nagau'ma' Allata'ala sangkamma apa le'baka kugaukang mae ri ke'nanga.” Nierammi Adoni-Bezek mange ri Yerusalem. Nanjoremmo mate.