MATIUS 5:19 - KITTA' MATANGKASA'

¹⁹ Lanri kammana, inai-nai andakkai kalase'renna anjo parentaya, manna nakaminang ca'diaja, nampa naajara' todong paranna tau a'gau' kamma, iaminjo taua la'jari kaminang ca'di ri umma'Na Allata'ala. Mingka inai-nai anturuki anjo sikamma parentaya, nampa naajara' todong paranna tau anggaukangi, iaminjo taua sallang la'jari malompo ri umma'Na Allata'ala.

MATIUS 5:19 ပူးပေါင်းရင်းမြစ်များ

PAMMUJI 119:128

Lanri kamma nakuttallasa'mo situru' sikontu pitunjutTa; panggaukang ammengkaya kukabirisi.

PAMMUJI 119:6

Punna kuparhatikang sikontu parentaTa, tenamo kulanipakasiri'.

DANIEL 12:3

Sikamma pamimping cara'deka laccayai sangkamma cayana langika. Siagang sikamma tau le'baka angngajara' tau jai untu' anggaukangi apa bajika siagang adeleka, laccayai sangkamma bintoenga untu' satunggu-tungguna.”

MATIUS 11:11

U'rangi laloi anne! Tenanniakka tau le'ba' nia' ri lino lompoanganga na Yohanes Paje'ne'. Mingka manna nakamma mamo, inai-nai kaminang tuna ri umma'Na Allata'ala, lalompoangangi na Yohanes.

MATIUS 19:28

Nakanamo Isa ri ke'nanga, “Tappa' mako angkanaya: Ri Lino Berua, lammempoi Ana' Ma'rupataua irate ri empoang kala'biranNa. Anjo wattua sallang, ikau ngasemmi ana'-ana' gurungKu lammempo irate ri sampuloa anrua empoang kala'birang. Na ikaumi langngadeli sampuloa anrua suku ri bansa Israelka!

MATIUS 20:26

Mingka ikau takkulleako appakamma anjo. Passangalinna inai-nai ero' a'jari tau lompo parallui a'jari palayang.

MATIUS 28:20

Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”

LUKAS 1:15

La'jari tu nipakalompoi ri dallekanNa Allata'ala. Talangnginungai anggoro' siagang inungang terasa'. Pakkaramula battu ri nilassukanna lanirurungangi ri RohNa Allata'ala.

LUKAS 11:42

Cilaka ngaseng mako ikau tu Farisia! Nupassareammi ri Allata'ala bage sampulona wassele' lamung-lamunnu, kammaya lanipareka minynya'-minynya' rampa, yareka rampa-rampa maraengannaya; mingka kaminang parallua, iamintu kaadelanga siagang pangngamaseanga ri Allata'ala, tena sikali nanujampangi. Na sikontutojenna iaminjo rolong parallu nugaukang, nampa tena todong nukaluppai maraenganga.

LUKAS 9:48

Nampa Nakana ri ana'-ana' gurunNa, “Inai-nai antarimai anne anaka passabakkang iNakke, battuanna iNakkemi natarima. Na inai-nai antarimA', battuanna natarima tommi Allata'ala assuroA' battu. Nasaba' inai-nai kaminang tuna ri kau, iami kaminang la'biri'!”

LAMPA-LAMPANA 1:1

Natarimai Teofilus, mabaji' pa'maika, Le'ba'mi kupakasingara' lalang ri kitta' makase'rea, sikamma apa le'baka Nagaukang siagang Napangngajarrang Isa, pakkaramula ri uru-uru Nagaukanna jama-jamanNa,

ROMA 3:8

Siagang angngapa nanitakkullea angkana, “Umba nakia'gau' ja'dala' sollanna ammumba kabajikanga?” Memang nia'mo siapa are tau anghina-hina', angkanaya inakkemi le'ba' akkana kamma anjo. Tau kammaya ngasemmi anjo siratang Nahukkung Allata'ala.

ROMA 6:1

Jari punna kamma, apamo lakkulle nikana? Jari musti tuli nigaukammi dosaya sollanta pila' nikamaseang ri Allata'ala?

ROMA 6:15

Jari, kamma-kamma anne apa bodona bicaraya? Maka akkullei nigaukang dosaya nasaba' tenamo nakirawangang kakoasanna hukkung-hukkung agama Yahudia passangalinna irawangang kakoasanNa pangngamaseanNa Allata'ala? Tena sikalia!

PAOLE 12:32

Gaukang ngasengi sikontu apa kuparentakanga mae ri kau; teako tambai yareka teako kurangngi.

PAOLE 27:26

‘Nitunrai tau tenaya namannuruki ri sikontu hukkunNa siagang paratoranNa Allata'ala.’ ‘Aming!’ ”

1 TIMOTIUS 6:11

Mingka ikau taunNako Allata'ala; jari musti nupakabellai kalennu battu ri yangasenna anjo sikammaya. Usahako sollannu a'jari tau annaba ri paccini'Na Allata'ala, ampare' atayai kalenna mae ri Allata'ala; kammayatompa tappaka mae ri Almasi, niaka pangngamaseanna, sa'baraka siagang baji' pa'maika.

TITUS 3:8

Sanna' kontutojenna anne bicaraya. Kukellaiko ampakasingara' tojeng-tojengi yangasenna anne, sollanna akkulle usaha tojeng-tojeng sikamma tau tappaka mae ri Allata'ala, untu' anggaukangi jama-jamang bajika siagang a'matu-matua untu' yangasenna taua.

1 PETRUS 5:4

Na punna battu sallang Pakalawaki Mala'birika, langgappa mako hadia sannaka ga'gana. Anjo hadiaya takkulleai amminra kaga'ganna.

1 YOHANES 3:4

Inai-nai anggaukangi dosaya, nadakkaimi hukkunNa Allata'ala, nasaba' nikanaya dosa iamintu nidakkai hukkunNa Allata'ala.

PAPPICINI' 2:20

Mingka nia' Kukabattallang mae ri kau ngaseng: Nusarei pa'mai' Izebel, anjo baine nakanaya kalenna tunisuro ri Allata'ala. Jaimi atangKu le'ba' natipu siagang naajara' untu' a'gau' bawang siagang angkanrei kanre le'baka nipassareang mae ri barhalaya.

1 SAMUEL 2:30

INakke, Karaeng Allata'alana Israel, riolo le'ba'Ma' a'janji angkanaya kaluarganu siagang turungannu la'jari palayang mae ri Nakke, salaku imang sa'genna satunggu-tungguna. Mingka kamma-kamma anne tenamo naKuero' ri anjo kammaya! Nasaba' inai-nai ampakala'biriKa' iami laKupakala'biri', na inai-nai anghina' iami laKuhina.