PA'JARIANG 35:5 - KITTA' MATANGKASA'

⁵ Ri wattu a'lampana Yakub siagang rombonganna, nipibattuimi malla' ri Allata'ala sikontu tau niaka ri anjo kotaya, sa'genna tena nabarani ke'nanga angngondangi Yakub siagang rombonganna.

PA'JARIANG 35:5 ပူးပေါင်းရင်းမြစ်များ

PA'JARIANG 34:30

Nakanamo Yakub ri Simeon siagang Lewi, “Nususai ngasemma' antu. Kamma-kamma anne inakke nakabirisima' tu Kanaan, tu Feris kammayatompa sikontu tau niaka anrinni ri pa'rasanganga. Ikatte taunta tena najai. Punna asse're ngaseng anjo taua angngewa' siagang ambundukia', sikontu bija pammanakanta akkulle ngasengi naancuru'.”

PA'JARIANG 35:4

Nampa napassareammo ke'nanga sikamma patung niaka ri ke'nanga mae ri Yakub, iamintu patung rewata tumaraenga. Kammayatompa anting-antinna ke'nanga napassareang ngaseng tommi. Yangasenna anjo barang-barang kammaya nalamungammi Yakub ri rawanganna poko' kayu lompoa ri ampi'na kota Sikhem.

2 PATTOTTORANG 14:13

Majumi Asa siagang tantarana angngondangi ke'nanga sa'genna mange ri Gerar bellana. Jai sikali tantarana tu Sudan mate sa'genna tenamo kagassinganna ke'nanga lanri niancuruki ri Batara, kammayatompa jai sikalimi barang-baranna ke'nanga nirampasa' ri tantara Yehuda. Nampa naancuru' tantara Yehuda kota-kota niaka ri ampi'na daera Gerar, lanri nipa'jari malla'na pandudu'na ri Batara. Narampasaki tantara Yehuda sikontu anjo kotaya siagang sanna' jaina barang-barang nagappa ke'nanga.

2 PATTOTTORANG 17:10

Napa'jari malla' kabusuki Batara sikontu kakaraengang niaka ri tammulilina Yehuda untu' a'bundu' angngewai Karaeng Yosafat.

PAMMUJI 105:14

Mingka tena Nalappassangi Batara manna inai anjallakkangi ke'nanga; Napakaingaki sikamma karaenga lanri ke'nanga, Nakana,

PAMMUJI 14:5

Tau ja'dalaka lasanna' malla'na, saba' Nala'langi Allata'ala tu mannurukia ri Ia.

KALAPPASSANG 23:27

Sikamma bansa nubattuia laKupa'jari malla' ngasengi mae ri Nakke; laKukacoi ke'nanga; sikontu musunnu la'giling ngasengi nampa lari.

KALAPPASSANG 34:24

Punna le'ba'mo Kubongka sikamma bansa-bansaya battu ri dallekannu siagang Kupakaluara' daeranu, tena manna sitau barani langngallei pa'rasangannu ri wattunnu a'lampa untu' ampakalompoi Allo Lompo Passua'-suarrang Roti Tenaya Nammake Pa'gambang, Allo Lompo Pakkattoang, siagang Allo Lompo Pa'ballakang Leko'-leko' Kayua.

PAOLE 11:25

Ri sikontu anjo pa'rasanganga laNapa'jari malla' ngasengi Karaeng Allata'alanu sikontu taua mae ri kau sangkamma le'baka Napa'janjiang, sa'genna manna sitau tania' akkulle anrompaiko.

PAOLE 2:25

Appakkaramula anne alloa laKupa'jariko tunikamallakkang ri bansa-bansaya ri kere-keremae. Sikamma taua lannekkereki napakamma malla' punna nalangngereki kabara'nu.’ ”

YOSUA 5:1

Sikontu karaenna tu Amori ilaukanna Binanga Yordan, siagang sikontu karaenna tu Kanaan ri birinna Tamparang Tangngaya nalangngereki kabara'na angkanaya le'baki Napa'jari kalotoro' Batara anjo je'ne'na Binanga Yordan lalang a'limbanna umma' Israel ri anjo binangaya. Jari a'jari malla'mi siagang annekkere'mi ke'nanga napakamma tu Israel.

1 SAMUEL 11:7

Sanna'mi larrona. Na naallemo ruang kayu sapi nampa napolong na nakere' a'jari jai kere'na. Nampa nakiring anjo kerek-kerekanga mae ri sikontu pa'rasangang Israel, na naparentakang angkana, “Inai-nai tena namaju ampinawangi Saul siagang Samuel a'bundu', lanikerek-kere' tongi sapi-sapinna kamma anne!” Malla'mi bansa Israel ri apa akkullea Nagaukang Batara. Jari yangasenna taua, sadia ngasemmi untu' maju sipa'rurungang a'bundu'.

1 SAMUEL 14:15

Passabakkang ia anjo kajarianga, gegere'mi tu Filistin ri kemana siagang ri sikamma paranga. Sikontu ra'ya' Filistin kammaya niaka ri balla'-balla' jagaya, siagang pa'rappungang paellaka a'jari malla' ngasemmi; ba'lalo kamma ta'ge'goso'mi buttaya, siagang sanna'mi siricu-ricuinna ke'nanga.