NAHUM 3:18 - KITTA' MATANGKASA'

¹⁸ He karaenna pa'rasangang Asyur! Matemi sikamma guburnurnu, siagang sikamma bupatinu tinro tulusu'mi satunggu-tungguna. Ra'ya'nu tassia'-siara'mi ri moncong-monconga, natena manna sitau akkulle angngerangi ke'nanga ammotere'.

NAHUM 3:18 ပူးပေါင်းရင်းမြစ်များ

1 KARAENG-KARAENG 22:17

Appialimi Mikha angkana, “Kuciniki tantara Israel tassiara' tena silolongang ri moncong-monconga. Sanrapangi ke'nanga gimbala' tenaya pakalawakinna, siagang Nakana Batara ri sesena ke'nanga, ‘Anne taua ngaseng tena pamimpinna. Lappassammi ammotere' ke'nanga siagang salama'.’ ”

KALAPPASSANG 15:16

Tamaka malla'na ke'nanga ansa'bikangi kagassinganNa Batara. Ammalona ummatTa, takkulleai musua antahangi; ta'lappasa'mi bansa le'baka Kilappassang.

YESAYA 13:14

Bansa maraeng ammantanga ri Babel lasisa'la'-sa'laki siagang massing lari mange ri pa'rasanganna. Rapangi ke'nanga jonga lari battu ri pammuranga, yareka rapang gimbala' tenayamo pakalawakinna.

YESAYA 47:1

Nakana Batara, “He Babel, naungko battu ri empoang kala'birannu, siagang ammempo mako rate ri limbu'buka. Tenamo nulale siagang kanang-kanang kamma riolo.

YEREMIA 50:18

Lanri kammana anjo, iNakke, Batara Kaminang Koasaya, iamintu Allata'alana Israel, langhukkungi Karaeng Nebukadnezar siagang pa'rasanganna, sangkamma batena Kuhukkung karaeng Asyur.

YEREMIA 51:39

Ri wattu cinna duduna ke'nanga angnganre, laKupasadiangi ke'nanga kanre, siagang laKupa'jari nasa'ringi ke'nanga sa'genna dangngala' ulunna nampa attinro natambangungamo poleang.

YEREMIA 51:57

LaKupa'jari nasa'ringi sikamma pagawena Babel – sikamma tau cara'de'na, sikamma pamimpinna siagang tantarana. Tenamo nalambangung-bangung ke'nanga ammotere', attinromi sa'genna satunggu-tungguna. INakkemi le'ba' a'bicara; iNakkemi Karaeng, iNakke Batara Kaminang Koasaya.

PAPPICINI' 6:15

Nampa karak-karaeng niaka ri lino, sikamma tumalompoa, sikamma panglimaya, sikamma tau kalumanynyanga, siagang sikamma tau anna'galaka koasa kammayatompa sikamma tau maraengannaya, baji' na ata yareka tau bebasa', mange ngasemmi ancokkoi kalenna ri kali'-kali'bong buluka yareka ri alla'-alla'na batua ri buluka.