OBAJA 1:18 - KITTA' MATANGKASA'

¹⁸ UmmakKu Israel larapangi pepe' angkanrei jari-jarina Esau, rapang pepe' angkanreai sa'genna cappu' raramea ri kokoa. Tena manna sitau battu ri jari-jarina Esau akkulle lata'lappasa'. INakke, Batara anne akkana!

OBAJA 1:18 ပူးပေါင်းရင်းမြစ်များ

2 SAMUEL 19:20

Kamma-kamma anne sadara'mi atanta, angkanaya dorakai atanta, na lanri kammana anjo, ri alla'na suku-suku niaka ammantang ri daera bageang waraka, atantami anne kaminang riolo battu anruppaiki' anne alloa.”

KALAPPASSANG 5:12

Jari a'lampami tu Israel anjappai sikontu butta Mesir untu' appasse're rarame.

YESAYA 10:17

Allata'ala matangkasaka, Cayana Israel, la'jari pepe' angkanreai sikamma apa niaka lalang siallo bawang, ba'lalo sikamma rompo' katintinga.

YESAYA 31:9

Lalari karaenna ke'nanga napakamma malla', nampa sikamma perwirana sanna' ta'bangkana, sa'genna nabokoi ke'nanga sikamma bandera pa'bundukanna.” Batara le'ba' akkana, Batara nisombaya siagang nipakalompoa, nisarea koro'bang nitunu ri Yerusalem.

YESAYA 47:14

Ciniki, rapangi ke'nanga rarame nakanrea pepe'; takkulleai napasalama' kalenna ke'nanga! Ta'lalo bambanna anjo pepeka mae ri ke'nanga, teai pepe' kammu' untu' a'binrung.

YESAYA 5:24

Nutollaki ajaranNa Batara Kaminang Koasaya, na nuhina parentaNa Allata'ala matangkasa'na tu Israel. Lanri kammana anjo, rapang rarame siagang ruku' kalotoro' la'busu' nakanre pepe', kamma tomminjo aka'-aka'nu la'jari bottoki, bunga-bungannu la'jari kalotoroki na la'busu' nairi' anging.

YESAYA 9:18

Sanna' larroNa Batara Kaminang Koasaya, na hukkunganNa rapangi pepe' a'rinra lompo; nampa anjo bansaya napare' kayu tunuang sa'genna cappu' nakanre pepe'. Tena manna sitau angkamaseangi sari'battanna.

YESAYA 9:19

Ri sikontu anjo pa'rasanganga massing a're'bu'mi siagang sambarang mami apa-apa nakanre, mingka tena bassoro'na ke'nanga. Ba'lalo massing para iami sikanre-kanre sipa'agangngang!

YEREMIA 11:23

Le'ba'mi Kupattantu wattunna untu' ampaturungi balaya mae ri tu Anatot, siagang punna battumo wattu hukkunganna ke'nanga, manna sitau tania' lata'lappasa'.”

YEHEZKIEL 37:16

“He tau, angngalleko se're takkang siagang tulisiki anne kana-kanaya anjoreng, ‘Kakaraengang Yehuda’. Nampa angngalleko se're takkang maraeng, siagang tulisiki anjoreng, ‘Kakaraengang Israel’.

YEHEZKIEL 37:19

pauangi ke'nanga, angkana iNakke, Batara Kaminang Tinggia, langngalle se're takkang pangngebaranna Israel nampa Kupasialle se're takkang pangngebaranna Yehuda. Anjo ruaya takkang laKupa'jari se'rei siagang Kuta'galaki lalang limangKu.

YO"EL 2:5

A'lumpa'-lumpa' ke'nanga ri coppo' monconga, sa'ranna kontui sa'ra galutturu'na kareta pa'bundukanga siagang a'rete'na pepe' akkanreya. A'barrisiki kontu pasukang barania, sadiaya maju mange ri pa'bundukanga.

AMOS 1:8

Pandudu'na siagang pamarentana kota Asdod kammayatompa Askelon laKupabellai. Kota Ekron laKuhukkungi, siagang sikontu tu Filistin tassesaya laKupanraki.”

AMOS 5:15

Kabirisi kaja'dallanga, siagang mangngaiko ri kabajikanga, paentengi kaadelanga. Gassingka laNakamaseangi Batara sikamma tau tassesaya battu ri bansa Israel.

AMOS 6:6

Angnginungko anggoro' battu ri pangnginungang niboneia sa'genna rassi, siagang ammakeko minynya' bau' kaminang bajika, mingka tena nasi'na pa'mai'nu mae ri kaancuranna Israel.

OBAJA 1:16

Irate ri bulu' matangkasakKu le'ba'mi nainung ummakKu inungang pangngebarranna hukkunganna. Mingka inungang mae ri bansa-bansaya ri buttaya anne la'bi paikangngangi pole. Takkulleai naliliang ke'nanga anjo hukkunganga. Musti nainungi ke'nanga sa'genna la'busu', nampa lalanynya' ke'nanga tena bate-batena.”

MIKHA 5:8

Israel lanabetai musu-musunna kammayatompa naancuru' kabusuki ke'nanga.

NAHUM 1:10

Lanitunuko rapang rarame kalotoro' kontu rompo' akkatinting sikalasaka.

ZAKHARIA 12:6

Anjo alloa sikamma kaluarga Yehuda laKupa'jari rapang pepe' lalang ri pa'gompoang kayu tunua yareka sulo a'rinraya irawanganna gandung-gandung nikawarranga; lanaancuruki ke'nanga sikamma bansa-bansa niaka ri tammulilina. Mingka pandudu'na Yerusalem tuli ammantangi lalang ri kotaya siagang amang.

MALEAKHI 4:1

Nakana Batara Kaminang Koasaya, “Labattui sallang allonNa nasikontu tau tampoa siagang tau ja'dalaka nitunui rapang rarame. Ri anjo alloa lanitunui sa'genna la'busu' ke'nanga, siagang tenamo ke'nanga latassesa.

1 KORINTUS 3:12

Nia' ammake bulaeng ambangung irateanna anjo pondasia, nia' ammake pera', nia' ammake batu paramata, nia' ammake kayu, nia' todong ammake ruku' yareka batang ase.