MIKHA 1:1 - KITTA' MATANGKASA'

¹ Assala'na Mikha iamintu tubattu ri se're kota ca'di niarenga Moresyet. Ri wattu niparentana pa'rasangang Yehuda iamintu sikamma karaeng: Yotam, Ahas, siagang Hizkia; iaminjo wattua nannarima Mikha pasang battu ri Batara ri passala'na Samaria siagang Yerusalem.

MIKHA 1:1 ပူးပေါင်းရင်းမြစ်များ

2 KARAENG-KARAENG 15:32

Ri taung makarua ammarentana Karaeng Pekah ana'na Remalya ri Israel, ia tomminjo wattua na'jari Karaeng Yotam ana'na Usia ri Yehuda.

2 KARAENG-KARAENG 15:5

Nipa'jari garring salami ri Batara, na sa'genna mate, tena le'bakai a'jari baji' anjo garrinna. Nisa'laki ammantang ri se'reang balla' siagang tena nakkulle nagaukang sikamma tugasa'na. Jari ana' bura'nena niarenga Yotam amwakkeli ammarenta ri ra'yaka.

2 KARAENG-KARAENG 16:1

Ri taung makasampulo antuju ammarentana Karaeng Pekah ana'na Remalya ri Israel, Ahas ana'na Yotam a'jari karaeng Yehuda.

2 KARAENG-KARAENG 18:1

Ri taung makatallu ammarentana Karaeng Hosea, ana'na Ela ri Israel, anjo wattua Hizkia ana'na Ahas a'jari karaeng ri Yehuda.

2 PATTOTTORANG 28:1

Wattunna a'jari Karaeng Ahas 20 taung umuru'na, siagang 16 taung sallona ammarenta ri Yerusalem. Tena naturuki panggaukang baji'na Karaeng Daud, boena, passangalinna nagaukangi apa tenaya Nangai Batara.

2 PATTOTTORANG 29:1

Wattunna a'jari Karaeng Hizkia, 25 taung umuru'na, siagang ammarentai 29 taung sallona ri Yerusalem. Amma'na niarengi Abia ana'na Zakharia.

YESAYA 1:1

Bone nakimbolonga anne kittaka iamintu siapa are pappasang ri passala'na Yehuda siagang Yerusalem; anne pappasanga Napabattui Allata'ala mae ri Na'bi Yesaya, ana'na Amos, ri wattunna Uzia, Yotam, Ahas, siagang Hizkia, ammarenta ri Yehuda.

YESAYA 1:2

Pilangngeri he langika, parhatikangi he buttaya! Nakana Batara, “Ana'-ana' le'baka Kuparakai angngewai ri Nakke.

YESAYA 7:1

Anjo lapung Karaeng Ahas, iami ana' bura'nena Yotam, cucunna Uzia. Ri wattunna ia ammarenta ri Yehuda, kajariammi bunduka. Rezin karaeng Siria, siagang Pekah ana' bura'nena Remalya karaeng Israel, battui ambunduki Yerusalem. Mingka takkulleai nabeta ke'nanga anjo kotaya.

YESAYA 7:9

Anjo Israel tena nakassakkangngang na Samaria, iamintu ibukotana, kammayatompa anjo Samaria tena nakassakkangngang na Karaeng Pekah. Punna tena nuttojeng-tojeng tappa' mae ri Nakke, mattantu tena nukkulle lattahang.”

YEREMIA 26:18

“Ri wattunna Hizkia a'jari karaeng Yehuda, Na'bi Mikha battu ri Moresyet napabattui mae ri ra'yaka anne kana battua ri Batara Kaminang Koasaya, angkana, ‘Sion lanipa'jekoi rapang koko, Yerusalem la'jari pannambungang rumbangngang, siagang Bulu' Balla'Na Batara la'jari romangi.’

HOSEA 1:1

Iaminne pasang Napassareanga Batara mae ri Hosea ana'na Beeri ri wattunna kakaraengang Yehuda niparenta massing-massing ri Karaeng Uzia, Yotam, Ahas, siagang Hizkia, nampa kakaraengang Israel niparenta ri Yerobeam ana'na Yoas.

HOSEA 4:15

He ikau ngaseng tu Israel, tena namajarre' pa'mai'nu mae ri Nakke! Mingka, Kurannuangi Yehuda natenaja nagaukang tongi kasalang kammaya! Teako mangei anggaukangi ibadanu ri Gilgal yareka ri Betel. Teako assumpai anjoreng lanri arenNa Batara mattallasaka.

HOSEA 8:14

Ambangungi tu Israel siapa jaina balla' karaeng, mingka nakaluppai ke'nanga angkana inai ampa'jari kalenna. Natambai tu Yehuda kota-kota pattahanganna napila' jai, mingka lappaturungA' pepe' untu' antunui sa'genna cappu' sikamma balla' lompona siagang kota-kotana ke'nanga.”

AMOS 1:1

Anjo lapung Amos, iamintu sitau pakalawaki gimbala' battu ri kota Tekoa. Nikioki a'jari na'bi ri wattu niparentana pa'rasangang Yehuda ri Karaeng Uzia, siagang Israel niparentai ri Karaeng Yerobeam, ana'na Yoahas. Ruan taung ri tenanapa nakajariang ta'ge'goso'na buttaya, Napa'nyatai Allata'ala mae ri Amos ri passala'na tu Israel.

AMOS 6:1

Cilakako ikau ngaseng attallasa' nyamanga ri Sion, siagang amanga pakkasia'na ri Samaria – ikau ngaseng he pamimpinna tau jaia ri anne Israel porea, ikau ngaseng sarroa nibattui ri ra'yaka untu' nipappalakki pannulungang!

MIKHA 1:5

Yangasenna anjo lakajariangi lanri dorakai tu Israel siagang angngewai ri Allata'ala. Inai passabakkang nadoraka tu Israel? Sai Samaria ibukotana tonji? Inai passabakkang nanynyomba tu Yehuda ri barhalaya? Sai Yerusalem tonji?

MIKHA 3:9

Pilangngeri anne kana-kanangku, he ikau ngaseng tukoasana Israel nakabirisia kaadelanga siagang amputara' balekai katojenganga.

HABAKUK 1:1

Iaminne pasang Napa'nyataya Batara mae ri Na'bi Habakuk.

2 PETRUS 1:21

Nasaba' tale'bakai nia' tau angkana battu ri ero' kalenna nakkulle napabattu biritta battua ri Allata'ala ri passala'na anjo apa-apa lakajarianga. Yangasenna anjo taua nikoasai ri Roh KalenNa Allata'ala ri wattunna Napabattu anjo biritta battua ri Allata'ala.