PA'JARIANG 28:18 - KITTA' MATANGKASA'

¹⁸ Ammukona bari'basa', ammentemmi Yakub, nampa naalle anjo batu napareka pa'lungang. Napaentemmi anjo batua a'jari batu pangngu'rangi. Natirikimi minynya' zaitun mabau' irateanna anjo batua untu' KalenNa Allata'ala.

PA'JARIANG 28:18 ပူးပေါင်းရင်းမြစ်များ

PA'JARIANG 21:14

Ammukona bari'basa', nasaremi Abraham kanre Hagar siagang se're pammoneang je'ne' untu' a'jari bokong ri lampana. Napadenge'mi anjo anaka ri dongko'na Hagar, nampa nasuro anjo bainea a'lampa. A'lampami Hagar mange ri parang lompona Bersyeba.

PA'JARIANG 22:3

Ammukona bari'basa', ammisa'-misa'mi kayu Abraham untu' lanapake angngerang koro'bang nampa nasikko' anjo kayua irate ri dongko'na keledaina. A'lampami siagang Ishak kammayatompa rua surona mange ri tampa' Napaua Allata'ala ri ia.

PA'JARIANG 28:11

Ri wattu labunamo alloa anrapi'mi ri se'reang tampa', nampa a'bangngi anjoreng. Anra'bami ero' attinro, nania'mo batu napare' pa'lungang.

PA'JARIANG 31:13

INakkemi Allata'ala le'baka ampappicinikangi KalengKu ri kau ri Betel. Anjoreng le'ba' mako assare se're batu pangngu'rangi, na nutiriki minynya' mabau' zaitun irateanna. Anjoreng tommako assumpa mae ri Nakke. Kamma-kamma anne sadia mako siagang ammotere' mako ri pa'rasangang kalassukannu.’ ”

PA'JARIANG 31:45

Angngallemi Yakub se're batu nampa napaenteng untu' a'jari batu pangngu'rangi.

PA'JARIANG 35:14

Ambangummi se're batu pangngu'rangi Yakub ri anjo tampa'Na Allata'ala a'bicara mae ri Yakub. Nampa napassareang anjo batua mae ri Allata'ala siagang natirikimi anggoro' na minynya' zaitun mabau' irateanna.

PA'JARIANG 35:20

Appaentemmi Yakub se're batu pangngu'rangi anjoreng, na sa'genna kamma-kamma anne anjo kuburu'na Rahel tuli nibatei ri anjo batua.

2 SAMUEL 18:18

Lalang attallasa'na Absalom le'ba'mi napambangungang kalenna se're tugu ri Ka'bung Karaeng, nasaba' tena ana' bura'nena untu' ampatulusuki jari-jarina. Anjo tugua niarengi situru' areng kalenna, na sa'genna anne alloa anjo tugua niassengi salaku Tugu Absalom.

PAMMUJI 119:60

Akkaro-karoma' siagang tenamo kuttayang untu' anggaukangi parentaTa.

KATO'BA 9:10

Jamai sikontu tugasa'nu sipagassing-gassinnu. Saba' tenamo sallang pikkirang yareka jama-jamang. Tenamo pangngassengang yareka kacara'dekang ri linona tau matea. Na iami anjo lanumangei.

YESAYA 19:19

Anjo wattua ri pappokokanna pa'rasangang Mesir lania' se're tampa' pakkoro'bangngang mae ri Batara, siagang ri pa'baeng-baenna nia' se're benteng batu nisa'la' akkale-kalea untu' Batara.

PAMMILANGNGANG 7:1

Ri wattunna le'ba' nabangung Musa KemaNa Batara, nitangkasimi anjo Kemaya siagang sikontu pakkakasa'na, iamintu nisapui ngasengi siagang minynya' upacara. Kamma tomminjo nagaukanga mae ri tampa' pakkoro'bangnganga siagang sikontu pakkakasa'na.

YOSUA 4:9

Anjoreng ri tangnga-tangngana anjo Binanga Yordan, nasusummi Yosua anjo sampuloa anrua batu, ri tampa' pammentenganna le'ba' sikamma imang ambulekai anjo Patti Parjanjianga. (Anjo batu-batua nia' iji anjoreng sa'genna kamma-kamma anne.)

1 SAMUEL 7:12

Le'baki anjo appaentemmi Samuel se're batu, ri pa'baeng-baenna Mizpa siagang Sen. Nakanamo, “Natulung maki' Batara siganna'na.” Nampa naareng anjo batua “Batu Pannulungang”.