PA'JARIANG 31:42 - KITTA' MATANGKASA'

⁴² Ebara' angkana tena Najagaia' Allata'alana boeku, iamintu Allata'ala napakalompoa Abraham siagang Ishak, ma'nassa salloma' le'ba' kisuro a'lampa tanggappaya apa-apa. Mingka Naparhatikangi Allata'ala kasusaangku siagang jama-jamang le'baka kugaukang, nampa ri bangngia le'ba'mi Napassareang apa Napattantua.”

PA'JARIANG 31:42 ပူးပေါင်းရင်းမြစ်များ

PA'JARIANG 11:5

Nanaummo Batara untu' anciniki anjo kotaya siagang menara nabangunga rupataua.

PA'JARIANG 16:11

Tasalloami nulallassukang ana' bura'ne; arengi sallang Ismael anjo anaka, nasaba' Nalangngere'namo Batara karru'nu.

PA'JARIANG 16:13

Akkuta'nammi Hagar lalang ri pa'mai'na angkana, “Maka kucini' tojemmi Allata'ala, Ia anjampangiai kalengku?” Naaremmi anjo Batara a'bicaraya ri kalenna, “Allata'ala Manjampangia”.

PA'JARIANG 27:33

Appakkaramulami annekkere' sibatu kalenna Ishak, siagang akkuta'nammi angkana, “Punna kamma, inai anjo sumpadeng battua assoso' nampa naerang mae ri nakke? Le'ba'mi kukanre ri tenanapa nubattu. Nampa le'ba'mi kupassareang barakkakku kala'busanga mae ri ia, nakamma-kamma anne iami pata anjo barakkaka sa'genna satunggu-tungguna.”

PA'JARIANG 29:32

Attianammi Lea nampa allassukang sitau ana' bura'ne. Nakanamo Lea, “Nacini'mi Batara kasusaangku, nakamma-kamma anne lanangaima' bura'nengku.” Nampa naaremmo anjo anaka Ruben.

PA'JARIANG 31:12

Nakanamo pole anjo malaekaka, ‘Ciniki, sikontu anjo bembe laki sitabanga a'laki, a'buriki, a'batti'-battiki siagang a'ballangi. Kukunjungi angngerangi anjo mae ri kau, nasaba' Kucini' ngasemmi apa nagaukanga Laban mae ri kau.

PA'JARIANG 31:24

Ri wattunna bangngi battumi Allata'ala mae ri Laban lalang so'na, na Nakana, “Tutuko, tea' laloko garattaki Yakub manna sibuku kana.”

PA'JARIANG 31:29

Gannaki kagassingangku untu' a'gau' ja'dala' ri kau punna erokka'. Mingka ri bangngia niaki Allata'ala napakalompoa manggenu ampakaingaka' sollanna tena sikali kugarattakko.

PA'JARIANG 31:5

Nampa nakanamo Yakub ri ke'nanga, “Kuciniki bapa'nu tena nabaji' sangkamma biasa mae ri nakke, mingka Allata'ala nipakala'birika ri manggeku anjagaia'.

PA'JARIANG 31:53

Allata'ala napakalompoa Abraham siagang manggeku Nahor la'jari haking mae ri katte.” Nampa assumpamo Yakub lanri Allata'ala nasombaya Ishak, manggena, untu' anrupai anjo janjinna.

PA'JARIANG 32:9

Nampa appala' doammo Yakub nakana, “O, Allata'ala, Ia napakalompoa toaku Abraham, siagang manggeku Ishak, poro Kipilangngeri laloa'! IKattemi Batara assuroa' ammotere' mange ri pa'rasangangku siagang bija pammanakangku. Nampa Kijanjima' angkanaya iKatte langngatoroki sikontu-kontuna a'jari baji', untu' inakke.

PA'JARIANG 46:1

Naparutusu'mi Yakub sikamma pa'barang-baranganna, nampa a'lampa. Anrapiki ke'nanga ri Bersyeba, assaremi koro'bang mae ri Allata'ala, Ia nasombaya Ishak, manggena.

1 PATTOTTORANG 12:17

Nibuntulimi ke'nanga ri Daud na nakana, “Punna battuko mae salaku agang untu' ambantua', a'gabung mako siagang inakke. Rannui pa'maikku antarima ngasengko. Mingka punna ero' ngasengko ambalianga' untu' musungku, manna tena kasalangku mae ri kau ngaseng, Allata'ala nasombaya boe-boeta angngassengi, Iami langhukkung ngasengko.”

PAMMUJI 31:7

Tau anynyombaya barhala Kikabirisi; mingka inakke tappaka' mae ri Batara.

KALAPPASSANG 3:7

Nampa Nakanamo Batara, “Kucini'mi kasessanna ummakKu ri Mesir, siagang Kulangngere'mi pakkio'na ke'nanga, ampalaki nilappassang battu ri sikamma tau anjallakkangai ke'nanga. Sikontutojenna Kuasseng ngasengi kasessanna ke'nanga.

YESAYA 8:13

U'rangi angkanaya iNakke, Batara Kaminang Makoasaya, tangkasakKa'. INakkeji bawang musti nukamallakkang.

DANIEL 2:23

O, Allata'ala napakalompoa boe-boeku, iKattemi kupuji siagang kupakala'biri'. Nasaba' Kisarea' kacara'dekang siagang kagassingang. Kiturukianga' pappalakku. Siagang Kipicinikiamma' pappialia mae ri karaenga.”

PAOLE 15:13

Anjo ata bebasakamo, takkulleai a'lampa nampa tanusarea apa-apa.

YUDAS 1:9

Manna kalenna Mikhael, iamintu kapalana malaekaka, tale'bakai a'gau' kamma anjo. Ri wattunna a'besere' siagang Billisika passabakkang inai langgappai maya'na Musa, tena nabarani Mikhael angngadeli siagang bicara hina Billisika. Angkanaji bawang Mikhael, “LaNapakainga' lompoko Batara!”