PA'JARIANG 4:10 - KITTA' MATANGKASA'

¹⁰ Nakanamo Batara, “Angngapa nugaukangi anjo panggaukang palla' kammaya? Akkio'-kioki cera'na andi'nu battu rawa ri buttaya, sanrapang sa'ra annuntuka pa'balasa'.

PA'JARIANG 4:10 ပူးပေါင်းရင်းမြစ်များ

PA'JARIANG 18:20

Nampa Nakana pole Batara mae ri Abraham, “Nia' tuduhang lompo mae ri kota Sodom siagang Gomora, siagang anjo ke'nanga memang teai sipato' lompona dosana.

PA'JARIANG 3:13

Akkuta'nammi Karaeng Allata'ala ri anjo bainea angkana, “Angngapa nugaukangi anjo kammaya?” Appialimi angkana, “Nitipua' ri ularaka, sa'genna kukanre anjo rappoa.”

PA'JARIANG 9:5

Sikamma taua siagang olo'-olo' ammunoa rupatau laKuhukkung matei.

2 PATTOTTORANG 28:9

Nia' sitau na'biNa Batara niarenga Oded ammantang ri kota Samaria. Ri se'reang wattu ammotereki tantara Israel angngerang tunitahang battu ri Yehuda. Battumi Oded anruppai ke'nanga ri wattunna lantama' ke'nanga ri kotaya. Nakanamo ri ke'nanga, “Le'ba'mi nubeta tu Yehuda lanri larroi Karaeng Allata'alana boe-boenu mae ri ke'nanga. Mingka Nalangngereki Batara antekamma palla'nu ambunoi anjo tantara Yehuda.

AYUB 16:18

He buttaya, teako cokkoi ri nakke kaja'dallanga; teako pammakkangngi pakkiokku appala' kaadelang.

AYUB 24:12

Ri kota-kotaya kalangngerang sa'ra kunrarenna tau lamate duduamo, tau lokoka akkio' appala' niballei, mingka taNapilangngeriai pappala' doanna ke'nanga; taerokai anjampangi.

PAMMUJI 50:21

Iaminjo nugaukang, mingka a'merekijA' bawang, jari nupikkiri'mi angkana sangkammA' ikau. Mingka kamma-kamma anne Kucallako, na yangasenna anjo Kupa'nyatai mae ri kau.

PAMMUJI 72:14

Nalappassangi ke'nanga battu ri panjallakkanga siagang katerassanga, saba' lompoi anggaranna katallassanna ke'nanga mae ri ia.

PAMMUJI 9:12

Pujimi Batara ammarentaya ri Sion! Caritai bate pare'Na mae ri bansa-bansaya!

PAMMUJI 9:13

Nasaba' Nau'rangi tau pa'risika taNakaluppaiyai piraunna ke'nanga; Nahukkungi tu pallaka panggaukanna.

KALAPPASSANG 3:7

Nampa Nakanamo Batara, “Kucini'mi kasessanna ummakKu ri Mesir, siagang Kulangngere'mi pakkio'na ke'nanga, ampalaki nilappassang battu ri sikamma tau anjallakkangai ke'nanga. Sikontutojenna Kuasseng ngasengi kasessanna ke'nanga.

YESAYA 5:7

Saba' koko anggoro'Na Batara Kaminang Koasaya iamintu umma' Israel, siagang tu Yehuda iami poko' anggoro' Nalamunga. Battu ri ke'nangami Naminasai kaadelanga, mingka kapallakkanji napa'nia'. Naminasai ke'nanga appaenteng katojengang, mingka karru'ji appala' kaadelang napanai'.

PAMMILANGNGANG 35:33

Punna nugaukangi anjo kammaya, nura'massimi butta nupammantangngia. Anjo pammunoanga nara'massi pa'rasanganga; jari tena cara maraeng untu' antangkasi anjo pa'rasanganga pantaranganna angkanaya musti niallei nyawana anjo tau ammunoa.

LAMPA-LAMPANA 5:3

Nakanamo Petrus, “Ananias, angngapa nanupassareang atinnu nakoasai Billisika, sa'gennu a'balle-balle ri RohNa Allata'ala? Iamintu nuboli' cokko-cokkoi untu' kalennu tawaruanna doe' ballinna anjo tanaya?

LAMPA-LAMPANA 5:9

Nakanamo Petrus ri ia, “Angngapa nusikongkolo' siagang bura'nennu ero' ancobai RohNa Batara? Pilangngerimi! Ammotere'mi tau mangea antarawangi bura'nennu. Lanaerang tongko ke'nanga assulu'.”

PAOLE 21:1

“Ebara' angkana ri anjo pa'rasangang Napassareanga Karaeng Allata'alanu nia' tau nigappa mate nibuno ri kokoa nampa taniassenga angkana inai ambunoi.

IBRANI 11:4

Lanri tappa'na, nanapassareang Habel koro'banga mae ri Allata'ala, iamintu koro'bang bajikanganga na koro'bang napassareanga Kain. Lanri ia anjo tappa'na, nanitarimamo Habel ri Allata'ala a'jari tau baji'; nasaba' ma'nassami angkana nitarimai ri Allata'ala koro'banna. Matemi Habel, mingka lanri anjo tappa'na, tuli a'bicarana ija sa'genna kamma-kamma anne.

IBRANI 12:24

Isa nudallekang patteteang amparekai anjo parjanjiang berua; cera' nipa'ba'basaka nudallekang, iamintu cera' ampattantui la'bi baji'na apa-apaya, naia napattantua cera'na Habel.

YAKOBUS 5:4

Tanubayarrai gajina sikamma tungnganre gajia ri kokonnu. Kamma-kamma anne pilangngerimi kunrarenna ke'nanga! Sikamma tau ampasse'reai wassele'na kokonnu akkiok-kio'mi appala' tulung mae ri Allata'ala; siagang Nalangngere'mi Allata'ala, Batara Kaminang Koasaya anjo pakkio'na ke'nanga.

YOSUA 7:19

Nakanamo Yosua ri Akhan, “Na', mangakuimi siagang paumi silambusu'na anrinni ri dallekanNa Batara, Allata'alana Israel, apa le'baka nugaukang. Pauamma', teako cokkoi.”

1 SAMUEL 13:11

Mingka akkuta'nammi Samuel angkana, “Apa anjo le'ba' nagaukang karaenga?” Appialimi Saul angkana, “Kuciniki ra'yaka appakkaramulami ambokoia', nampa tenaki' battu situru' wattu le'baka kitantukang. Na nampa pole nia'mi tu Filistin a'rappungang ri Mikhmas.