PA'JARIANG 17:8 - KITTA' MATANGKASA'

⁸ LaKupassareangi mae ri kau siagang mae ri turungannu, anne butta nupammantangia kamma-kamma anne salaku tubattu-battu. Sikontu butta Kanaan lanapatangi ana' cucunna sa'genna satunggu-tungguna, siagang iNakke la'jari Allata'alana ke'nanga.”

PA'JARIANG 17:8 ပူးပေါင်းရင်းမြစ်များ

PA'JARIANG 12:7

Napappicinikammi KalenNa Batara mae ri Abram na Nakana ri ia, “Iaminne pa'rasangang laKupassareanga mae ri sossorannu.” Nampa ambangummo Abram se're tampa' pakkoro'bangngang anjoreng untu' Batara, ia le'baka ampappicinikangi KalenNa mae ri ia.

PA'JARIANG 13:15

Sikontu anjo butta nucinika laKupassareangi mae ri kau siagang mae ri sossorannu, sollanna nukammai satunggu-tungguna.

PA'JARIANG 13:17

Kamma-kamma anne, jappaimi anne sikontu pa'rasanganga, nasaba' laKupassareangi anne mae ri kau.”

PA'JARIANG 23:4

“Inakke anne tubattu-battuja' ammantang ri tangnga-tangngata ngaseng; kisarea' pangngellai untu' ammalli siapa are luara'na butta sollanna akkulle kutarawang bainengku.”

PA'JARIANG 26:24

Anjo bangngia Napappicinikammi KalenNa Batara ri ia, na nakana, “INakkemi Allata'alana manggenu Abraham. Teako mallakki; laKujagaiko. LaKubarakkakiko siagang laKusareko turungang sannaka jaina lanri janjingKu mae ri atangKu Abraham.”

PA'JARIANG 28:4

Poro Nabarakkakiko Batara siagang turungannu, sangkamma le'ba'na Nabarakkaki Abraham. Kammayatompa poro nukammai anne butta nupammantangngia, le'baka Napassareang Allata'ala mae ri Abraham!”

PA'JARIANG 35:27

Nampa battumi Yakub mange ri manggena, iamintu Ishak, ri tampa' pammantanganna ri Mamre ri ampi'na Hebron. (Toana, iamintu Abraham, anjoreng tongi riolo ammantang.)

PA'JARIANG 36:7

Assibokoimi Esau siagang Yakub lanri jai duduna barang-baranna ke'nanga, siagang takkulleai ke'nanga attallasa' sirurungang. Nampa pole anjo pa'rasangang napammantangngia ke'nanga tanggannakai ruku' lanakanrea olo'-olo'na ke'nanga lanri jai duduna.

PA'JARIANG 37:1

Ammantammi Yakub ri pa'rasangang Kanaan, iamintu pammantanganna manggena riolo.

PA'JARIANG 48:4

Nakana ri nakke, ‘LaKusareko jai cucu, sollanna a'jari jai bansa turungannu; laKupassareangi anne pa'rasanganga mae ri turungannu, a'jari napatang sa'genna satunggu-tungguna.’ ”

2 SAMUEL 23:5

Kamma tomminjo jari-jariku batena Nabarakkaki Allata'ala, parjanjianNa ri nakke tena pamminraNa, mannannungang siagang sangkaki janjinNa, yangasenna bajiki atoro'na. Natanggongi Allata'ala pammetangku na Naturuki sikontu apa Nakaerokia pa'maikku.

1 PATTOTTORANG 16:18

Nakana, “Butta Kanaan laKupassareangi mae ri kau a'jari pusaka mae ri kau.”

PAMMUJI 103:17

Mingka tuli Nakamaseangi Batara tu mappilangngeria, tulusu' a'jarina kabajikanNa ri sikontu turungang,

PAMMUJI 105:11

Nakana, “Butta Kanaan laKupassareangi mae ri kau, a'jari pisaka nupatanga.”

PAMMUJI 105:9

Anjo parjanjianNa Napareki siagang Abraham, nampa mae ri Ishak;

KALAPPASSANG 13:11

Nakana Musa ri bansa Israel, “LaNarurungangko Batara mange ri pa'rasangang Kanaan le'baka Napa'janjiang ammake sumpa mae ri kau siagang boe-boenu. Punna ikaumi pata anjo pa'rasanganga,

KALAPPASSANG 21:6

musti nierangi ri pinggawana mae ri tampa' ibadaya. Anjoreng musti nisuroi ammenteng siagang ammanjeng anjo ataya ri pakke'buka yareka ri benteng pakke'bu'na tampa' ibadaya, nampa anjo pinggawana musti natintingi tolinna anjo ataya. Nampa la'jarimi anjo ataya salaku ata mae pinggawana sa'genna mate.

KALAPPASSANG 29:45

LammantangA' ri tangnga-tangngana bansa Israel, siagang iNakke a'jari Allata'alana ke'nanga.

KALAPPASSANG 32:13

Kiu'rangi sikamma atanTa Abraham, Ishak siagang Yakub. Kiu'rangi angkanaya assumpaKi' a'janji untu' assarei ke'nanga jari-jari rapang bintoeng ri langi' jaina, kammayatompa angkanaya sikontu anjo butta Kipa'janjianga lanapatangi jari-jarina ke'nanga sa'genna satunggu-tungguna.”

KALAPPASSANG 40:15

Nampa minynyaki ke'nanga sangkamma batenu amminynyaki manggena ke'nanga, sollanna akkulle todong ke'nanga allayaniA' salaku imang. Lanri anjo upacara minynyaka, iami ke'nanga siagang jari-jarina anta'galaki jama-jamang kaimangnganga.”

KALAPPASSANG 6:4

Kulangngere'mi kunrarenna tu Israel, nipare' ataya ri bansa Mesir, nampa Kuu'rangimo anjo janjingKu.

KALAPPASSANG 6:7

LaKuerangko mange ri pa'rasangang Kupa'janjianga ammake sumpa mae ri Abraham, Ishak siagang Yakub; Kupassareangi anjo buttaya mae ri kau a'jari ikau ampatangi. INakkemi Batara.”

YEREMIA 25:5

Nasuroko ke'nanga ampamari batenu attallasa' ri kaja'dallanga, siagang sikamma panggaukang dosanu, sollannu akkulle ngaseng ammantang tuli ri anne pa'rasangang le'baka Napassareang Batara mae ri kau siagang mae ri boe-boenu a'jari pisakanu.

YEREMIA 31:1

Nakana Batara, “Lanarapi sallang wattunna naKua'jari Allata'ala mae ri sikontu suku Israel, siagang ke'nanga a'jari ummakKu.

YEHEZKIEL 11:20

Jari lamannurukimi ke'nanga ri paratorang-paratorangKu siagang majarreki ke'nanga anggaukangi sikontu parentaKu. Ke'nanga la'jari ummakKu siagang iNakke la'jari Allata'alana ke'nanga.

YEHEZKIEL 33:24

“He tau, anjo sikamma tau ammantanga ri rumbanna kota-kotaya ri butta Israel nakanai, ‘Abraham anggappai anne sikontu buttaya, padahala' ia poro kale-kalennaji bawang. Ikatte anne jaiki', jari anne buttaya ikatte pata.’ ”

KAIMANGNGANG 14:34

paratorang-paratorang ri passala'na balla' natabaya jappo' a'la'banga. Anne paratorang-paratoranga nipakei ri wattunna antama'mo bansa Israel ri pa'rasangang Kanaan, iamintu pa'rasangang Napassareanga Batara mae ri ke'nanga.

KAIMANGNGANG 16:34

Anjo upacaraya musti nigaukangi sikali sitaung untu' ampakatangkasaki bansa Israel battu ri sikontu dosana ke'nanga. Iaminjo paratorang-paratorang mustia nituruki sa'genna satunggu-tungguna. Nagaukammi Musa situru' anjo apa Naparentakanga Batara mae ri ia.

KAIMANGNGANG 26:12

INakke larrurungangko; iNakke la'jari Allata'alanu, na ikau la'jari ummakKu.

ZAKHARIA 8:8

nampa Kuerang ammotere' ke'nanga battu iraya siagang battu lau', sa'genna ammantang pole ke'nanga ri Yerusalem. La'jari ke'nanga ummakKu siagang iNakke a'jari Allata'alana ke'nanga. INakke lammarenta mae ri ke'nanga lalang kajarrekang siagang kaadelang.”

PAMMILANGNGANG 10:29

Nakanamo Musa mae ri ipara'na, iamintu Hobab ana'na Rehuel tu Midian, “La'lampai ikambe mange ri tampa' nakanaya laNapassareangi Batara mae ri kambe. Le'ba'mi Napa'janjiang Batara apa bajika mae ri tu Israel. Jari amminawang mako, tena tanigau' baji'nu ri kambe.”

PAMMILANGNGANG 25:13

Ia siagang jari-jarina Kupattantu salaku imang sa'genna satunggu-tungguna, lanri attojeng-tojenna angngalleangA', Allata'alana, siagang appare'Ma' passiamakkang mae ri dosana tu Israel.”

PAMMILANGNGANG 27:12

Nakana Batara mae ri Musa, “Naikko ri Moncong Abarim, siagang battu anjoreng mako anciniki pa'rasangang laKupassareanga mae ri tu Israel.

LAMPA-LAMPANA 7:5

Anjo wattua, manna sike'de' tania' anne pa'rasanganga Napassareanga Allata'ala mae ri Abraham a'jari pa'rasanganna; manna sipala' bangkeng tania' nipassareang mae ri ia. Mingka a'janji Allata'ala angkanaya laNapassareangi mae ri Abraham siagang sossoranna anne pa'rasanganga, a'jari pa'rasanganna. Anjo wattua tena ana'na Abraham.

PAOLE 14:2

Ikaumi Napatanga Karaeng Allata'alanu; battu ri sikontu bansaya ri lino, ikaumi Napile Allata'ala untu' a'jari umma'Na.”

PAOLE 26:18

Anne alloa Natarimako Batara salaku umma' KalenNa, sangkamma Napa'janjianga mae ri kau, siagang Naparentakangi mae ri kau sollanna nuturuki sikamma hukkunNa.

PAOLE 29:13

Iaminjo parjanjianga Napake Batara anne alloa ampakajarrekko a'jari bansaNa, siagang Ia a'jari Allata'alanu sangkamma Napa'janjianga mae ri kau siagang mae ri boe-boenu iamintu Abraham, Ishak siagang Yakub.

PAOLE 32:49

“A'lampako mange ri Moncong Abarim ri pa'rasangang Moab ri ba'leanna kota Yerikho. Nampa naikko ri Moncong Nebo siagang cinikimi butta Kanaan tenayamo nasallo naKupassareang mae ri bansa Israel.

PAOLE 32:8

Ri wattu Nabagena Kaminang Tinggia butta pisakaya, tunggala' bansaya Napattantui daerana siagang se'reang rewata a'jari makoasa.

PAOLE 34:4

Nampa Nakanamo Batara mae ri Musa, “Iaminjo pa'rasangang Kupa'janjianga mae ri Abraham, Ishak siagang Yakub untu' nipassareang mae ri jari-jarina ke'nanga. Kupappicinikangi mae ri kau, Musa, mingka tena naKupa'biangko a'lampa mange anjoreng.”

PAOLE 4:37

Lanri Nakamaseangi boe-boenu, na Napile mako; lanri koasa malompoNa na Naerang mako assulu' battu ri Mesir.

IBRANI 9:15

Lanri kammanami anjo, na'jarimo tete Almasi untu' passijanjiang beru, sollanna akkulle natarima sikamma tau le'baka Nakio' Allata'ala untu' annarima barakka'-barakka' mannannungang le'baka Napa'janjiang Allata'ala. Yangasenna anjo kammaya akkullei kajariang lanri nia'na le'ba' mate, iamintu Almasi; na battu ri iaminjo kamateanNa Nakkullemo Nalappassang rupataua battu ri sikamma kasalang le'baka nagaukang ke'nanga, ri wattu tappakena ija passijanjiang uru-urua.

YOSUA 1:2

Nakana Batara, “Matemi atangKu Musa. Jari baji'mi punna apparuru mako siagang sikontu umma' Israel kamma-kamma anne, untu' a'limbang ri Binanga Yordan, siagang ampantamakki pa'rasangang Kupassareanga mae ri ke'nanga.

PAPPICINI' 21:7

Tau ammetaya lanatarima ngasengi yangasenna anjo battu ri Nakke. INakke la'jari Allata'alana siagang ia la'jari anakKu.