PA'JARIANG 18:19 - KITTA' MATANGKASA'

¹⁹ Ia le'ba'mi Kupile sollanna naparentakang mae ri sikamma ana'-ana'na siagang turunganna untu' amminawang turu' ri Nakke kammayatompa nagaukang panggaukang bajika siagang adeleka. Punna nagaukangi ke'nanga anjo passalaka, sikontu janjingKu mae ri Abraham laKurupai ngasengi.”

PA'JARIANG 18:19 ပူးပေါင်းရင်းမြစ်များ

PA'JARIANG 12:2

LaKusareko bija majai, siagang laKupa'jari ke'nanga bansa lompo ri lino. LaKubarakkakiko siagang laKupa'jari masahoroki arennu, sa'gennu la'jari barakka'.

PA'JARIANG 12:3

LaKubarakkaki sikamma tau ambarakkakiako siagang laKutunrai sikamma tau antunrayako. Siagang lanri ri kau nalaKubarakkaki sikontu bansaya ri lino.”

PA'JARIANG 17:9

Nakanamo pole Allata'ala mae ri Abraham, “Ikau pole musti majarre' tongko' anta'galaki anne parjanjianga, baji' naikau kammayatompa sikontu lapisi'na turungannu.

PA'JARIANG 22:18

Sikontu bansaya ri lino lanapalaki ri kau sollanna Kubarakkaki ke'nanga, sangkamma Kubarakkakinna turungannu, lanri mannurukinnu ri parentaKu.”

PA'JARIANG 35:2

Nakanamo Yakub mae ri kaluargana siagang sikontu tau naaganga, “La'lampaki' anrinni nampa mangeki' ri Betel. Lambangunga' anjoreng tampa' pakkoro'bangngang untu' Allata'ala, Ia le'baka antulunga' ri wattungku lalang kasukkarang siagang le'baka anjagaia' manna kemae lampaku. Jari pela' ngasengi sikontu patung-patung maraenga ia niaka ri kau. Tangkasi ngasengi kalennu siagang pakei pakeang tangkasa'nu.”

2 SAMUEL 22:22

Kuturuki parentaNa Batara, na tena kuma'boko battu ri Allata'alaku.

2 SAMUEL 7:20

Apapi pole akkulle kupau mae ri Katte? Kiassengi sikontu-kontuna ri passala'na anne atanTa.

1 PATTOTTORANG 28:9

Nampa nakana Daud mae ri Salomo, “Anakku, parallui nuakui Allata'ala nasombaya manggenu, salaku Allata'alanu. Musti anynyombako mae ri Ia situlusu'na atinnu. Nasaba' Naasseng ngasengi sikontu pikkiranta siagang apa nakaerokia atinta. Punna nuboyai, lanubuntuluki, mingka punna nubokoi, laNasorongbokoko sa'genna satunggu-tungguna.

2 PATTOTTORANG 14:3

Napakabellai tampa'-tampa' pakkoro'bangnganna bansa maraenga siagang tampa'-tampa' panynyombanga mae ri barhalaya. Tembo'-tembo' patung rewataya naancuruki, siagang benteng-bentenna patung Dewi Asyera narumbangi.

NEHEMIA 9:7

IKattemi Allata'ala, Batara tenaya ruanna Kipilei Abram battu ri tangnga-tangnga bansana. Nabokoimi Ur ri Babel, lanri kalenTa ampimpingi. Nampa Kisare areng beru: Abraham, iaminjo arenna appakkaramula anjo wattua.

AYUB 1:5

Punna le'ba' anjo massing pa'gaukanga, tuli ambangung bari'basaki Ayub nampa assare koro'bang untu' tungga'-tunggala' ana'na sollanna nipammopporang ke'nanga ri Batara. Saba' nakana pikkiranna Ayub, gassingka dorakami anjo ana'-ana'na siagang nahinai Allata'ala natanaassenga kalenna.

PAMMUJI 1:6

Saba' tu mannurukia niului siagang nijagai ri Batara, mingka tu ja'dalaka mangngolo mange ri possoka.

PAMMUJI 11:4

Batara niaki ri Balla' matangkasa'Na, empoang kala'biranNa niaki ri suruga. Najannangngi umma' rupataua na Naasseng sikontu panggaukanna ke'nanga.

PAMMUJI 34:15

Pakabellai kalennu battu ri ja'dalaka, gaukangi bajika, usahakangi passiamakkanga sipikulle-kullenu.

PANGNGEBARANG 22:6

Ajaraki se'rea ana' antekamma batena siratang attallasa', na sa'genna toa tuli lakammana batena attallasa'.

YESAYA 38:19

Tuttallasa' bawang akkulle mammuji ri Katte, kamma kugaukanga anne alloa. Tutoa ancaritai ri ana'na ri tamaka tamamminraTa, o Batara.

KAIMANGNGANG 14:42

Nampa anjo batu-batu nipasuluka musti nisambei siagang batu-batu beru. Sikontu tembo'na anjo ballaka musti nilapisiki siagang palestere' beru.

AMOS 3:2

“Battu ri sikontu bansaya ri lino, ikaumi se're-se'rea bansa Kuassenga siagang Kuparhatikanga. Iaminjo saba'na nalompo dosanu, siagang ma'nassa laKuhukkung ngasengko.”

MATIUS 25:17

Kamma tomminjo nagaukanga palayang annarimaya ruassa'bu doe' ringgi' bulaeng; nanggappamo passawallang ruassa'bu doe' ringgi' bulaeng.

YOHANES 10:14

INakkemi pakalawaki bajika. Sangkamma NaassengKu Manggea na Kuasseng todong Manggea, sangkamma tomminjo Kuassenna gimbalakKu ngaseng, na naasseng tongA' ke'nanga. Kupassareangi nyawaKu sollanna attallasa' ke'nanga.

YOHANES 21:17

Akkuta'nammi pole Isa makapintallunna ri ia, Nakana, “Simon, ana'na Yona, maka nukamaseangA'?” A'jari si'nami atinna Petrus, lanri pintallummi akkuta'nang Isa ri ia. Jari appialimi pole Petrus nakana, “O Batara, sikamma apa-apaya Kiasseng ngasengi Batara. Kiassengi angkanaya kukamaseangKi' Batara!” Nakanamo pole Isa ri ia, “Parakaimi gimbalakKu ngaseng.

LAMPA-LAMPANA 27:31

Mingka nakanamo Paulus ri anjo perwiraya siagang sikamma anjo tantara niaka ri kappalaka, angkana, “Punna tammantanga anjo ana'-ana' kappalaka anrinni ri kappalaka, tena ngaseng nulasalama' battu ri anne bahayaya.”

EFESUS 6:4

Ikau ngaseng a'jari manggea! Teako pakanassu-nassui pa'mai'na ana'nu. Mingka pakalompoi pa'mai'na siagang ajara' bajiki ke'nanga situru' pangngajaranNa Batara.

PAOLE 32:46

nakanamo Musa, “Katutui sollannu mannuruki ri sikontu parenta kupassareanga mae ri kau anne alloa. Pangngajarrangi mae ri ana'-ana'nu, sollanna akkulle mannuruki ke'nanga ri sikontu hukkunNa Batara siagang pa'mai' tamamminra.

1 TIMOTIUS 3:12

Inai-nai a'jari pambantu lalang ri jama'aka musti se'reji bainenna. Musti naassengi angngatoro' bajiki ana'-ana'na siagang ruma tanggana.

2 TIMOTIUS 1:5

Kuu'rangi katappakkang tojeng-tojennu mae ri Almasi, sangkamma katappakkang nene'nu Lois siagang amma'nu Eunike. Na kupatappakko angkanaya kamma tongi anjo katappakkannu.

2 TIMOTIUS 2:19

Mingka anjo pammentengang makassa' le'baka Napare' Allata'ala takkulleai nipata'ge'goso'. Irateanganna nia' tattulisi' angkanaya, “Naassengi Batara sikamma taunNa,” siagang “Inai-nai nakana kalenna taunNa Batara, musti ammarimi anggaukangi gau' salaya”.

2 TIMOTIUS 3:15

Musti nuu'rangi angkanaya battu ri ca'dinu iji nanuassennamo Kittaka. Anjo Kittaka akkulleko nasare pangngassengang untu' anggappai kasalamakkanga tete ri katappakkang mae ri Isa Almasi.

YOSUA 24:15

Ebara' angkana taerokako anynyomba mae ri Batara, pilei memammi anne alloa, angkana inai lanusomba: rewata-rewata nasombaya boe-boenu riolo ri Mesopotamia yareka rewata-rewatana tu Amori nupammantangngia pa'rasanganna kamma-kamma anne. Mingka ikambe, iamintu inakke siagang sikontu kaluargaku, Batara bawang lakusomba.”

HAKING-HAKING 13:12

Akkuta'nammi Manoah angkana, “Punna kajariang sallang anjo apa le'baka nipau apa musti nigaukang ri anjo anaka? Antekamma sallang katallasanna?”